Read TAITA BIBLE – Biblia Ilagho Jiboie Kwa Wandu Wose 2 MALAGHO GHA NGELO 22 Bible Online

2 MALAGHO GHA NGELO 22 - TAITA BIBLE – Biblia Ilagho Jiboie Kwa Wandu Wose bible

2 MALAGHO GHA NGELO 22

¹Ahazia, mwana mtini wa Jehoramu, ukabonywa kukaia mzuri ni wandu wa Jerusalemu wulalo ghwa ndee; kwa kukaia waruna wabaa werecheloghe ni Waarabu kambinyi, wikabwaghwa. Kwa huwo, Ahazia mwana wa Jehoramu mzuri wa Juda ukabonya nguma.

²Ahazia orekoghe mundu wa irika ja miaka mirongo ina na iwi iji orezoyagha kubonya nguma. Ukabonya nguma Jerusalemu mwaka ghumweri. Mae orewangwagha Athalia mwai wa Omri.

³Nao moni wori ukanugha mfwano ghwa nyumba ya Ahabu, angu mae orekoghe mjama wake, ukamlongoza kubonya mawiwi.

⁴Ukabonya mawiwi imbiri ya BWANA, sa iji koni wandu wa nyumba ya Ahabu werebonyereghe; angu ndee uendafwa, wandu wa nyumba ya Ahabu niwo werekoghe wanjama wake, nawo wikamshekeria kunoneka.

⁵Ukanugha njama rawo ukaghenda na Joramu mwana wa Ahabu mzuri wa Israeli kubonya wuda na Hazaeli mzuri wa Siria aja Ramoth-gileadi. Wasiria wikamshoghonua Joramu,

⁶ukawuya Jezreeli kuonesha vonda orevipatireghe Rama ukilwa na Hazaeli mzuri wa Siria. Ahazia mwana wa Jehoramu mzuri wa Juda ukasea Jezreeli kumzighana Joramu mwana wa Ahabu angu orekoghe mkongo.

⁷Ela ugho ghodeeka ni mpango ghwa Mlungu ghomtotesha Ahazia kwa chia eghendamzighana Joramu. Angu uendaghenda aho, orefumieghe na Joramu kuendammara Jehu mwana wa Nimshi, uo BWANA oremshingieghe mavuda upate kuitotesha nyumba ya Ahabu.

⁸Hata iji Jehu orekoghe ukibonya iyo kazi etotesha, ukawikua wabaa wa Juda na wana wa waruna Ahazia, awo werekoghe wikimdumikia Ahazia, ukawibwagha.

⁹Ahazia ukalolwa ukaendawonekia Samaria wakuvisa; ukawadwa ukaredwa kwa Jehu, ukabwaghwa. Wikamrika wikighamba, “Uo ni wawae Jehoshafati uo oremlolieghe BWANA kwa ngolo yake yose.” Nyumba ya Ahazia ikasowa mndungi udimagha kubonya nguma.

¹⁰Nao iji Athalia mae Ahazia wawona angu mwana wake wafwa, ukafunya momu wandu wose wa kinyumba cha wuzuri ghwa wandu wa Juda wibwagho.

¹¹Ela Jehosheba mwai wa mzuri, ukammbwada Joashi mwana wa Ahazia, ukamwiwa aghadi ya wana wa wazuri werekoghe kaavui kubwaghwa, ukamvisanya na yaya wake andenyi ya chumba chelala. Kwa chia iyo, Jehosheba uo mwai wa mzuri Jehoramu, muka wa mkohani Jehoiada, angu orekoghe Ahazia mruna, ukamvisa Joashi usebwagho ni Athalia.

¹²Ukaduanya nawo miaka irandadu, uvisiro andenyi ya Hekalu, ingelo Athalia orekoghe ukibonya nguma isangenyi.