Read TAITA BIBLE – Biblia Ilagho Jiboie Kwa Wandu Wose NEHEMIA 9 Bible Online

NEHEMIA 9 - TAITA BIBLE – Biblia Ilagho Jiboie Kwa Wandu Wose bible

NEHEMIA 9

¹Ituku ja mori mirongo iwi na inya ja ugho mori ghoni, wandu wa Israeli wikakwanyika kufunga tumu kwa wundu ghwa kaung'a rawo. Wikakudunga teri vongonyi kwawo, na kurwa nguwo ra magunia kuwonyera wasi.

²Niko Waisraeli wikakutanya na wandu wa kighenyi wose; wikawuka na kurirumiria kaung'a rawo, na makosa gha weke ndee.

³Wikakaia kimusi andu koni werekoghe na kushoma chuo cha Sharia ya Mlungu wawo kwa masaa adadu, na kwa masaa ghamu adadu, werekoghe wikirumiria na kumtasa Mlungu wawo.

⁴Korekoghe na kiwayo kwa wundu ghwa Walawi. Jeshua ukakaia kimusi aighu yaro, chiaimweri na Buni, Kadmieli Shabania, Buni, Sherebia, Buni, na Kenani. Wikamlomba BWANA Mlungu wawo kwa lwaka lubaa.

⁵Walawi winughagha wikawanga wandu wichemtasa Mlungu: Jeshua, Kadmieli, Bani, Hashabneia, Sherebia, Hodia, na Shebania, na Pethaya, wikighamba, “Wukenyi mumkase BWANA Mlungu onyu; mkasenyi kwa kala na kala! Kula mundu ndejikase irina jake ja wubaa, hata ngera ndeidimikagha mdamu umkase kwa kukata.”

⁶Niko wandu wa Israeli wikalomba huwu: “Oho BWANA, ni oho kuekeri kuko BWANA; korebonyereghe ndoe na bahari na vose viko andenyi yaro; kukawineka wose irangi. Ijeshi jose ja mlungunyi jaghoghoma kukutasa oho.

⁷Oho BWANA Mlungu, koremsaghueghe Abramu; kukamlongoza ufume isanga ja Uru jiko Babuloni; kukaghalusa irina jake jikaie Abrahamu.

⁸Koremmbonieghe kukaia mloli kwako, kukam'bonyera ilaghano. Koremlaghirieghe kumneka isanga ja Wakanaani, na isanga ja Wahiti na Waamori; isanga ja Waperizi na ja Wajebusi, na Wagirgashi, jikaie isanga jichaakailwa ni kivalwa chake. Kukakatisha ilaghiro jako angu korekoghe mloli.

⁹“Korewonieghe seji weke aba werejieghe wasi Misri; kukasikira kililo chawo aho Bahari ya Shamu.

¹⁰Korewonyereghe weke mwakilimbiti na mashiniko kwa mzuri na wadumiki wake wose, na wandu wose wa isanga jake, angu koremanyireghe seji wiwikorongie wandu wako. Kukakubonyera kumoni irina, sa iji koni jiko idime.

¹¹Korebonyereghe chia kwa wandu wako aghadi ya bahari; kukawilongoza wikaida aighu ya ndoe iomie. Awo werewinughagha wikamilika andenyi ya machi mengi, karakara na igho jakumbwa baharinyi.

¹²Korewilongozereghe kwa nguro ya iwingu nadime, na kwa nguro ya modo nakio kukawilangalishira mwengere.

¹³Koreserieghe kufuma mlungunyi aighu ya Mghondi ghwa Sinai; kukaghora na wandu wako kufuma mlungunyi; kukawineka Sharia ndicha, na mafundisho gha loli.

¹⁴Kukawifundisha kuitala Sabato yako kukaia ya wueli, kukawineka sharia rako kwa mkonu ghwa Musa mdumiki wako.

¹⁵“Korewinekieghe vindo kufuma mlungunyi iji werekoghe njala; kukawifunyira machi ighonyi iji werekoghe kau. Kukawizera wijiwuse isanga korewilaghirieghe kuchawineka.

¹⁶Ela weke aba wikang'eta na kukukasa, wikalegha kusikira malaghiro ghako.

¹⁷Wereleghieghe kusikira; wikaliwa agho ghose kuwibonyere; wikaliwa awo weke mwakilimbiti korewibonyereghe; wikakusaghuya kilongozi owiwunja Misri kwa lukaso lwawo, wipate kuwuya wuzumbenyi. Ela oho ko Mlungu wa wughoma, kuchuagha mvono na lukundo, kusebonyagha machu shwa-shwa. Wughoma ghwako ni m'baa, hata ndekorewileghieghe anduangi.

¹⁸Werekubonyereghe weni mlimu ghufwanane na ngache; wikaghamba wei uo nuo mlungu wawo uwifunyire isanga ja Misri. Werekuvavirieghe na ndighi BWANA.

¹⁹Ela oho, kwa wundu ghwa wughoma ghwako m'baa, ndekorewisighieghe kireti. Ndekoreiinjireghe ija nguro ya iwingu erewighenjereghe chienyi nadime, hata iyo nguro ya modo erewilongozagha na kuwineka mwengere nakio.

²⁰Korewinekieghe Roho wako mucha owifundisha; korewinekieghe mana na machi ghenywa.

²¹Korewinekieghe kula kilambo kwa miaka mirongo ina nguwo rawo ndererefueghe, hata maghu ghawo ndegherevimbieghe anduangi,

²²“Korewibonyereghe wisime mawuzuri gha iro mbari, agho masanga ghiko mwano na isanga jawo. Werewadieghe isanga ja Heshboni andu Sihoni orekoghe mzuri, na isanga ja Bashani andu Ogu orekoghe mzuri.

²³Korewinekieghe kivalwa kingi sa nyerinyeri ra mlungunyi. Kukawibonya wijikaie isanga korewilaghirieghe weke ndee kukaia wichajipata.

²⁴Werejiwadieghe isanga ja Kanaani; kukawisima wandu werekaiagha andenyi yaro. Kukawineka wandu wako ndighi rewibonya Wakanaani na wazuri wawo seji wikunde.

²⁵Wandu wako wikawada mizi iko na ngome, na isanga jinorie; Wikawada nyumba richue vilambo vose viboie, viriwa vikotero, mbuwa ra mizabibu, mbuwa ra mizeituni, na midi ya matunda kwa wungi. Kwa huwo wikaja, wikaghuda, na kubanda; wikaboilwanya na wucha ghwako m'baa korewinekieghe.

²⁶“Ela hata huwo saki, wandu wako wikalegha kukusikira; wikaighalukia sharia yako nambai. Wikawibwagha walodi awo werewiwonyereghe, wikiwighoria wikughalukie oho. Wikakumenya oho ngelo kwa ngelo.

²⁷Niko kukawibonya wisimo ni wamaiza wawo na kuwibonyera nguma, wikakuwanga wiko andenyi ya wasi ghwawo, na oho kukawitumbulia kuko mlungunyi, kwa wughoma ghwako m'baa kukawineka vilongozi, wikawivuvua kufuma kwa wamaiza wawo sena.

²⁸Ela nyuma ya kupata kuhora, wikakubonyera kaung'a sena, kukawisigha wikabo ni wamaiza wawo sena. Ela sena iji weherieghe na kukulomba kuwikire, koresikireghe aho mlungunyi, na ngelo kwa ngelo kukawivuvua kwa wundu ghwa ugho wughoma ghwako m'baa.

²⁹Korewiwonyereghe wisikire mafundisho ghako, ela wikalegha kuwadia Sharia rako kwa lung'eto, hata ngera kuja kuisikira Sharia yako ni irangi, ela wereleghieghe kusikira, wikaghilika na kukurisha singo rawo.

³⁰Korerumaghianyegha nawo mwaka kwa mwaka, kukawifuria walodi wako wiwiwonyere, ela wandu wako wikariwa madu, na oho kukawisigha wisimo ni wamaiza wawo.

³¹Ela sena, kwa kukaia wughoma ghwako ghuko m'baa, ndekorewileghieghe hata kuwitotesha; oho ko Mlungu wa mvono na wa wughoma mungi.

³²“Na idana ee Mlungu odu, koko m'baa na wa kudima! Kwadakatisha ilaghano jako kwa wuloli. Kufuma wazuri wa Ashuru wazoya kudikoronga, hata idana, kwawona datiririlo saki! Wadijishire wasi isi, na wazuri wedu na wabaa wedu, na wakohani wedu, na walodi wedu weke aba wedu na wandu wedu wose datiririlo. Kumbuka seji ditiririlo!

³³Korekoghe na hachi edikaba; korekoghe mloli hata ngera isi dabonyere kaung'a.

³⁴Wazuri wedu, na wabaa wedu, na wakohani wedu na weke aba, ndewiiwadie Sharia yako. Ndeweresikireghe malaghiro ghako korewinekieghe.

³⁵Werebonyereghe nguma aighu ya wandu wako kwa irasimio jako; wikakaia andenyi ya isanga ibaa jinorie korewinekieghe, ela wikalemwa ni kusigha kaung'a na kukughalukia oho.

³⁶Zighana idana dakaia wazumba andenyi ya isanga kudinekie; isanga jinorie jidinekagha vindo.

³⁷Mavalo gharo mengi ghaawuyaghenjwa kwa wazuri kuwiwikia widibonyere nguma kwa wundu ghwa kaung'a redu. Waawuyabonya seji wikunde aighu yedu, na mfugho redu, nesi deko na wasi m'baa.”

³⁸Kwa wundu ghwa agha ghose ghibonyekie, isi wandu wa Israeli dabonya ilaghano ja loli kwa maandiko, na wabaa wedu, Walawi na Wakohani wajirumiria kwa kujikaba mhuri ghwawo.