Read TAITA BIBLE – Biblia Ilagho Jiboie Kwa Wandu Wose KUFUMA 26 Bible Online

KUFUMA 26 - TAITA BIBLE – Biblia Ilagho Jiboie Kwa Wandu Wose bible

KUFUMA 26

¹“Wokoni kubonye Hema ya Wueli, iyo Hema ya andu dikwaniagha; kuibonye na vipande ikumi va kitani iboie ilukilo kwa uzi, wa rangi ya buluu, zambarau, na ya ngundu, itolelo fwana ra makerubi kwa wuya.

²Kula kipande chikaie chikatane na mmbao, wulacha meta ikumi na iwi, na wushapa meta iwi.

³Kushonanye vipande visanu vikaie chimweri, na vizima visanu vikaie chimweri.

⁴Mbembenyi kwa kula kipande kudungie kamba cha shighadi ra nguwo ya buluu.

⁵Sena kudunge kamba rimu mirongo misanu kwa kipande chimu, na kamba mirongo misanu kwa kipande chija chimu.

⁶Kubonye koleo mirongo misanu, ra dhahabu kupate kuvikwanya ivo vipande viwi viwuye kipande chimweri.

⁷“Kuibonyere iyo Hema kifuniko cha vipande ikumi na chimweri va nguwo ibonyero kwa mafuri gha mburi.

⁸Vipande vose vikaie vikatane; wulacha meta ikumi na idadu, na wushapa meta iwi.

⁹Kudunganye vipande visanu vikaie chimweri, na vipande vimu virandadu vikaie chimweri. Kipande cha karandadu, kuchikuche mando awi aighu na imbiri ya iyo Hema.

¹⁰Kudungie makamba mirongo misanu kutuonyi kwa mbembe ya kipande chimu, na kamba mirongo misanu kutuonyi kwa mbembe ya chija kipande chimu.

¹¹Kubonye koleo mirongo misanu ra shaba, kuringirie kambenyi, kupate kuvikwanya ivo vipande viwi viwuye kipande chimweri.

¹²Kukuchuo icho kipande chikuchiroghe nusu yaro inyonyore na nyuma ya iyo Hema.

¹³Na ivo vipande vichumbanagha ii chia na ii chia va sentimeta mirongo misanu, vichanyonyora kutuonyi kwa Hema, kwa kuifinikira.

¹⁴Kubonye vifinikiro viwi va Hema, chimu cha mirongo ya bauru ishingilo rangi ya ngundu, na chimu cha mirongo ya mburi iboisiro nicha.

¹⁵“Kubonye fremu iwi ra mkame kwa wundu ghwa iyo Hema.

¹⁶Wulacha ghwa fremu ghukaie meta inya, na wushapa ghukaie sentimeta mirongo irandadu na irandadu;

¹⁷iyo fremu kuifunge na mbau iwi. Kula fremu ikaie na iro mbau.

¹⁸Kubonye fremu mirongo iwi ii chia ya kusinyi ya hema;

¹⁹na vitiri va feza mirongo ina vewikwa aisi ya iro fremu mirongo iwi, vikarilo ni iro mbau; kula m'bau vitiri viwi va feza.

²⁰Kubonye fremu iwi ii chia ya kaskazinyi ya Hema,

²¹na vitiri va feza mirongo ina; viwi viwiko aisi ya kula fremu.

²²Nyuma ya Hema, chia ya magharibi, kubonye mifumbati irandadu,

²³na mifumbati iwi ya konenyi ichakaia ikatane kondonyi, ela koighu ichawadanishwa. Huwo niko iyo mifumbati iwi ya konenyi ichaafungwa.

²⁴Iri fremu ra konenyi richakaia ritane kondonyi, ela koighu richawadanishwa. Huwo niko iyo mifumbati iwi ya konenyi ichaafungwa.

²⁵Kwa huwo, richakaia fremu wunyanya, na vishawalata varo va feza ikumi na virandadu, viwi viwi vekaia na ndonyi ya kula fremu.

²⁶“Kubonye mbau ra mshita ikumi na isanu; mbau isanu kwa fremu ra luwaru lumu lwa Hema,

²⁷na mbau isanu kwa fremu ra luwaru lumu lwa Hema, na mbau rimu isanu kwa fremu ra chia ya magharibi na nyuma ya Hema.

²⁸Ghadi na ghadi ya mfumbati kuchakabiria m'bau ghumweri kufuma kutua kwa ii chia hata kwa ii chia.

²⁹Iro fremu kucharishinga dhahabu, na pete raro rewadia ugho m'bau, kucharibonya ra dhahabu, na ugho m'bau kuchaghushinga dhahabu.

³⁰Na oho kuchaidunga iyo Hema karakara na mfwano nakuwonyera aho mghondinyi.

³¹“Kubonye pazia ya kitani iboie, ilukilo kwa uzi wa buluu, zambarau, na wa ngundu. Kuitole fwana ra makerubi wiko na mawawa.

³²Na oho kuchaifunga aighu ya nguro inya ra mshita rishingilo dhahabu na kukomerelwa koleo ra dhahabu, na kuwikwa aighu ya vitiri vina va feza.

³³Kuwanike iyo pazia kwa iro koleo, nao kurede ija Sanduku ya Ilaghano iko na vishawalata viwi va magho andenyi, na kuiwika nanyuma ya iyo pazia. Iyo pazia ichatanya Andu kwa Wueli na Andu kwa Wueli Kuchumbie.

³⁴Kuchawika kifuniko icho kifumbi cha wughoma aighu ya ijo Isanduku ja Ilaghano andenyi ya Andu kwa Wueli kuchumbie.

³⁵Kuwike meza shighadi ya Andu kwa Wueli kuchumbie, chia ya magharibi, na kilambo chewikiria taa kuchiwike chia ya kusinyi.

³⁶“Mnyangonyi ghongia cha hemenyi kubonye pazia ya kitani iboie kwa wundu ghwa mnyango ghwa Hema, ilukilo kwa uzi ra buluu, zambarau na ra ngundu; itolelo nicha.

³⁷Iyo pazia kuibonye kwa midi ya mgholeka misanu; kuishinge dhahabu, nao kuifunge koleo ra dhahabu, na kuwika vishawalata visanu va shaba nandonyi yaro.