Read TAITA BIBLE – Biblia Ilagho Jiboie Kwa Wandu Wose KUFUMA 36 Bible Online

KUFUMA 36 - TAITA BIBLE – Biblia Ilagho Jiboie Kwa Wandu Wose bible

KUFUMA 36

¹“Bezaleli na Oholiabu chiaimweri na kula mundu BWANA umnekie kudima na wuya ghomanya kubonya kazi eboisa Andu kwa Wueli, niwo wichaabonya kula ilagho karakara seji BWANA relaghirieghe.”

²Nao Musa ukammbanga Bezaleli na Oholiabu chiaimweri na wandu wose BWANA orewinekieghe wudimi, awo werekoghe na ngolo etesia, ukawizera wizoe kazi.

³Wikawusa kufuma kwa Musa agho mafunyo ghose ghereredeloghe ni wandu wa Israeli kwa wundu ghoboisa Andu kwa Wueli. Wandu wa Israeli wikachuria kumredia Musa mafunyo ghawo kwa ngolo kula nakesho;

⁴hata awo wandu wose BWANA orewinekieghe wudimi, awo werekoghe wikibonya iyo kazi, wikacha kula mundu kufuma andu orekoghe ukibonya kazi

⁵wikamzera Musa, “Wandu wawuyareda vilambo vingi kuchumba seji vikundikie kwa wundu ghwa iyo kazi BWANA oreilaghirieghe diibonye.”

⁶Niko Musa ukafunya momu andu kose kambinyi, kukaia wisechurie kufunya vilambo kwa wundu ghwa Andu kwa Wueli. Wandu wikaleka kureda.

⁷Vilambo vose vereredeloghe verekoghe vakata na kuchumba.

⁸Wandu wiko na wuya kuchumba, aghadi ya awo werekoghe wikibonya kazi, wikaibonya iyo Hema Ekwania. Wereibonyereghe kwa vipande ikumi va kitani ndicha, ilukilo na uzi ra buluu, na ra zambarau, na ra ngundu, wikatola na fwana ra makerubi aighu yaro.

⁹Vipande vose verekoghe vikatane, wulacha meta ikumi na iwi, na wushapa meta iwi.

¹⁰Wikakwanya vipande visanu vikaie kipande chimweri, na vipande vizima visanu wikabonya wokoni.

¹¹Wikadunga mbua rewadia ra nguwo ya buluu kutuonyi kwa kipande chimu cha shighadi, na wokoni mbua rimu rewadia kutuonyi kwa chija kipande chimu kizima.

¹²Wikawasanya iro mbua mirongo misanu rewadia kutuonyi kwa kipande chimu, na mbua rimu mirongo misanu rewadia kutuonyi kwa kipande chimu; ripate kulangayana na wambao.

¹³Wikabonya koleo ra dhahabu mirongo misanu, rewadanisha ivo vipande viwi, viwuye kipande chimweri.

¹⁴Niko wikaibonyera Hema kifuniko, vipande ikumi na chimweri va nguwo ibonyero kwa mafuri gha mburi.

¹⁵Wikakwanya vipande vose vikatane; wulacha meta ikumi na idadu, na wushapa meta iwi.

¹⁶Wikashona vipande visanu chiaimweri na vipande vizima virandadu chiaimweri.

¹⁷Wikadunga mbua rewadia mirongo misanu kutuonyi kwa kipande chimu, na mbua zima rewadia mirongo misanu kutuonyi kwa kipande chimu.

¹⁸Wikabonya koleo ra shaba mirongo misanu, rekwanya ivo vipande viwi viwuye kipande chimweri.

¹⁹Wikabonya vifinikiro vimu viwi; chimu cha mrongo ghwa ng'ondi, ghushingilo rangi ya ngundu; na kizima, kwa mrongo ghuboie ghwa mburi; vitumilo kwa kufinikira cha shighadi.

²⁰Niko wikabonya mbau redunga Hema kimusi kwa mudi ghwa mgholeka.

²¹Kula m'bau ghorekoghe na wulacha ghwa meta inya, na wushapa ghwa sentimeta mirongo irandadu na irandadu.

²²Wikawenga chumi iwi kwa kula m'bau nandonyi kuwadanisha iro mbau.

²³Wikabonya mbau mirongo iwi remangisha luwaru lwa kusinyi;

²⁴na vishawalata va nandonyi va feza mirongo ina, vewika nandonyi ya iro mbau, vishawalata viwi viwi vekaia nandonyi ya kula m'bau; vipate kumazira iro chumi riwengelo.

²⁵Wikabonya mbau mirongo iwi remangisha luwaru lwa kaskazinyi lwa Hema;

²⁶na vishawalata varo va nandonyi va shaba mirongo ina; vishawalata viwi vikaie aisi ya kula m'bau.

²⁷Nanyuma ya Hema cha magharibi, werebonyereghe mbau irandadu

²⁸na mbau iwi ra mbembenyi.

²⁹Iri mbau ra mbembenyi rerewadanishiroghe chiaimweri kufuma kondonyi hata koighu. Huwo niko iro mbau ra mbembenyi rerebonyeroghe.

³⁰Kwa huwo rerekoghe mbau wunyanya na vishawalata va nandonyi va feza ikumi na virandadu, vewikiria viwi viwi nandonyi ya kula m'bau.

³¹Wikabonya mbau ra mgholeka ikumi na isanu. Mbau isanu ritumilo kwa fremu ra luwaru lumu lwa iyo Hema;

³²na mbau isanu kwa fremu ra luwaru luzima lwa iyo Hema; mbau isanu kwa chia ra magharibi na nyuma ya iyo Hema.

³³Wikabonya mbau rekabiria ghadi na ghadi kuwadia iro fremu kufuma kutua uku hata kutua uku.

³⁴Iro fremu wikarishinga dhahabu, na kurifunga koleo ra dhahabu remazira iro mbau; na iro mbau wori wikarishinga dhahabu.

³⁵Wikabonya pazia ya kitani ndicha, ilukilo kwa uzi ra buluu, na ra zambarau, na ra ngundu, wikatola fwana ra makerubi aighu yaro.

³⁶Wikabonya nguro inya ra mudi ghwa mgholeka, rewadia iyo pazia, na kurishinga dhahabu. Wikaribonyera koleo ra dhahabu rewadia iyo pazia. Sena wikabonya vishawalata va nandonyi va feza vewadia iro nguro.

³⁷Wikabonya pazia zima ya mnyango ghwa hema kwa kitani ndicha ilukilo na uzi wa buluu, zambarau, wa ngundu itolelo nicha.

³⁸Wikabonya nguro isanu kwa wundu ghwa iyo pazia, wikarikabiria koleo na kurishinga dhahabu kutuonyi kwaro, na kamba raro wori wikarishinga dhahabu; ela vishawalata va nandonyi, wikavibonya va shaba vewadia iro nguro.