Read TAITA BIBLE – Biblia Ilagho Jiboie Kwa Wandu Wose AYUBU 17 Bible Online

AYUBU 17 - TAITA BIBLE – Biblia Ilagho Jiboie Kwa Wandu Wose bible

AYUBU 17

¹“Nalighisa kufwa; kaburi yaawuyaniwesera.

²Loli weko wandu wawuyanidema sare, nani naawuyawizighanira wamaiza wapo.

³“Ini neko mloli ee Mlungu; nirumirie seji nighoragha, ndekuwadie mndungi orumiriana nanimoni.

⁴Kwawifungie akili rawo wisetambukilo, kwa huwo kusewisighe wisime.

⁵Mundu uwusagha ituwo kwa kuwifunya waghenyi wake, wana wake wichapata wasi kwa wundu ghwaro.

⁶“Mlungu wanibonyere nimenyeke wandunyi; wikaniwona wadachwa mada imbiri yapo.

⁷Wasi ghwanibwagha meso, naasighwa maindi maduu.

⁸Wandu wecha washinulwa ni maza iri; wandu wisewadie ikosa wawuka kusimana na awo wisemuichi Mlungu.

⁹Elaima mhachi uchaimaziria chia yake, na uo usewadie ikosa, uchachuria kukaia na ndighi.

¹⁰Ela inyo timenyi sena; sichaawona mndungi uko na hikima aghadi konyu.

¹¹Matuku ghapo ghaidie, mipango yapo yanonekie, na isuwirio japo jeesia.

¹²Awandu wadaghora kio ni dime; ingelo kira chiduagha wadaghora, ‘Mwengere ghwalighisa.’

¹³Isuwirio japo ni Andu kwa Wafu, andu nichaalala akirenyi.

¹⁴Nichaiwanga kaburi aba; na ming'ori inijagha mao na wanidu wa waka.

¹⁵Isuwirio japo jiao sena? Nani wawuyajiwona?

¹⁶Niseanya na ijo isuwirio cha Andu kwa Wafu? Diseanya diwose terinyi?”