Read TAITA BIBLE – Biblia Ilagho Jiboie Kwa Wandu Wose KUFUMA 25 Bible Online

KUFUMA 25 - TAITA BIBLE – Biblia Ilagho Jiboie Kwa Wandu Wose bible

KUFUMA 25

¹BWANA ukamzera Musa,

²“Wizere wandu wa Israeli winiredie mafunyo. Wusa kufuma kwa kula mundu ifunyo ijo jose usikiragha ngolonyi kwake kunifunyira.

³Mafunyo agho ghichakaia gha dhahabu, feza, na shaba;

⁴kitani iboie, uzi wa buluu, zambarau na wa ngundu; nguwo ribonyero na mafuri gha mburi,

⁵mrongo ghwa bauru ghushingilo rangi ya ngundu, vishoo va mburi na mudi ghuwangwagha mshita;

⁶mavuda kwa wundu ghwa taa, vilungo kwa wundu ghwa mavuda ghekushinga, na kwa wundu ghwa marumba ghinukie nicha;

⁷magho gha zoghori na vito va zoghori mbaa vekanda nguwonyi ya wudumiki.

⁸Suti wandu winibonyere Andu kwa Wueli, nipate kukaia aghadi kwawo.

⁹Kuibonye Hema na vilambo varo, kunughana na mfwano nichaakuwonyera.

¹⁰“Kubonye Sanduku kwa mudi ghwa mshita, wulacha ghwaro ghukaie sentimeta ighana na ikumi, wushapa sentimeta mirongo irandadu na irandadu, na wuighu ghukaie sentimeta mirongo irandadu na irandadu.

¹¹Kuikande dhahabu ielie shighadi na ndenyi, na mkele ghwa dhahabu ghuimare chia rose cha shighadi.

¹²Kuibonyere koleo inya ra dhahabu, kuikomerie maghunyi kwaro; iwi kwa maghu gha ii chia na iwi kwa maghu gha ija chia.

¹³Kubonye midi iwi ya mshita, kwa wundu ghwa kuiduka, kuikande dhabahu;

¹⁴nao kuingire kwa iro koleo riko maghunyi kwa sanduku.

¹⁵Iyo midi ichakaia ahoeni koleonyi, isefunyo.

¹⁶Na oho kuchawika iyo memu nichaakuneka andenyi ya Sanduku.

¹⁷“Kubonye kifuniko, icho kifumbi cha wughoma cha dhahabu ielie; wulacha ghwaro sentimeta ighana na ikumi, na wushapa ghwaro sentimeta mirongo irandadu na irandadu.

¹⁸Kuchane fwana ra makerubi iwi ra dhahabu kwa nyondo, kutuonyi kwa icho kifumbi cha wughoma ii chia na ii chia.

¹⁹Wika ikerubi jimu kutua uku na jimu kutua kuja kwa icho kifumbi cha wughoma.

²⁰Iro fwana ra makerubi richakaia raghorua mawawa ghawo aighu ya icho kifumbi cha wughoma na kuchingira kiju; naro richakaia rikilangayana aighu ya icho kifumbi cha wughoma.

²¹Iyo memu nichaakuneka, kuingire andenyi ya Sanduku; nao kuwikirie kifuniko, icho kifumbi cha wughoma aighu ya Sanduku.

²²Nani nichakwana nakumoni ghadi na ghadi ya iro fwana ra makerubi iwi, riko aighu ya Sanduku ya Ilaghano, na kukuneka agho malaghiro gha wandu wa Israeli.

²³“Kubonye meza ya mudi ghwa mshita, wulacha ghwaro sentimeta mirongo wunyanya na wunyanya, na wushapa sentimeta mirongo ina na inya, na wuighu sentimeta mirongo irandadu na irandadu.

²⁴Kuishinge dhahabu ielie, na kumarisha mkele ghwa dhahabu chia rose kwaro.

²⁵Kuikabirie iyo meza m'bau ghwa wushapa ghwa milimeta mirongo mfungade na isanu kuimara chia rose, nao kukande ugho m'bau dhahabu.

²⁶Kuibonyere koleo inya ra dhahabu, nao kurikomerie konenyi maghunyi kwaro.

²⁷Iro koleo richakabirilwa kaavui na ugho m'bau, naro richawadia ija midi eduka iyo meza.

²⁸Kubonye midi iwi ya mkame kwa wundu ghoduka iyo meza; nao kuikande dhahabu.

²⁹Kubonye sahani na dishi; kwa wundu ghofukira marumba; njaghi na bakuli kwa wundu ghwa vizongona va divei; vose kuvibonye va dhahabu ielie.

³⁰Iyo meza ichawikwa imbiri ya sanduku ya ilaghano; na mkate ghufunyiro kwa wundu ghwapo ghuchawikwa aighu ya iyo meza ngelo rose.

³¹“Kubonye kilambo chewikiria taa cha dhahabu ielie. Kuchane kishawalata cha ndonyi na mudi ghwaro viwadanishiro na mapambo ghake gha maua, vishekero na mbashu raro.

³²Icho kilambo chichakaia na mbashu irandadu; mbashu idadu luwaru lumu, na mbashu idadu luwaru lumu.

³³Kula lumbashu luchakaia na maua adadu ghifwanane na gha mlozi; sa kikombe, na vishekero na huwo mbashu rose irandadu richakaia woruwo.

³⁴Aighu ya mudi ghwa icho kilambo chewikiria taa, kuchakaia na mbashu rimu inya riko na maua ana ghifwanane na gha mlozi; na vishekero, na malemba.

³⁵Kuchakaia na kishekero aisi ya kula lumbashu, kwa iro mbashu idadu idadu kula luwaru.

³⁶Ivo vishekero na mbashu raro vichakaia va kazi echana viwadanishiro chiaimweri na icho kilambo chewikiria taa vibonyero kwa dhahabu ielie.

³⁷Kubonye taa mfungade rewikiria aighu ya icho kilambo chewikiria taa; na kuriwikiria aighu ripate kulangalishira kiimbiri.

³⁸Kishawaro cha wutambi na kisahani charo, richachanwa ra dhahabu ielie.

³⁹Kutumie kilo mirongo idadu na isanu ra dhahabu ielie kwa kubonya icho kilambo chewikiria taa, na vilambo varo vose.

⁴⁰Lindia kuvibonye kunughana na mfwano nakuwonyera aighu mghondinyi