Read TAITA BIBLE – Biblia Ilagho Jiboie Kwa Wandu Wose NEHEMIA 8 Bible Online

NEHEMIA 8 - TAITA BIBLE – Biblia Ilagho Jiboie Kwa Wandu Wose bible

NEHEMIA 8

¹Ituku ja imbiri ja ugho mori, wandu wose wikakwanyika Jerusalemu andenyi wazenyi ya Mbenge ya Machi. Wikamkotia Ezra mkohani na mwalimu wa Sharia iyo BWANA orewinekieghe Israeli kwa mkonu ghwa Musa, urede icho chuo.

²Iko aho ituku ja imbiri ja mori ghwa mfungade, mkohani Ezra ukareda icho chuo cha Sharia imbiri ya ikwanyiko ja womi na waka, na wose weredimieghe kusikira na kutambukilwa.

³Nao ukaishoma sharia ahoeni wazenyi kaavui na Mbenge ya Machi kufuma nakesho hata dime ghadi, womi na waka na wose widimagha kutambukilwa wiko aeni. Wandu wose wikadegha madu kusikira malagho gha chuo cha Sharia.

⁴Ezra orekaieghe aighu ya kiwayo cha midi werechibonyereghe kwa wundu ghwa ilagho ijo. Orekwanyeghe na Matithia, Shema, Anaia, Uria, Hilkia, na Maaseria wiko kimusi chia ya mkonu ghwake ghwa kiwomi; Pedaia, Mishaeli, Malkija, Hashumu, Hashbadana, Zakaria na Meshulamu werekoghe chia ya mkoonu ghwake ghwa kiwaka.

⁵Ezra ukachikuchua chuo wandu wose wikiwona, angu orekoghe andu kuko ighu kuchumba wandu wose; hata iji wachikuchua, wandu wose wikawuka kimusi.

⁶Nao Ezra ukaghamba, “BWANA, uo Mlungu m'baa ndekaso!” Wandu wose wikarumiria “Amen! Amen!” wikiwusira mikonu yawo; wikadunga ngokoro wikatasa wikikughoghomesha, na mawushu ghawo ghikadunga andonyi.

⁷Niko wikawuka na kukaia andu koni werekoghe, na Walawi winughagha wikawitesia kuelelwa ni Sharia: Jeshua, na Bani, na Sherebia, na Jamini, na Akubu, na Shabethai, na Hodia, na Maaseia, na Lekita, na Azaria, na Joisabadi, na Hanani na Pelia.

⁸Wikashoma chuo cha Sharia ya Mlungu na kuwonyera kutambua kwaro,[2] hata wandu wikatambukilwa ni ishomo.

⁹Nao iji wandu wasikira malagho gha Sharia, wikawoka kulila. Ela Nehemia uo orekoghe m'baa wa isanga, na Ezra mkohani na mwalimu wa sharia, na Walawi awo werekoghe wikifasiri sharia, wikawizera wandu wose, “Idime ni ituku jielie kwa BWANA Mlungu onyu, msekaie na wasi hata kulila.

¹⁰Ghendenyi mzinyi muje manori, munyo divei isingie; na uo usewadie kindo chingi mumdumie vimu angu idime ni ituku jielie kwa BWANA odu; msekaie na wasi; kwa kukaia kuboilwa uko BWANA umnekagha kucham'bonya mkaie na ndighi.”

¹¹Kwa huwo Walawi wikawinyamirisha wandu wose wikighamba, “Nyamenyi, angu idime ni ituku jielie, mseke na wasi.”

¹²Niko wandu wose wikaghenda chia rawo, wipate kuja na kunywa, na kuwidumia wambao vindo vimu na kukaia na kuboilwa kubaa, kwa kukaia weretambukiloghe ni malagho wereghoreloghe.

¹³Ituku ja kawi, wabaa wa vichuku vose chiaimweri na wakohani na Walawi, wikamchea Ezra uo mwalimu wa Sharia wipate kukufundisha Sharia.

¹⁴Wikawona malagho ghiandikilo sharienyi kukaia BWANA oremlaghirieghe Musa kukaia wandu wa Israeli wikaie viwandenyi ngelo ya ituku ibaa ja Ndima ya Viwanda.

¹⁵Niko wikaeresha malagho agho mizinyi kwawo kose, na Jerusalemu, “Ghendenyi mighondinyi mrede masawi gha mizeituni na mizeituni ya isakenyi, na mitende na midi iko na malemba, m'bonye viwanda seji iandikilo sharienyi.”

¹⁶Niko wandu wikaghenda na kughireda; wikakuaghia viwanda kula mundu aighu nyumbenyi kwake, na wazenyi, na waza ya hekalu, na waza ya wandu wose kaavui na andu kuwangwaghwa Mbenge ya Machi, na wazenyi kwa Mbenge ya Efraimu.

¹⁷Wandu wose werewurieghe kufuma wubarishonyi wikaagha viwanda na kukaia andenyi; angu kufuma ngelo ra Jeshua mwana wa Nuni hata ituku ijo, wandu wa Israeli ndewerekoghe wabonya huwo. Kukakaia kuboilwa kubaa.

¹⁸Na kufuma ituku ja imbiri ja ndima hata ituku ja kutua, Ezra orekoghe ukishoma chuo cha Sharia ya Mlungu ituku ituku. Werebonyreghe ndima kwa matuku fungade, na ituku ja wunyanya korekoghe na ikwanyiko ibaa jefunga kunughana na mafundisho gha Sharia.