Read TAITA BIBLE – Biblia Ilagho Jiboie Kwa Wandu Wose KUFUMA 32 Bible Online

KUFUMA 32 - TAITA BIBLE – Biblia Ilagho Jiboie Kwa Wandu Wose bible

KUFUMA 32

¹Nao iji wandu werewonieghe angu Musa wamuka luma aho mghondinyi, wikakwanyika chiaimweri kwa Haruni wikamzera, “Isi ndedimanyagha malagho ghimpatire uo mundu Musa udijosere kufuma isanga ja Misri. Kwa huwu wuka kudibonyere milungu edighenja.”

²Haruni ukawizera, “Funyenyi vipini va dhahabu viko madunyi kwa waka wenyu, na wana wenyu wa womi na wa waka, muniredie.”

³Niko aho wandu wikafunya vipini vawo va dhahabu na kumredia Haruni.

⁴Haruni ukaviwada ivo vipini, ukaviyeyusha na kuwibonyera wandu ngache kwa patasi. Wandu wikaghamba, “Ee Israeli, ughu nigho mlungu ghodu ghudifunyire na kudireda kufuma isanga ja Misri.”

⁵Nao iji Haruni wawona agho, ukaagha madhabahu imbiri ya iyo ngache ya dhahabu, ukatangaza, “Kesho kuchakaia na ndima kwa wundu ghwa BWANA.”

⁶Wikawuka kokesho kio na kufunya nyamandu rikaie vizongona vekora, na vindo kwa vizongona va mapatano. Wandu wikasea kidombo kuja na kunywa, wikawuka kusarigha.

⁷BWANA ukamzera Musa, “Bonya shwa-shwa kusee, angu wandu wako awo korewifunyireghe isanga ja Misri wabonya kaung'a na kunisigha.

⁸Wameria kuisigha ija chia nerewilaghirieghe kuinugha, nawo wakubonyera weni ngache ya dhahabu, wikaitasa na kuifunyira vizongona wikighamba wei uo nuo mlungu wawo uwifunyire Misri.

⁹Nawiichi angu ni wandu wighilikie wiseghalukagha.

¹⁰Idana nisighe niwimerie kwa machu ghapo, nani nichakubonya oho na kivalwa chako kukaie mbari mbaa.”

¹¹Ela Musa ukamvoya BWANA Mlungu wake ukighamba, “Ee BWANA, kwaki kwakaia na machu ghibirie kwa wandu wako, awo korewifunyireghe isanga ja Misri kwa ndighi mbaa na kudima?

¹²Kwaki Wamisri widime kughora wei kodewifunya wandu wako Misri kupate kuwibwagha na kuwimeria aho mighondinyi? Lekabonya machu, ghalua nia yako, kusakewiredia wandu wako agho mawiwi.

¹³Kumbuka wadumiki wako Abrahamu, Isaaka, na Jakobo; awo korewighemieghe kumoni kukighamba, ‘Nichachichuria kivalwa chako sa nyerinyeri ra mlungunyi, na iji isanga jose nerekulaghirieghe, nichajineka kivalwa chako, nawo wichakaia aho kwa kala.’”

¹⁴Nao BWANA ukaghalusa nia, ukaleka kuwiredia wandu wake agho mawiwi.

¹⁵Musa ukasea kufuma mghondinyi ukidwa vishawalata viwi va magho mkonunyi kwake, viko na memu iandikilo chia rose.

¹⁶Mlungu moni nuo orevibonyereghe ivo vishawalata; nao nuo moni oreandikieghe agho maandiko kwa kughikota aighu yaro.

¹⁷Joshua ukasikira chwaka ra wandu wikidoghoda, ukamzera Musa, “Nawuyasikira sa chwaka ra wuda kambinyi.”

¹⁸Ela Musa ukaghamba, “Iro chwaka si rewonyera wusimi angu ngemi esimwa, ela ni chwaka rebora nawuyarisikira.”

¹⁹Nao iji Musa orevikieghe kaavui na kambi, ukaiwona iyo fwana ya ngache, na wandu wikivina; ukajokwa ni machu loli-loli, ukavipotua vija vishawalata va magho verekoghe mkonunyi kwake aisi ya kirimba cha mghondi.

²⁰Ukaiwada ija ngache wereibonyereghe, ukaikora na modo, ukaisha hata ikawuya mufu; ukairanganya na machi, ukawinyosha awo wandu wa Israeli.

²¹Musa ukamzera Haruni, “Awandu wakubonyera kii hata kukareda kaung'a ihi mbaa aighu yawo?”

²²Haruni ukatumbulia, “Kusenibonyere machu bwana; oho kwaichi seji awandu wiko iji wakunda kubonya kiwiwi.

²³Waanizera, ‘Isi ndedimanyire malagho ghimpatire uo mundu Musa, udijosere kufuma isanga ja Misri; kwa huwu kudibonyere milungu edighenja.’

²⁴Niko niwilombie winiredie vilambo vawo va dhahabu; nawo wikaniredia, ngavikumba modonyi na kuwichania ihi ngache.”

²⁵Niko iji Musa wawona angu awo wandu watasanyika, (angu Haruni orewisighieghe witasanyikie na kuwuya wandu wefushwa waya ni wamaiza wawo),

²⁶ukakaia kimusi mbengenyi ya kambi ukaghamba, “Uo ose uko luwaru lwa BWANA, ndeche aha kwapo.” Nao Walawi wose wikamghendia na kummaria chia rose.

²⁷Musa ukawizera, “BWANA Mlungu wa Israeli wafunya momu angu kula umu onyu uwade lufu lwake, ughende kambinyi kose kufuma mbenge hata mbenge, nao kula mundu ubwaghe mruna, na mghenyi wake, na mmbao.”

²⁸Walawi wikabonya wokoni sa iji koni werelaghiriloghe ni Musa. Ituku ijo wikabwaghwa wandu elfu idadu.

²⁹Musa ukaghamba, “Idime mwakuwika wakfu mmbeni kukaia wakohani andenyi ya wudumiki ghwa BWANA, kwa kuwibwagha wana wenyu na wanyinyu; eri BWANA umneke ijo irasimio.”

³⁰Nakesho yaro, Musa ukawizera wandu, “Mwabonyere kaung'a mbaa na ndighi. Na idana nichajoka sena kwa BWANA, nipate kumlombia ngera idimika mfuilo wughoma kwa wundu ghwa kaung'a enyu.”

³¹Niko Musa ukajoka kwa BWANA ukamzera, “To, awandu wabonya kaung'a mbaa na ndighi. Wabonya mlungu ghwa dhahabu wikaghutasa.

³²Ela idana nakulomba kuwifue wughoma kaung'a yawo; si huwo, nakulomba kuvute irina japo kufuma kwa icho chuo kuandikie wandu wako.”

³³Ela BWANA ukamtumbulia Musa, “Uo ose unibonyere kaung'a, nuo nichaamuinja irina jake jifume chuonyi chapo.

³⁴Idana ghenda kuwilongoze awo wandu hata isanga nerekughorieghe. Ola malaika wapo uchakiria imbiri konyu. Elaima, ngelo ichacha, nani nichawikaba wandu awa kwa wundu ghwa kaung'a yawo.”

³⁵BWANA ukareda makongo kwa awo wandu, angu weremshekerieghe Haruni kuibonya ngache ya dhahabu.