Read TAITA BIBLE – Biblia Ilagho Jiboie Kwa Wandu Wose KUFUMA 4 Bible Online

KUFUMA 4 - TAITA BIBLE – Biblia Ilagho Jiboie Kwa Wandu Wose bible

KUFUMA 4

¹Niko Musa ukamtumbulia BWANA, “Ela ndewichaanirumiria hata kusikira agho nighoragha, angu wichaghamba, ‘Bwana ndekufutukie kungi.’”

²BWANA ukamzera, “Niki icho kuwadie?” Ukatumbulia, “Ni zobo.”

³BWANA ukamzera, “Ikumbe andonyi.” Nao ukaipotoa andonyi, nayo ikawuya choka; hata Musa ukaikimbia.

⁴Ela BWANA ukamzera Musa, “Ghorua mkonu ghwako kuiwade kikomba.” Ukaghorua mkonu ghwake ukaiwada, nayo ikawuya zobo mkonunyi kwake.

⁵BWANA ukaghamba, “Bonya huwo wipate kurumiria angu Mlungu wa weke ndee, Mlungu wa Abrahamu, wa Isaaka, na wa Jakobo wakufutukie.”

⁶BWANA ukamzera Musa sena, “Ngira mkonu ghwako laghenyi kwako.” Nao ukaghungira mkonu ghwake laghenyi kwake. Hata iji oreghufunyireghe ukawona ghwawadwa ni sima, ghukawuya ghwa chokwa sa thaluji.

⁷Niko BWANA ukaghamba, “Wunja mkonu ghwako laghenyi sena.” Ukaghuwunja; hata iji oreghuwunjireghe ghukaboa karakara na mumbi ghwake.

⁸BWANA ukaghamba, “Iji wakaia wisekurumirie hata kukusikira kwa mwakilimbiti wa imbiri, yadimika wikurumirie kwa uhu wa kawi.

⁹Wikalegha kukurumiria hata kwa awa weke mwakilimbiti wawi, angu kukusikira; kudae machi kufuma moda ghwa Naili, nao kughidie andonyi na machi ghichawuya bagha aighu ya ndoe iomie.”

¹⁰Ela Musa ukaghamba, “Ee, BWANA, wapo, ini siichi kudeda, hata sidimie kudeda nicha kufuma kwazoya kughora nani mdumiki wako; nadadeda mboa mboa, sena nadaghughumia.”

¹¹BWANA ukamzera, “Nani ubonyere momu ghwa mdamu? Nani um'bonyagha ukaie kituri angu usesikiragha, angu uwonagha, angu kitungure? Welee, si ini moni BWANA anguwada?

¹²Idana ghenda, nani nichakutesia kudeda na kukufundisha seji kuchaaghora.”

¹³Musa ukaghamba, “Ee BWANA wapo, nakulomba kudume mundu mzima.”

¹⁴Niko BWANA ukajokwa ni machu aighu ya Musa, ukaghamba, “Welee, mwanyinyu Haruni Mlawi ndeko aeni? Naichi angu uo wadima kudeda nicha; ola waawuyacha kukumara, nao uchaboilwa kukuwona.

¹⁵Oho kuchamghoria malagho upate kughideda, nani nichakaia andwamweri nenyo kwa ghose mchaadeda, na kumfundisha seji mchaabonya.

¹⁶Uchadedanya na wandu wulalo ghwako na oho kuchakaia sa Mlungu, kumneka agho ufwane kughora.

¹⁷Kuchadwa iyo zobo mkonunyi kwako, na kwa iyo zobo, kuchabonya weke mwakilimbiti.”

¹⁸Nao Musa ukawuya kwa mghosi wake Jethro ukamzera, “Nakulomba kunisighe niwuye kwa wandu wapo wiko Misri, niwizighane ngera waduagha moyo.” Jethro ukamzera Musa, “Ghenda na sere.”

¹⁹BWANA ukamzera Musa uko Midiani, “Wuya Misri; angu awo wose werekulolagha wikubwaghe wamerie kufwa.”

²⁰Niko Musa ukawada muka wake na wana wake, ukawijosa aighu ya punda ukawuya isanga ja Misri; nao ukadwa ija zobo ya Mlungu mkonunyi kwake.

²¹Nao BWANA ukamzera Musa, “Iji kwawuya Misri, kubonye awo weke mwakilimbiti wose nikunekie ndighi rewibonya imbiri ya Mzuri; ela nichaikurisha ngolo yake, nao ndechaawisigha awo wandu wighende.

²²Na oho kuchamzera Farao, ‘BWANA waghora huwu: Israeli ni mwana wapo wa imbiri;

²³nani nakuzera, “Sigha mwana wapo ughende, upate kunidumikia.” Kukalegha kumsigha ughende, ola nicham'bwagha mwana wako wa imbiri.’”

²⁴Nao iji wavika andu kolala, chienyi wikighenda Misri, BWANA ukakwana na Musa, ukakunda kum'bwagha.

²⁵Niko Sipora ukashoa igho jikalie, ukamshamisha mwana wake na kukumba mrongo ghwaro maghunyi kwa Musa ukighamba, “Kwa loli ko Bwana arusi wa bagha kwapo.”

²⁶BWANA ukamleka Musa. Niko oreghorieghe, “Ko Bwana arusi wa bagha,” kwa wundu ghwa tabia eshamisha.

²⁷Nao BWANA ukamzera Haruni, “Ghenda kukwane na Musa kireti.” Niko ukaghenda; wikakwania mghondinyi ghwa Mlungu, ukamsusugha.

²⁸Niko Musa ukamghoria Haruni agho malagho ghose BWANA oremdumieghe nagho na awo weke mwakilimbiti BWANA oremlaghirieghe uwibonye.

²⁹Niko Musa na Haruni wikaghenda na kuwikwanya waghosi wose wa wandu wa Israeli.

³⁰Haruni ukawighoria agho malagho ghose BWANA emzerieghe Musa; na Musa ukabonya weke mwakilimbiti imbiri ya wandu.

³¹Wandu wikarumiria; nawo iji wasikira wei BWANA wawichea wandu wa Israeli na angu wamerie kuwona seji wawuyakorongwa, wikaghoghomesha vongo vawo na kutasa.