Read TAITA BIBLE – Biblia Ilagho Jiboie Kwa Wandu Wose ESTA 1 Bible Online

ESTA 1 - TAITA BIBLE – Biblia Ilagho Jiboie Kwa Wandu Wose bible

ESTA 1

¹Matuku mzuri Ahasuero orekoghe ukibonya nguma, oreghibonyereghe nguma masanga ighana na mirongo iwi na mfungade; kufuma India hata Kushi.

²Matuku ghaja, kifumbi chake cha nguma chedeeka Susa, nagho nigho muzi m'baa ghwa Pashia.

³Nao mwaka ghwa kadadu ghwa kubonya nguma kwake, mzuri Ahasuero orewibonyereghe karamu vilongozi na wadumiki wa serikali yake. Majeshi gha Pashia na Media wori gherekoghe, chiaimweri na wabaa wa masanga na wandu wabaa wa ishima.

⁴Kwa meri irandadu, Ahasuero orekoghe ukiwonyera wungi ghwa mali ra wuzuri ghwake, na wubaa ghwa nguma rake.

⁵Nyuma ya ngelo iyo, mzuri ukawibonyera karamu wandu wose wa muzi ghwake m'baa ghwa Susa, wiko na mali, na wakiwa wori. Karamu iyo ya matuku mfungade, erekoghe ikibonyerwa wazenyi andenyi ya ngome ya mzuri.

⁶Korekoghe na wurigha ghupambilo kwa vitambaa va buluu na va chokwa sa pamba, na kamba raro ra zambarau rerebonyeroghe kwa kitani ndicha, naro rikafungwa kwa koleo ra feza rikabirilo nguronyi ra magho ghiboie. Makochi gha dhahabu na gha feza gherewikiloghe barazenyi iko na sakafu ya magho ghiboie gha rangi zima-zima gha zoghori mbaa.

⁷Wandu werekoghe wikinywa na vikombe va dhahabu, chingi chisefwanane na mmbao, na mzuri orekoghe ukiwineka wandu wake divei ya kiwuzuri kwa ishima ibaa.

⁸Kula mundu ukanywa seji orekundieghe, kunughana na malaghiro gha mzuri; kukaia, kula mundu unyo seji orekundieghe.[1]

⁹Malkia Vashti wori orewibonyereghe waka wambao karamu andenyi ya ngome ya Ahasuero.

¹⁰Ituku ja mfungade ja iyo karamu jiendavika, mzuri Ahasuero orekoghe na kuboilwa kubaa kwa wundu ghwa ija divei orenyueghe; ukawiwanga Mehumani, Biztha, Harbona, Bigtha, Abagatha, Zethari, na Karkasi, weke kolowi mfungade werekoghe wikimdumikia uo moni uekeri.

¹¹Ukawilaghira wimrede Malkia Vashti kwake, wameria kurwa kirumbu cha kiwuzuri. Malkia Vashti orekoghe ughokie nandighi, kwa huwu mzuri ukakunda kuwiwonyera waghenyi wake na vilongozi seji Malkia ughokie.

¹²Awo weke kolowi wikaghenda na kumghoria Malkia Vashti seji mzuri wafunya momu; ela uo ukalegha kughenda. Nao mzuri ukawawa ni ngolo na kujokwa ni machu loli-loli.

¹³Mzuri orekoghe wakuzaisira kukaia na njama na wandu wake wa hikima, awo wimanyagha vimu na sharia ya isanga. Niko ukawiwanga wifunye maghesho ghawo.

¹⁴Wanjama wake wa matuku ghose werekoghe Karshena, Shethari, Admatha, Tarshishi, Meresi, Marsena, na Memukani; vilongozi mfungade va Pashia na Media, wiko na daraja ra ighu kwa wuzuri ghwake.

¹⁵Nao ukawizera, “Kunughana na sharia, mwawona uhu Malkia Vashti ubonywa wada? Kwa kukaia namdumia weke kolowi, ela ukalegha kubonya seji ini mzuri Ahasuero namzera.”

¹⁶Niko Memukani ukaghamba mzuri na vilongozi vake viko aeni, “Malkia Vashti ndemkosere mzuri uekeri, ela wawikosera vilongozi na wandu wose wa masanga gha mzuri Ahasuero.

¹⁷Ilagho wajibonya Malkia Vashti, jichamanyika kwa waka wose, nawo wichakaia wikiwimenya womi wawo wikighamba, ‘Mzuri Ahasuero oremmbangieghe Malkia Vashti uche kwake, ukalegha kucha.’

¹⁸“Linu koni, waka wose wa wabaa wa Pashia na Media awo wasikira malagho gha Malkia Vashti, wichawighoria womi wawo, na waka wose isangenyi wichawisowia ishima womi wawo, na womi wichakaia na machu kwa waka wawo.

¹⁹Idana iji kwakunda ee mzuri, kufunye momu Malkia Vashti useche kwako sena. Momu ugho ghuandiko kuinugha sharia ya Pashia na Media iseghalukagha, na ughu wumalkia kumneka muka mzima ufwanagha.

²⁰Iji momu ugho ghwaereshwa andenyi ya ughu wuzuri ghwako ghuko m'baa nandighi, waka wose wichakufundisha kuwineka womi wawo ishima, wikaiagha ni wabaa angu watini.”

²¹Ilagho ijo jikam'boia mzuri na vilongozi vake; ukabonya sa iji koni Memukani oreghorieghe.

²²Nao mzuri ukafunya barua kwa kula isanga, kunughana na mbari na viteto kwa mwandiko ghwaro ukighamba kukaia, kula mndwawomi uibonyere nguma nyumba yake, na agho ghose ughoragha nigho gheni gha kutua.