Read TAITA BIBLE – Biblia Ilagho Jiboie Kwa Wandu Wose KUFUMA 35 Bible Online

KUFUMA 35 - TAITA BIBLE – Biblia Ilagho Jiboie Kwa Wandu Wose bible

KUFUMA 35

¹Musa ukawanga izungu jose ja wandu wa Israeli ukawizera, “Huwu niko BWANA umlaghirie kubonya;

²Mchakaia mkibonya kazi renyu kwa matuku arandadu, ela ituku ja mfungade jichakaia jielie; ni ituku ja wueli; jitengelo kwa wundu ghwa BWANA. Mundu uo ose uchaabonya kazi ituku ijo uchabwaghwa.

³Msekore medo mizinyi konyu ituku ja Sabato.”

⁴Musa ukawizera wandu wose wa Israeli, “Huwu niko BWANA walaghira:

⁵Mfunye mafunyo kwa BWANA. Uo ose uko na ngolo efunya, ufunye mafunyo gha dhahabu, feza na shaba;

⁶kitani ndicha, uzi ra buluu, na ra zambarau na ra ngundu; nguwo ribonyero kwa mafuri gha mburi;

⁷mirongo ya bauru ishingilo rangi ya ngundu; mirongo ya mburi; mbau ra mgoleka;

⁸mavuda kwa wundu ghwa taa, marumba kwa wundu ghwa mavuda gheshinga wandu, na marumba mecha;

⁹magho gha zoghori mbaa, na lulu kwa kungira kwa iyo naivera na kisibau cha laghenyi, cha Mkohani M'baa.

¹⁰“Mafundi ghose ghiko aghadi konyu wiko na wuya, wichacha kubonya kula kilambo chalaghirwa ni BWANA.

¹¹Iyo Hema na vilambo varo vefinikira cha shighadi na cha nandenyi; koleo na fremu raro, vuma varo verigha na nguro raro na vishawalata va nandonyi.

¹²Sanduku ya Ilaghano, midi yaro eiduka na kifuniko charo; nguwo yaro ya pazia eituwira isewoneke.

¹³Meza na midi yaro eiduka na vilambo varo vose; na Mkate ghufunyiro kwa Mlungu.

¹⁴Kilambo chewikiria taa na vilambo varo; taa ewonyera mwengere na mavuda gharo.

¹⁵Madhabahu efukiria marumba na nguro raro, mavuda ghedunga wandu, na marumba ghinukie nicha, na nguwo ya pazia ya mnyango ghwa Hema;

¹⁶madhabahu ghekoria vizongona vekora na kichekecho charo cha shaba, na midi yaro eiduka, na vilambo varo vose; beseni ekuoghosha na kilambo charo cheiwikiria.

¹⁷Nguwo ra pazia ya barazenyi, nguro raro, na vishawalata varo va nandonyi; na pazia engiria cha barazenyi;

¹⁸Vigingi vekongodia Hema na vigingi vekongodia barazenyi na kamba raro;

¹⁹nguwo rishonelo nicha redumika andenyi ya Andu kwa Wueli, nguwo ya wueli ya Mkohani Haruni, na nguwo kwa wundu ghwa wana wake, kwa wudumiki ghwawo ghwa wukohani.”

²⁰Niko izungu jose ja wandu wa Israeli jikafuma kwa Musa na kughenda.

²¹Kula mundu orenyavurishiroghe ngolonyi kwake, na rohonyi kwake, wikacha na kumfunyira BWANA mafunyo ghetesia Hema Ekwania, na wutasi ghwaro ghose; na kwa wundu ghwa marwao gha Wueli.

²²Na wandu wose werekundieghe kufunya kwa ngolo, wikacha wose womi na waka; wikareda vipini, pete, bangili, na vilambo va zoghori vose va dhahabu; wikavifunya kwa BWANA.

²³Uo ose orekoghe na kitani ndicha, na uzi ra buluu, na ra zambarau, angu ra ngundu, nguwo ya mafuri gha mburi, mrongo ghwa bauru ghushingilo rangi ya ngundu, angu mrongo ghuboie; wikavireda vose.

²⁴Awo wose weredimieghe kureda feza angu shaba, wikareda mafunyo ghawo kwa BWANA. Na awo werekoghe na mbau ra mgholeka, redima kutumilwa kwa kazi iyo yose, wikarireda.

²⁵Waka werekoghe na wuya gholuka wikareda uzi ra kitani ra buluu, zambarau, na ra ngundu wereribonyereghe.

²⁶Waka wose werenyavurishiroghe ngolonyi, wikaboisa uzi kwa mafuri gha mburi.

²⁷Vilongozi wikareda magho gha zoghori mbaa, na lulu kwa wundu ghwa naivera na kisibau cha laghenyi;

²⁸marumba na mavuda kwa wundu ghwa taa, na mavuda gheshinga wandu na marumba ghinukie nicha.

²⁹Wandu wose wa Israeli waka na womi, awo ngolo rawo rerenyavurishiroghe wipate kumfunyira BWANA, seji Musa orelaghiriloghe ni BWANA; wikafunya mafunyo ghawo kwa ngolo cha kwa BWANA.

³⁰Musa ukawizera wandu wa Israeli, “Olenyi BWANA wamsaghue Bezaleli mwana wa Uri, wawae Huri, kufuma kwa mbari ya Juda;

³¹na Mlungu ukamchura Roho wake, na kumneka akili na kumanya komdimisha kubonya kazi rose ra wufundi;

³²udime kubonya michoro echana vilambo va dhahabu, feza na shaba;

³³udime kudumbua lulu kwa wundu ghwa mapambo, na kuwacha midi na kula kazi ya wufundi.

³⁴BWANA wamnekie uo na Oholiabu mwana wa Abisamaki, wa mbari ya Dani, wuya ghofundisha wandu wazima wufundi.

³⁵Wawinekie akili emanya kazi rose ribonywagha ni mafundi ghewacha, wechora, na wetola kwa kitani ndicha, na uzi wa buluu, na wa zambarau, na wa pamba ya ngundu, na waluki widimagha kubonya kazi iyo yose ya wuya angu echora.