Read TAITA BIBLE – Biblia Ilagho Jiboie Kwa Wandu Wose ESTA 4 Bible Online

ESTA 4 - TAITA BIBLE – Biblia Ilagho Jiboie Kwa Wandu Wose bible

ESTA 4

¹Nao iji Mordekai warimanya iro maza, ukarashua nguwo rake, ukarwa nguwo ya igunia na kukudunga ivu. Ukaida ghadi na ghadi ya muzi ukilila kwa lwaka na kuwawa kubaa.

²Ukaghenda hata mbengenyi ya ngome kwa mzuri, ela nderengirieghe andenyi anduangi, kwa kukaia mndungi ndererumiriloghe kungia andenyi ya ngome urwae nguwo ya igunia.

³Itangazo ja mzuri jiendamanyika masanga ghose, chikakaia kililo kibaa kwa Wayahudi wose. Wose wikalila wikisirimika, wikafunga tumu, wikilila na kukema mchungu, na wengi wawo wikirwa nguwo ra magunia na kulala maivunyi.

⁴Nao iji wai wa kazi wa weke kolowi wa Esta wamghoria malagho gha Mordekai, malkia Esta ukangilwa ni wasi m'baa. Ukamdumia Mordekai nguwo upate kurwa wulalo ghwa iyo nguwo ya igunia, ela Mordekai ukarilegha.

⁵Ukammbanga Hathaki, umu wa weke kolowi wa mzuri, oresaghuloghe ni mzuri, umdumikieghe Esta; ukamduma kwa Mordekai upate kumanya wasi ghwa Mordekai na sababu yaro.

⁶Hathaki ukaghenda kwa Mordekai shighadinyi imbiri ya mbenge ya ngome ya mzuri.

⁷Nao Mordekai ukamghoria ghose ghimpatire, na mtalo ghwa pesa Hamani ulaghirie kulipa kwa bengi ya mzuri, eri Wayahudi wose wibwagho.

⁸Ukamneka Hathaki kopi imu ya rija barua ra itangazo jifunyiro muzi ghwa Susa, kwa wundu ghwa kumerelwa kwa Wayahudi. Sena ukamlomba angu umghorie Esta maza rose, eri upate kughenda kwa mzuri kumlomba na kumvoya uwifuye wughoma wandu wake.

⁹Nao Hathaki ukabonya wokoni.

¹⁰Niko Esta ukamduma Hathaki kwa Mordekai na malagho agha:

¹¹“Mndungi, ukaiagha wa womi angu wa waka, ukangia waza ya ndenyi ya ngome kummbona mzuri kuseko na rusa yake, suti ubwagho; iyo ni sharia imanyikie isangenyi kose kwa wadumiki wa mzuri, na wandu wose. Eko chiaimweri tu ekia kwa mundu wangia, nayo ni mzuri kumghoruya ugho mzata ghwake ghwa dhahabu, niko aho uchaakia. Hata ini moni, nameria mori mlazi kufuma mzuri waniwanga kwake.”

¹²Nao iji Mordekai waghorelwa malagho gha Esta,

¹³ukamdumia malagho ghemuonya ukighamba, “Kusakeghesha wei oho kuchakaia banana kuchumba Wayahudi wose wazima kwa wundu ghwa kukaia kwako andenyi ya ngome ya mzuri.

¹⁴Kukanyama kima ngelo ihi, wutesia ghuchawichea Wayahudi kwa chia zima, nawo wichakia, ela oho kuchafwa na kichuku cha ndeyo chichasia. Elaima, nani umanyagha kewada ni kwa wundu ughu niko kukabonywa kukaia malkia!”

¹⁵Nao Esta ukamdumia Mordekai malagho agha:

¹⁶“Ghenda kuwikwanye Wayahudi wose wiko Susa, wikufunye kufunga tumu na kulomba kwa wundu ghwapo, mseje hata kunywa kindo chingi kwa matuku adadu na vio varo. Wai wapo wa kazi chiaimweri nani dichabonya wokoni. Konyuma nichaghenda kwa mzuri hata ngera sharia yaleghie. Ikakaia ni kufwa, nifo.”

¹⁷Nao Mordekai ukafuma ukabonya wokoni sa iji Esta oremlaghirieghe.