Read TAITA BIBLE – Biblia Ilagho Jiboie Kwa Wandu Wose KUFUMA 19 Bible Online

KUFUMA 19 - TAITA BIBLE – Biblia Ilagho Jiboie Kwa Wandu Wose bible

KUFUMA 19

¹Ituku ja imbiri ja mori ghwa kadadu, nyuma ya wandu wa Israeli kufuma Misri; wikacha kufuma Refidimu na kuvika kireti cha Sinai.

²Hata iji wavika aho, wikabonya kambi aisi ya ugho mghondi ghwa Sinai.

³Musa ukajoka mghondinyi kukwana na Mlungu. BWANA ukammbanga kufuma aho mghondinyi, ukighamba, “Kuwizere wandu wa kinyumba cha Jakobo, awo wandu wa Israeli huwu,

⁴‘Mwawonie seji nerewibonyereghe Wamisri, na seji koni neremdwaeghe sa iji koni indu idwagha vana vake aighu ya mawawa ghake; ngamreda aha kwapo.

⁵Idana ngera mchasikira lwaka lwapo, na kughiwadia malaghiro ghapo, mchakaia wandu wapo weni aghadi ya wandu wose, angu ndoenyi kose ni kwapo;

⁶nenyo mchakaia kwapo wuzuri ghwa wakohani, na mbari ya wueli. Agha nigho malagho kuchaawighoria wana wa Israeli.’”

⁷Musa ukasea, ukawiwanga vilongozi va wandu wa Israeli na kuwighoria maza iro rose BWANA oremlaghirieghe.

⁸Wandu wose wikamtumbulia wikighamba, “Dichabonya malagho agho ghose BWANA ughorie.” Musa ukamghoria BWANA seji wandu weretumbulieghe.

⁹BWANA ukamzera Musa, “Ola nichakuchea andenyi ya iwungu jikambie kira kudedanya na oho; wandu wipate kusikira ngidedanya na oho, nawo wikurumirie matuku ghose.” Niko Musa ukamghoria BWANA malagho gha awo wandu.

¹⁰Nao BWANA ukamzera, “Ghenda kuwizere wandu wikueleshe idime na kesho; kuwizere wioghoshe nguwo rawo,

¹¹na ituku ja kadadu wikaie tayari. Ituku ijo nichasea aighu ya mghondi ghwa Sinai mesonyi kwa wandu wose.

¹²Kubonye mwano kughumara ugho mghondi kwa wundu ghwa wandu kukighamba, ‘Mkulindie msejoke mghondinyi, hata kuadada ughu mwano; mndungi ukaghuadada ugho mghondi uchabwaghwa.

¹³Mkonu ghwa mndungi ndeghuchaamuadada uo mundu, ela uchalaswa na magho angu kulaswa na iwanu; ikaiagha ni mundu angu nyamandu, suti kubwaghwa.’ Ela tarumbeta ikabwa luma, niko wandu wichaajoka cha mghondinyi.”

¹⁴Niko Musa ukasea kufuma mghondinyi, ukawielesha wandu, nawo wikaoghosha nguwo rawo.

¹⁵Musa ukawizera, “Mkuwike tayari ituku ja kadadu; msemuadade muka.”

¹⁶Nao ituku ja kadadu luma lwa nakesho, korekoghe chukuwa na chuhehia, na iwingu jikambie kira jikacha mghondinyi; lwaka lubaa lwa tarumbeta lukasikirika, na wandu wose werekoghe kambinyi wikasughusika kwa wowa.

¹⁷Niko Musa ukawilongoza wandu shighadi ya kambi, wipate kukwana na Mlungu, wikakaia kimusi aisi ya kirimba cha mghondi.

¹⁸Mghondi ghwa Sinai ghukafinikirwa ni mosi, angu BWANA oreserieghe aighu yake andenyi ya modo; mosi ghwaro ghukajoka nokoighu sa mosi ghwa iwiwi, mghondi ghose ghukasughusika na ndighi.

¹⁹Hata iji lwaka lwa tarumbeta lorechurkieghe na ndighi; Musa ukadeda, na Mlungu ukatumbulia kwa lukuwa.

²⁰BWANA ukasea aighu ya Mghondi ghwa Sinai, ahoeni koighu mghondinyi ukammbanga Musa, na Musa ukajoka koighu.

²¹Niko BWANA ukamzera, “Sea kuwighorie wandu wiseide mwano wei wiachamzighana BWANA, na wengi wawo wichefwa.

²²Hata wakohani awa wichagha kaavui nani, suti wikueleshe, kuseko huwo, nichawikaba.”

²³Musa ukamzera BWANA, “Wandu ndewidimagha kucha aighu ya Mghondi ghwa Sinai, kwa kukaia oho kumoni kwadizerie angu dibonye mwano mbai mbai ya mghondi na kughuelesha.”

²⁴BWANA ukatumbulia, “Sea kwendemuonda Haruni mchanye aha, ela wakohani na wandu wisechumbe mwano kunichea, nichewikaba.”

²⁵Niko Musa ukasea na kuwighoria wandu agho malagho BWANA ughorie.