Read TAITA BIBLE – Biblia Ilagho Jiboie Kwa Wandu Wose KUFUMA 24 Bible Online

KUFUMA 24 - TAITA BIBLE – Biblia Ilagho Jiboie Kwa Wandu Wose bible

KUFUMA 24

¹BWANA ukamzera Musa, “Joka mghondinyi aha kwapo, oho na Haruni, Nadabu, Abihu, na vilongozi va Waisraeli mirongo mfungade; nenyo mkaie kakula koni, na kutasa.

²Na oho kumoni kuekeri kuchacha kaavui nani, kusekwanye na mndungi. Wandu wisejoke mghondinyi.”

³Musa ukacha na kuwighoria wandu memu na Sharia rose ra BWANA; na wandu wose kwa wumweri wikatumbulia, “Dichabonya maza rose sa iji BWANA waghora.”

⁴Musa ukaandika malaghiro ghose gha BWANA. Nakesho yaro kokio, ukaagha madhabahu kirimbenyi cha mghondi; ukadunga magho ikumi na awi kunughana na mbari ikumi na iwi ra Israeli.

⁵Niko ukawiduma wandu wa irika wa wandu wa Israeli, wikafunya vizongona vekora kwa BWANA; na ng'ombe rimu wikarifunya rikaie vizongona va mapatano.

⁶Musa ukawusa nusu ya bagha ya nyamandu, ukaidungiria bakulinyi, na nusu imu ukaimichira madhabahu.

⁷Ukawusa chuo cha malaghano, andu malaghiro gha BWANA ghereandikiloghe; ukaghishomia wandu kwa lwaka. Nawo wikaghamba, “Dichamsikira BWANA, na kubonya agho ghose oreghilaghirieghe.”

⁸Niko Musa ukawusa bagha erekoghe bakulinyi, ukawimichira wandu ukighamba, “Ihi niyo bagha ya ijo ilaghiro BWANA orebonyereghe nenyo, iji oremnekieghe malaghiro agha ghose.”

⁹Niko Musa, Haruni, Nadabu, Abihu, na vilongozi va Waisraeli, wandu mirongo mfungade wikajoka koighu mghondinyi;

¹⁰wikammbona Mlungu wa Waisraeli. Andu orewadirieghe korekoghe seji ni sakafu ya magho gha zoghori gha buluu sa mawingunyi.

¹¹Mlungu nderevibonyereghe ivo vilongozi ilagho jingi, ela weremmbonieghe Mlungu, wikaja na kunywa.

¹²BWANA ukamzera Musa, “Joka cha kwapo mghondinyi, kuweserie aho nani nichakuneka vitongo viwi va magho viko na sharia na malaghiro ghose nighiandikie kwa kuwifundisha wandu.”

¹³Musa na mdumiki wake Joshua wikawuka, na Musa ukajoka cha mghondinyi ghwa Mlungu.

¹⁴Musa ukawizera waghosi, “Diweserenyi aeni aha hata dawuya. Ola mokwanye na Haruni na Huri; mndungi ukakaia na ilagho jingi, uwighendie.”

¹⁵Niko Musa ukajoka cha mghondinyi, na iwingu jikafinikira mghondi.

¹⁶Wubaa ghwa BWANA ghukakaia aighu ya Mghondi ghwa Sinai, na iwingu jikaghufinikira kwa matuku arandadu. Ituku ja mfungade, BWANA ukammbanga Musa aghadi kufuma kwa ijo iwingu.

¹⁷Ugho wubaa ghwa BWANA ghorekoghe ghukiwoneka kwa wandu wa Israeli sa lumu lwa modo luakagha aighu mghondinyi.

¹⁸Musa ukajoka mghondinyi na kungia andenyi ya ijo iwingu. Ukakaia aho matuku mirongo ina, kio na dime.