Read TAITA BIBLE – Biblia Ilagho Jiboie Kwa Wandu Wose ESTA 5 Bible Online

ESTA 5 - TAITA BIBLE – Biblia Ilagho Jiboie Kwa Wandu Wose bible

ESTA 5

¹Nao ituku ja kadadu ja kufunga tumu, Esta ukarwa marwao ghake gha kiwuzuri na kungia waza ya ndenyi ya ngome, kulangaya baraza ya mzuri. Mzuri orekoghe andenyi wasea kidombo kifumbinyi chake cha nguma, kulangaya mnyango ghwa ngome.

²Nao iji mzuri wammbona Malkia Esta uko kimusi wazenyi, ukamrumiria, ukamghoruya mzata ghwake ghwa dhahabu ghorekoghe mkonunyi kwake. Esta ukasoghoda na kuadada mudo ghwa ugho mzata.

³Nao ahoeni mzuri ukamkotia, “Ni wada Malkia Esta? Ilombi jako niki? Hata ngera ni nusu ya wuzuri ghwapo nichakuneka.”

⁴Nao Esta ukamtumbulia, “Iji kwawona nicha ee mzuri, nichaboilwa kukukaribisha oho na Hamani kwa vindo va nakenyi, nichaaviboisa kwa wundu ghwako.”

⁵Nao mzuri ukamdumiria Hamani uche shwa, eri wibonye sa iji Esta wawilomba. Mzuri na Hamani wikaghenda kuja vindo vereboisiroghe ni Esta.

⁶Hata iji werekoghe wikinywa divei, mzuri ukamkotia Esta, “Niki kukunde? Na oho kuchabonyerwa. Ilombi jako niki? Hata ngera ni nusu ya wuzuri kuchanekwa.”

⁷Ela Esta ukamtumbulia, “Ilombi japo ni iji:

⁸Ikakaia kwanirumiria ee Mzuri, na iji kwakunda kunikatishira malombi ghapo, nakulomba sena oho na Hamani muche kwa vindo va nakenyi nichaam'boisira kesho. Ngelo iyo niko nichaakumanyisha ichi nikunde.”

⁹Hamani ukafuma aho karamunyi uko na kuboilwa na iseko ngolonyi kwake. Ela iji wammbona Mordekai mnyangonyi ghwa ngome, usemmbukiagha kimusi, hata kumsughusikia, ukachulwa ni machu aighu yake.

¹⁰Ela ukakuwadia ukaghenda nyumbenyi kwake. Nao iji wavika ukawidumiria waghenyi wake wiche nyumbenyi kwake, ukamlomba mkake Zereshi ukaie andwamweri nawo.

¹¹Nao ukawija malagho ukikukasa na wungi ghwa mali rake, wana uko nawo, na ishima unekelo ni mzuri kwa kumneka daraja mbaa kuchumba vilongozi na wadumiki wose wa mzuri.

¹²Hamani ukachuria kughamba, “Hata na Malkia Esta nderemkaribishireghe mndungi kwa vindo va nakenyi, ela ini na mzuri basi. Hata kesho wori wanikaribisha ini na mzuri.

¹³Elaima, agha ghose ghinifwanaki, ikakaia nichakaia ngimmbona uja Myahudi Mordekai mnyangonyi ghwa ngome?”

¹⁴Nao muka wake Zereshi na waghenyi wake, ukamneka agha maghesho: “Wele uo mundu ndabonyerwagha mudi ghuko na wulacha ghwa meta mrongo iwi na iwi, nao kesho kughore na mzuri Mordekai ubwagho kwa kuwanikwa aighu yaro? Niko aho kuchaangia karamunyi na mzuri kuko na kuboilwa.” Hamani ukaboilwa ni agho maghesho, ukaghuboisa ugho mudi ghobwaghia wandu.