Read TAITA BIBLE – Biblia Ilagho Jiboie Kwa Wandu Wose ESTA 6 Bible Online

ESTA 6 - TAITA BIBLE – Biblia Ilagho Jiboie Kwa Wandu Wose bible

ESTA 6

¹Nao kio chija cheni, mzuri ukasowa dilo, ukafunya momu ushomelo chuo cha wukumbuso ghwa maza ra wuzuri ghwake.

²Andenyi ya chuo icho, korekoghe na malagho gha Mordekai, seji oremanyireghe na kughora ija njama em'bwagha mzuri, erebonyeroghe ni Bigthana na Tereshi, awo werekoghe weke kolowi welindia vumba va mzuri.

³Nao mzuri ukakotia, “Welee, ni ishimaki dim'bonyere Mordekai? Angu damnekieki kwa wundu ghwa ibonyo ijo?” Wadumiki wake wikatumbulia, “Ndebonyero ilagho jingi.”

⁴Mzuri ukawikotia, “Nani uko wazenyi?” Nao ngelo iyo cheni, Hamani orekoghe wangia waza ya shighadi ya ngome, kwendamlomba mzuri Mordekai ubwagho kwa ghuja mudi ghobwaghia, wameria kughubonya na kughuwika tayari.

⁵Nao wadumiki wikatumbulia, “Hamani nuo uko wazenyi wacha kuwona.” Mzuri ukawizera, “Mzerenyi ungie.”

⁶Nao iji Hamani wangia, mzuri ukamkotia, “Kuwona wada, nim'bonyereki uo mundu nikunde kumneka ishima?” Hamani ukaririkanya ngolonyi kwake, “Nani uo mzuri wawuyakunda kumneka ishima nandighi huwu? Ngera si ini moni?”

⁷Nao Hamani ukamtumbulia mzuri, “Uo mundu mzuri ukunde kum'bonyera ishima,

⁸nderedelo marwao gha kiwuzuri agho ghirwalagha ni mzuri moni. Na farasi ijokwagha ni mzuri, iyo irushiro kirumbu cha kiwuzuri chongonyi kwake.

⁹Agho marwao na farasi kumneke umu wa vilongozi varo unekelo ishima, upate kumrusha uo mundu, na ukameria kumjosa aighu ya iyo farasi, umghenje mundu uo kiwachenyi cha muzi ukitangaza, ‘Huwu niko ubonyerwagha uo mundu mzuri ukundagha kumneka ishima.’”

¹⁰Nao mzuri ukamzera Hamani, “Bonya shwa-shwa kuwuse agho marwao na farasi, kum'bonyere ijo ishima uja Myahudi ukaiagha mbengenyi ya ngome. Kusesighe kum'bonyera jingi ja agho malagho ghose kwaghighora.”

¹¹Nao Hamani ukawada agho marwao ukamrusha Mordekai, sena ukamjosa aighu ya farasi, ukammarisha kiwachenyi cha muzi ukighamba, “Huwu niko ubonyerwagha uo mundu mzuri ukundagha kumneka ishima.”

¹²Nao Mordekai ukawuya mbengenyi ya ngome, na Hamani ukaghenda shwa-shwa cha nyumbenyi kwake wachifinikira chongo chake uko na wasi.

¹³Ukamghoria mkake Zereshi na waghenyi wake wose agho malagho ghampata. Niko aho waghenyi wake wa hikima na mkake Zereshi wikamzera, “Ikakaia uhu Mordekai kwazoya kulaghasha wubaa ghwako kwake ni Myahudi, ndekuchaamdima; kwa loli uchakusima.”

¹⁴Nao iji werekoghe wikija agho malagho, weke kolowi wa mzuri wikacha shwa-shwa kumuonda Hamani ughende karamunyi kwa Esta.