Read TAITA BIBLE – Biblia Ilagho Jiboie Kwa Wandu Wose KUFUMA 38 Bible Online

KUFUMA 38 - TAITA BIBLE – Biblia Ilagho Jiboie Kwa Wandu Wose bible

KUFUMA 38

¹Ukabonya madhabahu ya vizongona vekora kwa mudi ghwa mgholeka, ikatane chia rose; meta iwi na pointi iwi kwa meta iwi na pointi iwi, wuighu ghwaro meta imweri na pointi idadu.

²Ukaibonyera mbembe naighu mbembe rose inya, riwadanishiro na madhabahu; ukaishinga shaba.

³Ukabonya vilambo vose kwa wundu ghwa madhabahu; sufuria, miiko, beseni, uma, na chuwigha ra modo. Vilambo vose verebonyeroghe kwa shaba.

⁴Ukabonya kichekecho cha shaba, na kuchingira nandonyi ghadi na ghadi ya madhabahu.

⁵Ukabonya pete inya ra shaba rewadia iyo midi eduka, ukarikabiria mbembenyi inya ra madhabahu.

⁶Ukabonya midi eduka kwa mudi ghwa mgholeka, ukaishinga shaba;

⁷ukaingira iyo midi petenyi ra madhabahu chuwarunyi kwaro. Iyo madhabahu erebonyeroghe kwa mbau, ukasigha mruma ghadi na ghadi yaro.

⁸Ukabonya beseni ya shaba, na kilambo charo cheiwikiria cha shaba, erebonyeroghe kwa vilole va waka werekoghe wikidumika mnyangonyi ghwa Hema Ekwania.

⁹Ukabonya wurigha ghwa nguwo ilukilo ya kitani ndicha. Luwaru lwa kusinyi, iyo nguwo erekoghe na wulacha ghwa meta mirongo ina na inya.

¹⁰Nguro raro rewadia rerekoghe mirongo iwi ra shaba na vishawalata varo va nandonyi va shaba mirongo iwi; ela koleo na kamba raro rerekoghe ra feza.

¹¹Luwaru lwa kaskazinyi, lorekoghe na wulacha ghwa meta mirongo ina na inya, na nguro ra shaba rerekoghe mirongo iwi, na vishawalata varo va nandonyi va shaba mirongo iwi.

¹²Cha magharibi ya Hema, ukabonya idawo kwa nguwo ya kitani ndicha, wulacha ghwaro meta mirongo iwi na iwi, na nguro ra shaba ikumi rewadia iyo nguwo, na vishawalata varo va nandonyi ikumi va shaba, ela koleo raro na kamba raro rerekoghe ra feza.

¹³Cha mashariki, aho kongiria, ukakubonyera nguwo ya pazia, wushapa ghwaro meta mirongo iwi na iwi.

¹⁴Ulo luwaru longiria, korekoghe na nguwo ya wurigha ya meta irandadu na pointi irandadu, nguro raro idadu reiwadia, riko na vishawalata varo va nandonyi veriwadia.

¹⁵Na luwaru lwa nyuma wokoni, andu kongiria korekoghe na nguwo ya idawo ya meta irandadu na pointi irandadu, nguro raro idadu reiwadia riko na vishawalata varo va nandonyi veriwadia.

¹⁶Nguwo yose ya idawo chia rose erekoghe ilukilo ya kitani ndicha.

¹⁷Vija vishawalata va nandonyi vewadia nguro verekoghe va shaba, ela koleo raro na kamba rerekoghe ra feza kutuonyi kwa iro nguro koreshingiloghe feza.

¹⁸Pazia ya andu kongiria erebonyeroghe kwa Kitani ilukilo na kutolwa nicha na uzi ra buluu, zambarau, na ra ngundu. Erekoghe na wulacha ghwa meta ikenda na wuighu ghwa meta iwi, kukatana na ugho wurigha.

¹⁹Erewadiloghe ni nguro inya riko na vishawalata varo va nandonyi va shaba vina wokoni. Koleo raro, na vongo va nguro, na kamba raro verekoghe va feza.

²⁰Vigingi vose vewadia iyo Hema kuimara chia rose, na va idawo wori verekoghe va shaba.

²¹Ughu nigho mtalo ghwa vilambo veretumiloghe kwa Hema Ekwania, seji veretaliloghe kwa kunugha malaghiro gha Musa, kwa wundu ghwa wudumiki ghwa Walawi; wikilongozwa ni Ithamari mwana wa mkohani Haruni.

²²Bezaleli mwana wa Uri, wawae Huri wa mbari ya Juda, orebonyereghe vilambo vose ivo BWANA oremlaghirieghe Musa;

²³nao orekwanyeghe na Oholiabu mwana wa Ahisamaki, wa mbari ya Dani; mundu uko na wuya ghwa wufundi na kuchora, na kutola kwa uzi ra buluu, zambarau, na ra ngundu na kitani ndicha ilukilo.

²⁴Dhahabu yose erefunyiroghe kwa BWANA kwa wundu ghwa Hema ya Wueli, erekoghe na wulemeri ghwa vipimo va kibiashara, kilo elfu imweri.

²⁵Feza erefunyiroghe ni wandu, kunughana na mtalo ghwawo, erekoghe na wulemeri ghwa kilo elfu idadu maghana ana na mirongo idadu; vipimo va kibiashara.

²⁶Mtalo ugho ghorekatanishiroghe na mtalo ghwa wandu weretaliloghe; seji kula mundu orefunyireghe kunughana na kipimo cherewikiloghe kwa vipimo va kibiashara. Mtalo ghwa wandu ghorekoghe elfu maghana arandadu na idadu, maghana masanu na mirongo misanu; seji kula mundu oretalieghe, kufuma wa miaka mirongo iwi, na kuchumba, niwo weretaliloghe.

²⁷Feza kilo elfu maghana ana reretumiloghe kwa wundu ghwa vishawalata va nandonyi va iyo Hema ya Wueli; na iyo nguwo ya pazia; kilo mirongo idadu na inya reretumiloghe kwa kula kishawalata cha nandonyi.

²⁸Kwa iro kilo mirongo idadu ra feza reresigharikieghe, Bezaleli orebonyereghe kamba, koleo ra nguro, na vongo va iro nguro.

²⁹Shaba erefunyiroghe kwa BWANA erekoghe na wulemeri ghwa kilo elfu iwi, maghana ana na mirongo iwi na isanu.

³⁰Shaba iyo yose niyo eretumiloghe kwa kubonya vishawalata va nandonyi ya mbenge ya Hema Ekwania, na iyo madhabahu ya shaba, chekecheke ya shaba, na vilambo varo vose;

³¹vishawalata va nandonyi va idawo kujimara chia rose, na vishawalata va nandonyi va mbenge ya idawo, na vigingi vose va Hema na idawo.