Read TAITA BIBLE – Biblia Ilagho Jiboie Kwa Wandu Wose ESTA 9 Bible Online

ESTA 9 - TAITA BIBLE – Biblia Ilagho Jiboie Kwa Wandu Wose bible

ESTA 9

¹Nao ituku ja ikumi na idadu ja mori ghwa ikumi na iwi, nagho nigho mori ghwa Adari, jikavika. Ijo nijo jerekoghe ituku jekatisha itangazo ja mzuri na wamaiza wa Wayahudi awo werekoghe wikisuwiria kuwisima. Ela ituku ijo jikaghaluka kukaia ja Wayahudi kuwisima wamaiza wawo, kuchumba seji awo weresuwirieghe.

²Kula isanga ja mzuri Ahasuero, Wayahudi werekuwikieghe tayari mizinyi kwawo kulwa na mundu uo ose uchaatima kulwa nawo, na wandu wose werewiobueghe, hata mndungi nderetimighe kulwa nawo anduangi.

³Vilongozi vose va isanga, machifu, Madisii, Mapisii, wikawitesia Wayahudi kwa kukaia weremuobueghe Mordekai.

⁴Mordekai ukamanyika andu kose isangenyi seji ubonyero kukaia mundu m'baa ngomenyi kwa mzuri, na seji nguma rake rawuyachurikia.

⁵Kwa huwu Wayahudi wikawikaba wamaiza wawo kwa kuwidema na chufu, na kuwitotesha; wikabonya sa iji koni werekundieghe weni.

⁶Andenyi ya muzi m'baa ghwa Susa ghuekeri, Wayahudi werewibwaghieghe wandu maghana masanu.

⁷Aghadi ya awo werebwaghiloghe, werekoghe Parshandatha, Dalfoni, Asapatha,

⁸Paratha, Adalia, Aridatha,

⁹Parmashta, Arisai, Aridai na Waizatha,

¹⁰wana wa womi ikumi wa Hamani wa Hamedatha, m'maiza wa Wayahudi. Ela ndewerewisokieghe wandu mali rawo anduangi.

¹¹Ituku ijo jeni, mzuri ukamanyishwa mtalo ghwa wandu wose werebwaghiloghe andenyi ya muzi ghwa Susa.

¹²Niko mzuri ukamzera Malkia Esta, “Andenyi ya ughu muzi m'baa ghwa Susa ghuekeri, Wayahudi wabwagha wandu maghana masanu, aghadi yawo wana wa womi ikumi wa Hamani wameria kubwaghwa. Kwamanya wabonya alinga andenyi ya masanga mazima gha mzuri! Kwakunde kii chimu sena, nacho kuchabonyerwa. Na ilombi jako jimu ni kii? Kuchakatishirwa.”

¹³Esta ukaghamba, “Iji kwawona nicha ee mzuri, kuwirumirie Wayahudi wiko Susa, kesho wibonye sa iji koni wabonya idime. Sena kufunye momu ija mimbi ikumi ya wana wa womi wa Hamani iwanikilo midinyi ebwaghia wandu.”

¹⁴Nao mzuri ukaghora agho malagho ghikatisho. Itangazo jikafunywa muzinyi ghwa Susa, na ija mimbi ikumi ya wana wa Hamani ikawanikwa.

¹⁵Ituku ja ikumi na inya ja mori ghwa Adari, Wayahudi wa Susa wikakwanyika na kuwibwagha wandu wamu maghana adadu. Ela ndewerewisokieghe wandu mali rawo anduangi.

¹⁶Wokoni Wayahudi werekoghe mizi mizima werekuwikieghe tayari kulindia marangi ghawo; nawo wikakia kufuma kwa wamaiza wawo kwa kuwibwagha wandu elfu mirongo mfungade na wasanu awo werekoghe wikizamilwa ni Wayahudi. Ela ndewerewisokieghe mali rawo anduangi.

¹⁷Jerekoghe ni ituku ja ikumi na idadu ja mori ghwa Adari. Ituku jinughie ja ikumi na inya, wikahora na kujibonya jikaie ituku ja karamu na maboilo.

¹⁸Ela Wayahudi werekoghe Susa werewikieghe ituku ja ikumi na isanu jikaie ituku ja karamu na maboilo, kwa kukaia awo werekoghe wikilwa na wamaiza wawo ituku ja ikumi na inya.

¹⁹Kwa wundu ughu Wayahudi wose wikaiagha mizi mitini mitini wadabonya karamu ituku ja ikumi na inya ja mori ghwa Adari; nawo wadaja karamu na kunekana manosi.

²⁰Nao Mordekai ukaandika agho malagho ghose; sena ukawiandikia barua Wayahudi wose kula na kaavui andenyi ya wuzuri ghwa Ahasuero.

²¹Ukawilomba angu wijibonye ituku ja ikumi na inya na ikumi na isanu ja mori ghwa Adari, kukaia matuku mabaa gha kuhora kwawo kula mwaka.

²²Kwa agho matuku, Wayahudi werekirieghe kufuma kwa wamaiza wawo; na mori ugho, niko wasi ghwawo ghoreghalusiroghe kuboilwa, na kililo chawo chikawuya ituku ibaa ja kuboilwa na kuseka. Wikalaghirwa angu kwa matuku agho wibonyeghee karamu na maboilo; kunekana manosi mecha, na kuwineka wakiwa manosi.

²³Niko Wayahudi wikanugha agho ghose werelaghiriloghe ni Mordekai; kula mwaka wikakaia wikikumbuka agho matuku.

²⁴Hamani mwana wa Hamedatha, wa kivalwa cha Agagi m'maiza wa Wayahudi, orekabieghe kura (angu Purimu) elola ituku jewibwagha na kuwitotesha Wayahudi; ukabonya njama ewimeria Wayahudi wose.

²⁵Ela Esta ukamghendia mzuri, na mzuri ukafunya momu kwa maandiko angu ija njama ya mikalo oreibonyereghe Hamani imghalukie moni; kukaia, uo na wana wake wibwagho kwa kuwanikwa aighu ya ghuja mudi ghobwaghia wandu.

²⁶Kwa wundu ughu matuku mabaa ghehora ghadawangwa Purimu kufumanya na ijo ilagho ja Puri. Kwa wundu ghwa barua ya Mordekai, chiaimweri na agho ghose gherewipatireghe,

²⁷Wayahudi wikaibonya iyo kukaia sharia kwawo; ikaie kwa kivalwa chawo, na kwa wandu wazima wose werekukwanyireghe nawo, ngelo iyo, kula mwaka kuseko na kughosha, matuku agho awi ghiwiko kukaia mabaa ghehora kunughana na malaghiro gha Mordekai.

²⁸Sena wikarumirilwa kukaia mbari yose ya Kiyahudi, kula kinyumba andenyi ya kula kivalwa, andenyi ya kula isanga na muzi, suti wikumbukeghe matuku gha Purimu na kubonya maboilo.

²⁹Niko aho Malkia Esta mwai wa Abihaili, chiaimweri na Mordekai Myahudi, wikaandika barua kwa nguma ezutiria agho ghereandikiloghe ni Mordekai kiimbiri aighu ya Purimu.

³⁰Wayahudi wose wikaghenjerwa kopi ya barua iyo, masanga ghose ighana na mirongo iwi na mfungade gha mzuri Ahasuero, iwonyeragha angu weko na wulindiri ghwa loli;

³¹kuwighoria angu awo na vivalwa vawo vose wighikumbukeghe matuku gha Purimu kwa ngelo yaro sa iji koni wikumbukagha sharia ya kufunga tumu ngelo ya wasi. Malaghiro agho gherefunyiroghe ni Mordekai, chiaimweri na Malkia Esta.

³²Momu ghwa Malkia Esta ghoremangishireghe mizango ya Purimu nagho ghukaandikwa chuonyi.