Read TAITA BIBLE – Biblia Ilagho Jiboie Kwa Wandu Wose KUFUMA 30 Bible Online

KUFUMA 30 - TAITA BIBLE – Biblia Ilagho Jiboie Kwa Wandu Wose bible

KUFUMA 30

¹“Kubonye madhabahu ya mudi ghwa mgholeka, kukaie andu kofukiria marumba.

²Wulacha ghwaro ghuchakaia ghukatane na wushapa, sentimeta mirongo ina na isanu kwa mirongo ina na isanu; na wuighu ghwaro ghuchakaia sentimeta mirongo ikenda. Mbembe rake richawadanishwa nayo.

³Kuikande dhahabu ielie naighu, na chuwarunyi kwaro, chiaimweri na mbembe raro inya; sena kubonye mkele ghwa dhahabu ghuimare chia rose.

⁴Kubonye koleo iwi ra dhahabu reiduka, kurikakadishire chuwarunyi kwa madhabahu nandonyi ya mkelenyi, ripate kuwadia iyo midi eiduka.

⁵Midi iyo kuibonye ya mudi ghwa mkame, nao kuishinge dhahabu.

⁶Iyo madhabahu kuiwike shighadi ya pazia, iyo iko naimbiri ya Sanduku ya Ilaghano. Aho niko nichaakwania na oho.

⁷Iji Haruni wakaboisa taa kula nakesho, uchafukira marumba ghinukie nicha aighu yaro.

⁸Sena uchabonya woruwo ngelo ekora taa luma lwa nakenyi. Ifunyo iji jekora marumba imbiri ya BWANA jichakaia ja toe vivalwa venyu vose.

⁹Kusefunye marumba ghikanilo aighu ya ihi madhabahu, hata kizongona chekora, angu cha viro; hata kusedunge kizongona cha kunywa aighu yaro.

¹⁰Haruni uchakatisha mzango ghoelesha iyo madhabahu indo jimweri kula mwaka kwa kurimichira iro mbembe inya ra madhabahu bagha ya kizongona chifunyiro kwa wundu ghwa kaung'a. Uchakaia ukibonya huwo kula mwaka vivalwa vose. Madhabahu ihi ichakia ielie loli-loli kwa BWANA.”

¹¹BWANA ukamzera Musa,

¹²“Iji kwatala wandu wa Israeli, kula mundu uchafunya ighuri ja irangi jake; wuwiwi ghungi ghusechempata ngelo ya wandu kutalwa.

¹³Kula mundu uchaatalwa uchafunya nusu shekeli, kunughana na kipimo cha shekeli ya Andu kwa Wueli. Kula mundu uchalipa kipimo icho chikaie kizongona kwapo.

¹⁴Kula mundu uchaatalwa, wa kufuma kwa miaka mirongo iwi na kuchumba, uchanilipa ifunyo ijo.

¹⁵Mzuri wa mali usakenilipa kuchumba na mkiwa usenilipe ndini, ngelo elipa pesa kwa wundu ghwa marangi ghawo.

¹⁶Kutumbanye pesa iri kufuma kwa wandu, kupate kuboisa naro Hema Ekwania; sena niwikumbukeghe wandu wa Israeli, nipate kulindia marangi ghawo.”

¹⁷BWANA ukamzera Musa,

¹⁸“Bonya beseni ya shaba ekuoghosha na kilambo charo cheiwikiria cha shaba, kuiwike ghadi na ghadi ya Hema Ekwania na madhabahu, nao kuidungirie machi.

¹⁹Haruni na wana wake wichakaia wikioghosha vala vawo na maghu ghawo aho.

²⁰Wikakangia Hemenyi Ekwania, angu wikakasoghoda kaavui na madhabahu kumfunyira BWANA kizongona chekora, wichakuoghosha na machi wisechefwa.

²¹Wichaoghosha mikonu yawo na maghu ghawo wisechefwa; na iyo ichakaia ni sharia kwawo na kwa vivalwa vawo vose vichaanugha nyuma kwa kala.”

²²BWANA ukamzera Musa,

²³“Kuwade marumba ghiboie kuchumba. Kilo irandadu ra mavuda gha manemane, na kilo idadu ra mavuda ghinukie nicha gha mdalasini, na kilo idadu ra mavuda ghinukie nicha gha kane

²⁴na kilo irandadu ra kasia kunughana na vipimo virumirikie; nao kuranganye na mavuda gha zeituni lita inya.

²⁵Kwa mranganyo ugho, kuchabonya mavuda gha wueli gheshinga wandu seji ghiboiswagha ni fundi obonya marumba mecha, nagho ghichakaia ni mavuda gha wueli gheshinga wandu.

²⁶Kuchatumia agho mavuda kushinga Hema Ekwania, na Sanduku ya Ilaghano;

²⁷meza na vilambo varo vose, kilambo cha taa na vilambo varo vose, madhabahu efukira marumba,

²⁸madhabahu ya vizongona vekora na vilambo varo vose, beseni ekuoghosha na kilambo chake cheimangisha.

²⁹Kuchawika wakfu vilambo ivi vose kwa chia iyo, vipate kukaia vielie loli-loli; na icho chose chichaariadada chichaeleshwa.

³⁰Na oho kuchamshinga Haruni na wana wake mavuda, na kuwiwika wakfu wipate kunidumikia sa wakohani.

³¹Niko kuchawizera wandu wa Israeli, ‘Agha ni mavuda gha Wueli ghetumilwa kwa wudumiki ghwapo na vivalwa venyu vose.

³²Mavuda agha ghisakeshingwa wandu wazima, sena msakebonya mavuda ghangi ghifwanane na agha. Agho ni gha Wueli, na oho kuchaghiwika ghiduo gha Wueli.

³³Mndungi ukabonya mavuda ghifwanane na agha, angu kushinga mndungi useko mkohani, uchatengwa putu na wandu wa Israeli.’”

³⁴Nao BWANA ukamzera Musa, “Wada marumba ghinukie nicha, vipimo vikatane, stakite, onincha, galibaumu, na marumba ghiboie gha ubani.

³⁵Kutumie ugho mranganyo kwa kubonya marumba, seji ghiboiswagha ni fundi obonya marumba mecha; kughidunge chumbi ghipate kukaia gha wueli.

³⁶Kuchane marumba ghamu hata ghikaie sa mufu, nao kughido andenyi ya Hema Ekwania, kughiwike naimbiri ya Sanduku ya Ilaghano. Kughitale marumba agha kukaia ghielie loli-loli.

³⁷Jingi kusekubonyere kumoni marumba gha ughu mfwano. Kughitale ni marumba gha wueli ghiwikilo wakfu kwa wundu ghwapo.

³⁸Mndungi ukabonya marumba ghetumia kunughana na mfwano ughu, uchainjwa putu kwa wandu wake.”