Read TAITA BIBLE – Biblia Ilagho Jiboie Kwa Wandu Wose AYUBU 13 Bible Online

AYUBU 13 - TAITA BIBLE – Biblia Ilagho Jiboie Kwa Wandu Wose bible

AYUBU 13

¹Agha ghose namerie kughiwona; naghisikire kwa madu ghapo ghikanitambukia.

²Agheni muichi, nanimoni wori naghiichi; siko wa ndonyi kungi konyu.

³Ela neekunda nighore na Uo-Uwadie-Ndighi-Rose, na kudeda malagho ghapo kwa Mlungu.

⁴Inyo mwaawuyafinikira wukelu ghonyu na tee; inyo mmbose mooka sa warighiti wisefwanagha.

⁵Na wei mwadakaia kima, mwadawoneka wandu wa hikima.

⁶Idana sikirienyi seji nikudederiagha, na seji nivoyagha.

⁷Muadeda kiwiwi kwa wundu ghwa Mlungu, na kughora malagho gha tee kwa wundu ghwake?

⁸Mwadima kumdawiria? Mwadima kumdederia Mlungu?

⁹Ukawoka kumlawua, umkua nicha? Angu mwadima kumkalia seji mundu ukaliagha mdamu?

¹⁰Mkamdawiria kivisonyi, loli uchamkemia.

¹¹Wubaa ghwake guchamuobosha, na kungilwa ni kiture chake.

¹²Makatanisho ghenyu gheeka gha duu sa ivu; nganyi renyu reeka sa wongo ghuwaghanyikagha.

¹³“Nyamenyi kima nidede, Ijo jiwonekagha jiwoneke.

¹⁴Neko tayari kungira irangi japo ndengonyi, na kukubwagha nimoni.

¹⁵Hata Mlungu ukanibwagha, nichadua ngimsuwiria; elaima nichakudederia ini moni imbiri kwake.

¹⁶Uku niko kukia kwapo; elaima mndungi usene kuobua kwa Mlungu, ndechaakaia imbiri kwake.

¹⁷Nisikirienyi nicha, na mawonyero ghapo ghingie madunyi konyu.

¹⁸Olenyi namerie kuboisa malalamiko ghapo, namanya kukaia nichatalilwa hachi.

¹⁹Kwaawuyanishitakia ee Mlungu? Ikakaia ni huwo, nichanyama kima na kufwa.

²⁰Nineke malagho awi tu, nani sichaakuvisa kwako;

²¹sigha kunikaba, hata kusenioboshe na kiture chako.

²²Niwange, nani nichakudika; leka nidede, na oho kunitumbulie.

²³Makosa ghapo, na kaung'a rapo ni ilinga? Nimanyishe ikosa japo na kaung'a yapo.

²⁴Kwaki kunivisiragha wushu ghwako, na kunitala sa m'maiza wako?

²⁵Welee, kuaniobosha ini niko sa ilemba jidukwagha ni mbeo? Kuaninugha ini niko sa makanda ghiomie?

²⁶Kwaniandikie mashitakio ghibirie, na kunibonya nitiriro kwa wundu ghwa makosa nighibonyere ngelo ya wudawana ghwapo.

²⁷Kwanifunga maghu ghapo na minyororo, kwacheresha kukizighanira milambo yapo, na kubonya alama andu nawadia.

²⁸Mdamu wadasia sa kilambo chiworie, na sa irwao jijilo ni Soya.