Read TAITA BIBLE – Biblia Ilagho Jiboie Kwa Wandu Wose KUFUMA 22 Bible Online

KUFUMA 22 - TAITA BIBLE – Biblia Ilagho Jiboie Kwa Wandu Wose bible

KUFUMA 22

¹“Mndungi ukaiwa njau angu ng'ondi, nao uibwaghe angu kuiuza; uchalipa njau isanu kwa njau imweri, na ng'ondi inya kwa ng'ondi imweri; suti ulipe icho uchiiwie. Iji usewadie kindo chingi, uchauzwa kwa wundu ghwa wutoi ghwake.

²Kitoi chikawadwa nakio chikibara nyumba, nao chikabo hata chifo, bagha yake ndeichakotelwa kwa mndungi

³ela ikakaia chaawadwa nadime, nao chibwagho, bagha yake ichakotelwa.

⁴Iji iyo nyamandu uiiwie yakulwa kwake iko moyo, ngera ni ng'ombe, punda angu ng'ondi, uchalipa mando awi.

⁵“Mundu ukalishira mbuwa angu mbuwa ya mizabibu; angu ukalekeria nyamandu ringie andenyi ya mbuwa ya mmbao, uchalipa kwa ivo viboie kufuma mbuwenyi kwake na kufuma mbuwenyi yake ya mzabibu.

⁶Mundu ukakora modo, na ugho modo ghuwade mbagha na kuchumba cha mbuwenyi kwa mmbao nao ghukore miwalwa angu viro vikuwidiro, uo mundu ughukorie uchalipa ivo viro.

⁷“Mundu ukarumiria kummbikia mmbao pesa angu vilambo, nao viiwilo nyumbenyi kwake; icho kitoi chikawadwa, chichalipa mando awi.

⁸Ela ikakaia kitoi ndechiwadilo, uo mundu wa nyumba ucharedwa nyumbenyi etasira Mlungu, na aho uchaghema kukaia ndeiwie ivo vilambo anduangi.

⁹“Mwandu ugho ghose ghwa vilambo wandu wawi wisepatanagha aighu yaro ikaiagha ng'ombe, punda, nguwo angu kilambo icho chose chilagharie; awo wandu wawuyakwanywa ni ivo vilambo, wicharedwa nyumbenyi etasira Mlungu. Uo mundu Mlungu uchamdukana kukaia mkosi, uchalipa mmbao mando awi.

¹⁰Mundu ukarumiria kuturilwa ni mmbao punda, njau, ng'ondi, angu nyamandu iyo yose, nao ifo angu kushoghonoka angu iwuso kwa ndighi isewonelo ni mndungi,

¹¹uo mundu uchaghenda andenyi ya nyumba etasira Mlungu, na kubonya ighemi angu ndemuiwie mmbao mali yake anduangi. Kwa wundu ghwa ijo ighemi, mundu wa nyamandu yake ndechaalawia mmbao anduangi.

¹²Ela ikakaia nyamandu eeiwa, uja mundu uchamlipa mmbao.

¹³Ikakaia ebwaghwa ni nyamandu ya isakenyi, uja mundu uchaireda kiarume chikaie wushuhuda, nao ndechaalipa anduangi.

¹⁴“Mundu ukalomba nyamandu ya mmbao, nao ishoghonoke angu kufwa mundu waro useko, uja mundu uilombie uchalipa.

¹⁵Ela ilagho ijo jikabonyeka mundu waro uko aeni, uja mundu ndechaalipa. Ikakaia odeikodesha ighuri jekodesha jichakatanishwa na malipo gharo.

¹⁶“Mundu ukaghora na mwai uselowolo na kulala nao, uchalipa mali na kumlowua.

¹⁷Uja mwai ndee ukalegha putu mwai wake uselowolo ni uo mundu, niko uo mundu uchalipa pesa rikatane ighuri jelowua mwai.

¹⁸“Kusakemsigha msawi wa waka ukaie moyo.

¹⁹Mundu uo ose ulalagha na nyamandu ubwagho.

²⁰“Mundu uo ose uchaafunyira milungu mizima vizongona isaakaia ni kwa BWANA moni, utotesho putu.

²¹“Kusakem'bonyera kiwiwi mghenyi hata kumkoronga, angu na inyo morekoghe waghenyi isanga ja Misri.

²²Kusakemkita mka mkiwa angu mwana mkiwa.

²³Mkawikoronga nao winililie, loli nichasikira kililo chawo,

²⁴nani nichajokwa ni machu na kum'bwagha kwa lufu; na waka wenyu wichawuya waka wakiwa, na wana wenyu wichawuya wana wakiwa.

²⁵“Kukamkopesha pesa mndungi wapo mkwanye uko mkiwa, kusakemmbusa sa msile wako, hata kusakemvara fwaida ingi anduangi.

²⁶Kukawusa nguwo ya mmbenyu ikaie wufunga ghwa sile yako jingi kusesighe iruwa jikineng'ena kusemmbunjire;

²⁷angu iyo niyo cheni nguwo yake ekufinikira; ni nguwo ekufinikira mumbi ghwake; ulala naki? Ukanililia nichasikira, angu niko wa wughoma.

²⁸“Kusakemdukana Mlungu, hata kusakemmbwasira njowe m'baa wa wandu wako.

²⁹“Kusakemuka kureda mafunyo gha makuwido ghako agheni mecha gha imbiri iji ghakaia tayari. Mchanineka wavalwa wenyu wa imbiri wa womi.

³⁰Mchabonya wokoni kwa njau na bauru renyu. Ichakaianya na mae kwa matuku mfungade, ituku ja wunyanya, mchaifunya ikaie yapo.

³¹“Inyo mwawikilo wakfu mkaie wapo kwa huwu mseje nyama ibwaghilo ni nyamandu ya isakenyi; ela nyama iyo muineke koshi.