Read TAITA BIBLE – Biblia Ilagho Jiboie Kwa Wandu Wose 2 MALAGHO GHA NGELO 26 Bible Online

2 MALAGHO GHA NGELO 26 - TAITA BIBLE – Biblia Ilagho Jiboie Kwa Wandu Wose bible

2 MALAGHO GHA NGELO 26

¹Wandu wose wikammbwada Uzia orekoghe wa irika ja miaka ikumi na irandadu, wikam'bonya mzuri wulalo ghwa ndee Amazia.

²Uzia ukawada Elathi nyuma ya kifwa cha ndee, na kughuagha.

³Orekoghe mundu wa irika ja miaka ikumi na irandadu iji orezoyagha kubonya nguma; ukabonya nguma Jerusalemu miaka mirongo misanu na iwi. Mae orewangwagha Jekolia ufumie Jerusalemu.

⁴Uzia ukabonya mecha imbiri ya BWANA sa iji koni ndee orebonyereghe.

⁵Orekufunyireghe kumlola Mlungu matuku gha Zekaria, uo oremfundishireghe kumuobua Mlungu; na sa iji oremlolieghe BWANA, Mlungu orem'bonyereghe kuwona mecha.

⁶Ukafuma, ukabonya wuda na Wafilisti, ukavuchua wurigha ghwa Gathi, na wurigha ghwa Jabne, na wurigha ghwa Ashdodi na andu kuzima aghadi ya Wafilisti.

⁷Mlungu ukamtesia kulwa na Wafilisti, na Waarabu, awo werekoghe Gurbaali, na Wameuni.

⁸Waamoni werekoghe wikilipa kodi kwa Uzia, na sare yake ikaera hata mwano ghwa Misri; angu orekoghe na wudimi m'baa loli loli.

⁹Aighu ya agho, Uzia oreaghieghe minara Jerusalemu aho; Mbenge ya Mbembenyi, na Mbenge ya Vololonyi na Ngulainyi; ukaibonyera ngome.

¹⁰Ukaagha minara kireti, ukakota visima angu orekoghe na mfugho nyingi, Shefela na wurindinyi wori. Orekoghe na walimi na waboisi mizabibu mighondinyi, na andu ndoe riwurue, angu oreboilwagha ni kilimo loli loli.

¹¹Aighu ya agho, Uzia orekoghe na ijeshi ja masikari jikate wuda jiwaghilo vipughi kunughana na mtalo ghorebonyeroghe ni muandiki Jeili na Maaseia m'baa wa kazi, wikiwonyerwa ni Hanania umu wa vilongozi va wuda va mzuri.

¹²Mtalo ghose ghwa vilongozi va vinyumba va wandu, mang'oni wiwadie ndighi, ghorekoghe elfu iwi na maghana arandadu.

¹³Nawo werekoghe na ijeshi aisi yawo ja wandu elfu maghana adadu na mfungade, na maghana masanu, weredimagha kubonya wuda kwa ndighi mbaa, wikimtesia mzuri kulwa na m'maiza.

¹⁴Uzia ukaboisa ngao rose ra ijeshi, mafumu, kofia ra chuma, makoti gha chuma, ndana na magho ghekumba na vikuza.

¹⁵Ukabonya mitambo Jerusalemu, ekumba mawanu na magho mabaa; ivumbulo ni wandu wiko na wuya, na kuwikwa minarenyi na mbembenyi. Sare yake ikaera kula, angu oretesereloghe loli loli hata ukapata ndighi nyingi.

¹⁶Ela nguma rake riendachurikia, ukangilwa ni kukukasa komtotesha. Orelemeloghe ni kukaia mloli kwa BWANA, Mlungu wake, ukangia Hekalunyi ufukire marumba aighu ya madhabahu.

¹⁷Ela Azaria ukamnugha chiaimweri na wakohani wa BWANA mirongo wunyanya, mang'oni gha wandu wiwadie ndighi.

¹⁸Wikamghiria mzuri Uzia wikamzera, “Si hachi ingi kwako Uzia kumfukiria BWANA marumba. Iyo ni kazi ya wakohani, awo wana wa Haruni wiwikilo wakfu wifukireghe marumba. Fuma Andu kwa Wueli, kwamkosera BWANA Mlungu. Ndekupatagha irasimio jingi kufuma kwa BWANA.”

¹⁹Uzia ukakaia kimusi mbai na mbai ya madhabahu efukiria marumba uwadie luwigha lofukiria marumba. Ukawibonyera awo wakohani machu; nao shwa wori ukabukwa ni sima ya tughumba.

²⁰Mkohani M'baa Azaria, na wakohani wose wikamzighana; wikammbona na sima ya tughumba! Wikamkumba cha shighadi na iseghe, hata uo moni ukashashira kufuma cha shighadi, angu BWANA orekoghe wamkaba.

²¹Mzuri Uzia ukakaia useelie kwa wundu ghwa wukongo ghwake; ukakaia usengirie Hekalunyi irangi jake jose jisigharikie. Ukakaia nyumbenyi kwake usebonyagha kazi, mwana wake Jothamu ukawibonyera nguma waisanga.

²²Mabonyo mazima gha Uzia kufuma kuzoya hata kutua ghaandikilo ni mlodi Isaya mwana wa Amozi.

²³Uzia ukafwa sa weke ndee, wikamrika kaavui nawo, andenyi ya mbuwa erikia ya wazuri, angu wandu wereghambieghe, “Orekoghe na sima.” Mwana wake Jothamu ukabonya nguma wulalo ghwake.