Read TAITA BIBLE – Biblia Ilagho Jiboie Kwa Wandu Wose EZRA 1 Bible Online

EZRA 1 - TAITA BIBLE – Biblia Ilagho Jiboie Kwa Wandu Wose bible

EZRA 1

¹Mwaka ghwa imbiri ghwa kubonya nguma kwa Koreshi mzuri wa Pashia, BWANA orejikatishireghe ilagho jake ijo orejighorieghe kwa momu ghwa mlodi Jeremia. Ukam'bonya Koreshi mzuri wa Pashia, ufunye momu na kudumwa kwa maandiko andenyi ya wuzuri ghwake ghose ghupate kushomwa kwa lwaka kula andu seji inughagha,

²“Koreshi mzuri wa Pashia waghora huwu: BWANA, uo Mlungu wa mlungunyi, waninekie kubonya nguma wurumwengunyi kose, nao wanilaghirie nimuaghie Hekalu Jerusalemu, iko Juda.

³Mlungu ndekaie nenyo mmbose muko wandu wake. Ghendenyi Jerusalemu muiaghe sena Hekalu ya BWANA, Mlungu wa Israeli, uo utaswagha Jerusalemu.

⁴Mndungi wa wandu wake usigharikie wubarishonyi ukakunda wutesia ghowuya uteselo ni wambao kwa feza na dhahabu; kwa vilambo na nyamandu, chiaimweri na mafunyo ghefunya kwa wundu ghwa Hekalu ya Mlungu iko Jerusalemu.”

⁵Niko wabaa wa kichuku cha Juda na Benjamini, na wakohani, na Walawi, na kula mundu orenyavushiroghe ngolo ni Mlungu, ukakuwika nicha kujoka uendeagha Hekalu ya BWANA iko Jerusalemu.

⁶Wandu wose werekwanyeghe wikawitesia kwa vilambo va feza, na dhahabu, na vilambo, nyamandu, na manosi gha zoghori mbaa, na mafunyo kwa wundu ghwa Hekalu.

⁷Mzuri Koreshi ukawiwunjira vija vikombe na bakuli ra Hekalu ya BWANA veredwaloghe ni Mzuri Nebukadnezari kufuma Jerusalemu na kuwikwa hekalunyi kwa milungu yake.

⁸Ukavifunya ivo vilambo na kuvineka Mithredathi uo orekoghe m'baa wa mali ra wuzuri. Ukaandika mtalo ghwaro kwa wundu ghwa Sheshbaza m'baa wa Juda.

⁹Mtalo ghwaro ni ughu: Ngarai mirongo idadu ra dhahabu, ngarai elfu imweri ra feza, chuwigha refukira marumba mirongo iwi na ikenda,

¹⁰bakuli mirongo idadu ra dhahabu, bakuli maghana ana na ikumi ra feza, na vombo vizima elfu imweri;

¹¹vombo va dhahabu na va feza verekoghe elfu isanu maghana ana.