Read TAITA BIBLE – Biblia Ilagho Jiboie Kwa Wandu Wose KUFUMA 9 Bible Online

KUFUMA 9 - TAITA BIBLE – Biblia Ilagho Jiboie Kwa Wandu Wose bible

KUFUMA 9

¹Niko BWANA ukamzera Musa, “Ghenda kwa Farao kumzere, BWANA, uo Mlungu wa Waebrania waghamba huwu, ‘Sigha wandu wapo wighende eri wipate kunidumikia.

²Nako ngera kwachuria kuwighiria wiseghende,

³zighana mkonu ghwa BWANA ghucharikaba nyamandu rako rose kwa mlaso ghubirie; mfugho riko mlambenyi, farasi, punda, ngamila, ng'ombe na ng'ondi.

⁴Ela BWANA uchawonyera mwano aghadi ya mfugho ra Waisraeli na mfugho ra Wamisri. Ndekuchaakaia na nyamandu ingi ya wandu wa Israeli ichaafwa anduangi.’”

⁵BWANA ukawika ngelo yaro ukighamba, “Kesho nichajibonya ilagho ijo isangenyi.”

⁶Nakesho yaro, BWANA ukabonya ijo ilagho; na mfugho rose ra Wamisri rikafwa; ela mfugho ra wandu wa Israeli ndererefueghe hata imweri anduangi.

⁷Farao ukaduma; nao ikawoneka kukaia nyamandu ingi ya Waisraeli ndeerefueghe anduangi. Ela Farao ukaikurisha ngolo yake, hata nderewisighieghe awo wandu wighende anduangi.

⁸Nao BWANA ukawizera Musa na Haruni, “Beghenyi ivu ngonde richue kufuma andu kukorelwagha modo m'baa, na Musa ujikumbe nokoighu imbiri ya Farao.

⁹Najo jichawuya teri isangenyi jose ja Misri, na kuwuya mbama, rikibarika na kuwuya vonda kwa wandu na kwa nyamandu wori isanga jose ja Misri.”

¹⁰Niko wikabegha ijo ivu kufuma andu kukorelwagha modo m'baa, wikaghenda na kukaia kimusi imbiri ya Farao. Musa ukajikumba nokoighu, najo jikareda mbama rikibarika na kuwuya vonda kwa wandu na kwa nyamandu wori.

¹¹Awo waghanga ndeweredimieghe kukaia kimusi imbiri ya Musa kwa wundu ghwa iro mbama, angu iro mbama rerewibukieghe chiaimweri na Wamisri wose.

¹²Ela BWANA ukaikurisha ngolo ya Farao, hata nderewisikireghe Musa na Haruni anduangi, sa iji koni BWANA oremghorieghe Musa.

¹³Niko BWANA ukamzera Musa, “Kesho kuwuke kokio, kughende kwa Farao kumzere, BWANA, uo Mlungu wa Waebrania waghamba huwu, ‘Sigha wandu wapo wighende kunitasa.

¹⁴Ngelo ihi nichareda saka kwako koni, kwa wadumiki wako, na wandu wako; kupate kumanya angu ndekuwadie ungi ndoenyi kose uko sa ini anduangi.

¹⁵Wei nedeghorua mkonu ghwapo kukukaba oho na wandu wako kwa saka ya ngawawi, kumangu ndekuko ndoenyi;

¹⁶ela neekusigha moyo tu nipate kuwonyera ndighi rapo, eri irina japo jipate kughorwa ndoenyi kose.

¹⁷Kwaduagha kukikujosa aighu ya wandu wapo, hata ndekukunde kuwisigha wighende.

¹⁸Ola kesho, ngelo sa ii cheni ii, nichanyesha vua mbaa ya magho, jingi isewonekie isanga ja Misri.

¹⁹Kwa huwo, kudume wandu wiwunje mfugho rako, na icho chose chiko shighadi, kuvingire kiwandenyi; angu iyo vua ya magho ichaanya ndoenyi, ichabwagha kula mdamu na nyamandu richaakulwa shighadi risengirilo andenyi ya kiwanda.’”

²⁰Niko awo wereobueghe ilagho ja BWANA wa awo wadumiki wa Farao, wikawibonya wazumba wawo, na mfugho rawo wikimbie cha nyumbenyi.

²¹Na awo wiseretalieghe ilagho ja BWANA, weresighieghe wazumba wawo na ng'ombe rawo mlambenyi.

²²Niko BWANA ukamzera Musa, “Ghorua mkonu ghwako nokoighu, vua ya magho ipate kunya isanga jose ja Misri, aighu ya wandu, na nyamandu, na kula muwalwa ghuko mbuwenyi.”

²³Niko Musa ukaghorua zobo yake nokoighu, na BWANA ukareda lukuwa na vua ya magho, na luhehia lukaikaba ndoe. BWANA ukanyesha vua mbaa ya magho aighu ya isanga ja Misri;

²⁴korekoghe na luhehia lorekoghe lukikaba tulituli andenyi ya vua mbaa ya magho, isewonekie jingi andenyi ya isanga jose ja Misri.

²⁵Iyo vua ya magho ikanona kula kilambo cherekoghe shighadi isanga jose ja Misri; mdamu, nyamandu, na miwalwa yose ya mbuwenyi ikanonwa, na kula mudi ghwa mbuwenyi ghukachukanywa ni iyo vua ya magho.

²⁶Isanga ja Gosheni jiekeri, andu Waisraeli werekoghe, niko iyo vua ya magho iserekoghe.

²⁷Nao Farao ukaduma Musa na Haruni wiwango, ukawizera, “Ngelo ihi nabonya kaung'a, BWANA oko na hachi; ela ini na wandu wapo deko na makosa.

²⁸Mlombenyi BWANA, angu ulu lukuwa na vua ya magho vakata. Nichamlekeria mghende, hata ndemuchaamuka anduangi.”

²⁹Musa ukamzera, “Ngameria kufuma mzinyi, nichalomba ngighorua mikonu yapo cha kwa BWANA, na lukuwa luchanyama, na vua ya magho ichasia; kupate kumanya angu ndoenyi ni kwa BWANA.

³⁰Elaima sena namanya angu oho na wandu wako mwaduagha msemuobuagha BWANA Mlungu anduangi.”

³¹Kitani na shairi rerenoneloghe putu, angu shairi erekoghe yafunya vanga, na kitani erekoghe ikifunya mboi.

³²Ela ngano ndeerenoneloghe anduangi, angu riserefunyireghe vanga.

³³Niko Musa ukafuma mzinyi kwa Farao, ukamlomba BWANA ukiwusira mikonu yake nokoighu, na ulo lukuwa, vua ya magho, na vua yose ikasigha kunya ndoenyi.

³⁴Ela iji Farao wawona angu vua na vua ya magho na lukuwa vasia, ukabonya kaung'a sena; ukakurisha ngolo yake, uo moni na wadumiki wake.

³⁵Niko huwo, ngolo ya Farao ikakurishwa, hata nderewisighieghe wandu wa Israeli wighende, sa iji koni BWANA oreghorieghe kwa chia ya Musa.