Read TAITA BIBLE – Biblia Ilagho Jiboie Kwa Wandu Wose NEHEMIA 13 Bible Online

NEHEMIA 13 - TAITA BIBLE – Biblia Ilagho Jiboie Kwa Wandu Wose bible

NEHEMIA 13

¹Ngelo chuo cha Musa cherekoghe chikishomelwa wandu kwa lwaka, weresikireghe andu kuandikilo kukaia Muamoni ungu angu M'moabu ungi jingi usengie andenyi ya ikwanyiko ja wandu wa Mlungu.

²Shekeria yaro ni angu werewiimieghe wandu wa Israeli vindo na machi iji werefumieghe Misri wikamneka Balaamu pesa uwiwasire njowe. Ela Mlungu odu ukaghalua iyo njowe iwuye marasimio.

³Nao iji wandu wa Israeli wasikira iyo sharia, ikishomwa, wikakutanya na wandu wose werekoghe wa kivalwa cha kighenyi.

⁴Mkohani Eliashibu, uo orekoghe mzighaniri wa vumba va vilambo va Hekalu, oresikiraneghe na Tobia kwa ngelo ndacha.

⁵Ukamrumiria Tobia utumie chumba kibaa, cheretumilwagha kwa kuwika mafunyo gha viro, marumba, na vombo va Hekalu, mafunyo gha wakohani, na ifungu ja ikumi ja viro, divei na mavuda, agho gherenekwagha Walawi, na wabori, na walindiri wa Hekalu.

⁶Maza iri rikibonyeka ini serekoghe Jerusalemu, angu mwaka ghwa mirongo idadu na iwi ghwa Artashasta mzuri wa Babeli niko nerewurieghe kwa mzuri. Konyuma ngapata rusa kwa mzuri,

⁷ngawuya sena Jerusalemu. Niko ngawona ugho wuwiwi Eliashibu oreghubonyereghe ghwa kumrumiria Tobia utumie chumba andenyi ya Hekalu.

⁸Ngajokwa ni machu loli-loli; ngavikumba cha shighadi vilambo vose va Tobia.

⁹Niko ngafunya momu, vumba vose vielesho kisharia, na vilambo vose va Mlungu, mafunyo gha viro, na marumba viwunjo.

¹⁰Wokoni ngakua Walawi na wabori wikimbirie kufuma Jerusalemu, na kuwuya mbuwenyi kwawo, angu wiserenekeloghe vindo va kuwikata.

¹¹Ngararashana na wabaa kwa wundu ghoisigha Hekalu. Ngawiwunja Walawi na wabori Hekalunyi, na kuwiwunja kazinyi kwawo.

¹²Niko wandu wose wa Juda wikazoya kureda ifungu ja ikumi ja viro, divei na mavuda andenyi ya vumba va Hekalu.

¹³Ngawika wandu winughagha wikaie wazighaniri wa stoo rewika vilambo: mkohani Shelemia, mwalimu wa Sharia Zadoku, na Mlawi uwangwaghwa Pedaia; na mtesia wawo ukakaia Hanani mwana wa Zakuri, wawae Matania, angu neremanyireghe werekoghe waloli, na kazi yawo erekoghe kuwiwaghia waruna vindo.

¹⁴Kunikumbuke ee Mlungu wapo, aighu ya maza iri kughitale mabonyo ghapo mecha nighibonyere kwa wundu ghwa Hekalu ya Mlungu wapo na kwa wundu ghwa wutasi ghwako.

¹⁵Matuku ghaja nerewonieghe wandu andenyi ya Juda wikikama zabibu ituku ja Sabato; wikareda kitungu cha viro na kuvidukishira weke punda, na divei, zabibu, tini na misigo ya kula mbari wikaireda Jerusalemu ituku ja Sabato ngawikania wandu wiseuzeghe vindo ituku ijo.

¹⁶Wandu wa Tiro wokoni awa werekoghe wikikaia Jerusalemu wereredieghe samaki na vilambo vizima va kula mbari na kuviuzira wandu wa Juda na Jerusalemu ituku ja Sabato.

¹⁷Niko ngarashana na vilongozi va Wayahudi ngawizera, “Ni wuwiwiki ughu m'bonyagha ghwa kuilusha Sabato?

¹⁸Niko koni weke ndeyo werebonyereghe huwo, na Mlungu odu ukadiredia mawiwi ghose aighu yedu na ughu muzi. Nenyo mwaduagha mkiwiredia Waisraeli agho machu gha Mlungu ghibirie kwa kuilusha Sabato.”

¹⁹Nao iji ndoe yalighisa kuswa, ngafunya momu minyango ya mbenge ra Jerusalemu irugho imbiri Sabato isezoe, ngalaghira angu iserughulo, hata Sabato iide. Ngawika wadumiki wamu wapo mbengenyi, eri msigo ghungi ghusengiro nandenyi ituku ja Sabato.

²⁰Na washami, awo wiuzagha vilambo va kula mbari, wikalala shighadi ya Jerusalemu kio kilazi angu viwi huwu.

²¹Ela ngawionya ngiwizera, “Kwaki mlalagha kaavui na wurigha? Mkabonya huwo sena nimmbwada.” Kufuma ngelo rija ndewichecha sena ituku ja Sabato.

²²Ngawilaghira Walawi wikueleshe weni, wichelindia mbenge, wipate kukaia na loli ituku ja Sabato jawikwa jielie. Kunikumbuke kwa wundu ghwa agha wori ee Mlungu wapo, na kuniwika nicha karakara na wubaa ghwa lukundo lwako lukatie.

²³Wokoni ngelo ija nerewonieghe kukaia Wayahudi wengi werelowueghe waka wa Ashdodi, Amoni, na Moabu,

²⁴na nusu ya wana wawo werekoghe wikideda kiteto cha Ashdodi angu kizima; wikadalemwa ni kudeda kiteto cha mzedu.

²⁵Ngawirasha na kuwiwasira njowe; ngakaba wamu wawo na kuwikokota maridia ghawo; nao ngawighemesha kwa irina ja Mlungu ngighamba, “Msakeloworana na waghenyi angu inyo mmbeni kulowua waka wa mzawo.

²⁶Mzuri Solomoni odeshekerelwa kungia kaung'enyi ni waka wa kighenyi. Ndekuwadie mzuri ungi aghadi ya mbari ra wandu orekoghe sa uo. Mlungu oremkundeghe, ukam'bonya ukaie mzuri wa Israeli yose; ela sena waka wa kighenyi wikamshekeria kubonya kaung'a.

²⁷Da dianugha mfwano ghonyu dileghe kumsikira Mlungu odu kwa kulowua waka wa kighenyi?”

²⁸Joiada orekoghe mwana wa Mkohani m'baa Eliashibu ela mwana umu wa Joiada oremlowueghe mwai wa Sanbalati, kufuma muzi ghwa Beth-horoni, kwa huwo ngammbinga ufume Jerusalemu.

²⁹Kumbuka ee Mlungu wapo seji awa wandu wailusha kazi ya wukohani na ilaghano ja wukohani na Walawi.

³⁰Kwa chia ihi nerewieleshereghe wandu kufuma kula ilagho ja kighenyi; ngawika kazi kwa wakohani, na Walawi kula umu kwa kazi yake.

³¹Ngaboisa mipango ereda mafunyo gha mbande kwa ngelo yaro na mafunyo gha matunda gha imbiri. Kunikumbuke na kunibonyera mecha ee Mlungu wapo.