Read TAITA BIBLE – Biblia Ilagho Jiboie Kwa Wandu Wose EZRA 4 Bible Online

EZRA 4 - TAITA BIBLE – Biblia Ilagho Jiboie Kwa Wandu Wose bible

EZRA 4

¹Nao iji wamaiza wa wandu wa Juda na Benjamini weresikireghe angu wandu wiwurie kufuma wubarishonyi werekoghe wikiagha Hekalu ya BWANA, uo Mlungu wa Israeli,

²wikamchea Zerubabeli na wabaa wa kichuku chawo wikawizera, “Ndediaghe Hekalu diwose; angu dadamtasa Mlungu onyu seji koni mumtasagha, nesi dadamfunyira vizongona kwake toe kufuma ngelo ra Esarhadoni mzuri wa Ashuri uo orediredieghe aha.”

³Ela Zerubabeli, Jeshua na wabaa wa vichuku Israeli wikawizera, “Ndedine haja ya wutesia ghonyu ghoagha Hekalu ya Mlungu odu; dichaiagha diweni sa iji koni Koreshi mzuri wa Pashia oredilaghirieghe.”

⁴Niko wandu werekoghe wikakaia isangenyi wikawoka kuwibwagha ngolo wayahudi na kuwibonya wiobuo kuagha.

⁵Wikawihonga wabaa wa Serikali ya Pashia eri wibonye chia etangala wandu wa Juda wisekatishe mpango ghwawo matuku gha Koreshi mzuri wa Pashia, hata kuvikia ngelo ra Dario mzuri wa Pashia.

⁶Iji Ahasuero orezoeghe kubonya nguma, wamaiza wa wandu werekoghe wikikaia Juda na Jerusalemu wereandikieghe barua ya mashitakio aighu ya wandu wa Juda na Jerusalemu.

⁷Matuku gha kubonya nguma kwa Mzuri Artashasta wa Pashia, Bishilani, Mithredathi, Tabeeli, na wambao wikaandika barua kwa mzuri Artashasta kwa kiteto cha kiarami; ikakaia ifasirilo.

⁸Wokoni Rehumu m'baa wa isanga, na Shimshai mwandiki wa isanga, niwo wereandikieghe barua kwa mzuri Artashasta aighu ya Jerusalemu seji inughagha:

⁹“Barua kufuma kwa Rehumu m'baa wa isanga, na kufuma kwa Shimshai mwandiki, na wambao watanyi, watini wa m'baa wa isanga, wabaa wa kazi wa Kipashia, wandu wa Ereki, Wababuloni, wandu wa Susa, nawo ni Waelami,

¹⁰na wandu wazima wa iyo mbari erebarishiroghe ni Ashurbanipali mundu m'baa wa ishima, ikaghenjwa na kuwikwa mizinyi ya Samaria na andu kuzima isangenyi jiko magharibi ya Moda ghwa Eufrate.”

¹¹Na ihi niyo kopi ya barua wereidumieghe: “Kwa mzuri Artashasta, kufuma kwa wadumiki wako wandu wiko isanga ja magharibi ya Moda ghwa Eufrate.

¹²“Dakunde kumanye ee mzuri kukaia waja Wayahudi werefumieghe kwako, wikacha kodu waendie Jerusalemu, nawo waawuyaagha ghuja muzi mmbiwi ghuleghaa malagho. Waawuyaagha wurigha na kuboisa msingi.

¹³Kwa huwo kumanye ee mzuri kukaia muzi ughu ghukaaghwa, na wurigha ghwaro ghusie, wandu awa ndewichaalipa kodi na wushuru, na pesa ra wuzuri richaapungua.

¹⁴Idana kwa kukaia daawuyakaia aisi ya nguma ya mzuri, ndeifwanagha isi diwone mzuri ukisowelwa ishima, niko daduma dikumanyishe ee mzuri,

¹⁵eri kufunye momu malagho ghizighano agho ghiandikilo ni weke ndeyo vuonyi. Kukabonya huwo, kuchamanya kukaia muzi ughu ndeghorekoghe ghosikira, na seji ghusumbue wazuri na wabonyi nguma wa masanga wengi kufuma kala; kwakurie sena kuwibonyera wandu wose nguma. Iyo niyo shekeria ya muzi ughu kutoteshwa.

¹⁶Isi deko na wuloli ee mzuri kukaia muzi ughu ghukawuya ghukaaghwa, na wurigha ghwaro ghumerelo, ndekuwuyaakaia na ndighi rebonya nguma isangenyi magharibi ya Moda ghwa Eufrate.”

¹⁷Nao mzuri ukaduma matumbulio ghinughagha: “Kwa Rehumu m'baa wa isanga na Shimshai mwandiki, na wambao wikaiagha Samaria na andu kuzima isangenyi ja magharibi ya Moda ghwa Eufrate, namroghua.

¹⁸“Barua muniredie yashomelo worinyi imbiri kwapo.

¹⁹Nani nabonyere itangazo, malagho ghikalawulwa vuonyi na kuwoneka kukaia kufuma kala ugho muzi ghwadalwa na wazuri, na kubonya sheshe.

²⁰Wazuri wiwadie ndighi werekoghe wikibonya nguma aho na isangenyi jose ja magharibi ya Moda ghwa Eufrate; wikakaia wikiwada kodi, wushuru.

²¹Kwa huwo mtangaze kukaia awa wandu wighirilo kubonya iyo kazi, hata nabonya itangazo izima.

²²Lindia kusebonye iji ilagho mboa; kwaki maza ridimagha kuzama hata mzuri ungie ndengonyi?”

²³Barua ya mzuri Artashasta iendashomwa imbiri ya Rehumu na mwandiki Shimshai na wambao, wikaghenda kwa Wayahudi aja Jerusalemu shwa-shwa na kuwighiria Wayahudi kwa ndighi wiseaghe.

²⁴Kazi eagha Hekalu ya Mlungu andenyi ya Jerusalemu ikasighwa; nayo erelekeloghe hata mwaka ghwa kawi ghwa kubonya nguma kwa Dario mzuri wa Pashia.