Read TAITA BIBLE – Biblia Ilagho Jiboie Kwa Wandu Wose NEHEMIA 1 Bible Online

NEHEMIA 1 - TAITA BIBLE – Biblia Ilagho Jiboie Kwa Wandu Wose bible

NEHEMIA 1

¹Agha ni malagho ghikatishiro ni Nehemia mwana wa Hakalia. Mori ghwa Kislevu, mwaka ghwa mirongo iwi, ngelo Artashasta orebonyagha nguma Pashia, ini Nehemia nerekoghe muzi m'baa ghwa Susa.

²Mwanidu umu uwangwaghwa Hanani ukacha kufuma Juda, chiaimweri na wandu wamu. Ngawikotia malagho gha Jerusalemu na gha wayahudi awo werefufunukieghe wisebarishiro cha Babuloni.

³Nawo wikanizera kukaia, wandu wisigharikie isangenyi wisebarishiro weko na wasi na kumenywa kubaa. Wurigha ghwa Jerusalemu ghwachikanyiro, na mbenge rawo rikakorwa.

⁴Niendasikira malagho agho, ngasea kidombo na kulila. Nerelilieghe na kufunga tumu kwa matuku mengi, ngilomba Mlungu ngighamba,

⁵“Ee BWANA Mlungu wa mlungunyi, oho koko m'baa, nesi dadakuobua na ndighi. Kwadajimangisha ilaghano jako kwa awo wikundagha na kuiwadia memu yako.

⁶Kunizighane BWANA na kusikira malombi ghapo ini mdumiki wako niwilombiagha kio na dime wadumiki wako, wandu wako Israeli. Narumiria angu isi wandu wa Israeli dabonyere kaung'a. Weke wawa wapo na ini dabonyere kaung'a.

⁷Dabonyere kiwiwi nandighi aighu yako kwa kuleghabonya agho kudilaghirie. Ndedimazirie sharia rako iro koredinekieghe kwa chia ya Musa mdumiki wako.

⁸Kumbuka malagho koremlaghirieghe mdumiki wako Musa kukighamba, ‘Mkalegha kukaia waloli kwapo, nichamsaghisa aghadi ya mbari zima;

⁹ela mkaniwuria na kughiwadia malaghiro ghapo, na kughibonya hata ngera mwasaghisiro hata kutua kwa ndoenyi, nichamkwanya na kumreda andu nikusaghue nitasoghe.’

¹⁰“Awa ni wadumiki wako BWANA korewivuvueghe kwa ndighi na kudima kwako kubaa.

¹¹Degha kudu kwako kusikire malombi ghapo ini mdumiki wako na gha wadumiki wako wose wiboilwagha ni kujibonyera ishima irina jako; kunineke kusima, na ini mdumiki wako nifuilo wughoma ni m'baa wa isanga.” Ngelo iro, ni ini nerekoghe mnyoshi divei wa mzuri.