Read TAITA BIBLE – Biblia Ilagho Jiboie Kwa Wandu Wose AYUBU 18 Bible Online

AYUBU 18 - TAITA BIBLE – Biblia Ilagho Jiboie Kwa Wandu Wose bible

AYUBU 18

¹Niko Bildadi Mshuhi ukatumbulia:

²“Agha madedo kughimeria lii? Kaia na akili ima diwonededanya.

³Kwaki ditalwagha sa nyamandu, na kuwoneka disena akili kwako?

⁴Kwaawuyakubwagha kumoni na machu ghako. Ndoenyi kwadima kusighwa kwa wundu ghwako? Mighondi yadima kuinjwa andu kwaro eri kukato?

⁵“Mwengere ghwa mmbiwi ghwarimishwa na lumu lwa modo ghwake ndeluakagha.

⁶Mwengere ghuko nyumbenyi kwake ghwawuya kira, na taa iko kaavui nao yarimishwa.

⁷Milambo yake iko na ndighi yawunjwa minyonge; waghushwa ni mipango yake moni.

⁸Maghu ghake moni ghamngira nyavunyi, nao wamara-mara andenyi yaro.

⁹Mdegho ghwammbwada ghimbe; shaghala yammaziria.

¹⁰Wavisirwa lugha andoenyi; wawikilwa mdegho chienyi.

¹¹Wachulwa ni wowa ii chia na ii chia; wakimbirishwa kula andu.

¹²Ndighi rake ramerelwa ni njala, wasi m'baa ghwaawuyammbesera.

¹³Wukongo ghwamjie loli-loli; ghwamerie mikonu yake na maghu ghake.

¹⁴Wafunywa nyumbenyi andu orekaiagha nicha; wafunywa uwonane na Mzuri Kifwa.

¹⁵Modo ghwakorwa nyumbenyi kwake chia rose; kilambo chingi chake ndechiduagha andenyi yaro.

¹⁶Miri yake yaoma nandonyi, na mbashu rake raoma naighu.

¹⁷Ndewuyaakumbukwa ndoenyi; irina jake ndejiwuyaaghorwa isangenyi.

¹⁸Wafunywa mwengerenyi, na kungirwa kirenyi; wawingwa noko kula kufuma wurumwengunyi.

¹⁹Ndewadie wana, hata kivalwa chingi aghadi ya wandu wake. Ndesighie mndungi andu orekoghe ukikaia.

²⁰Kwa wundu ghwa agho ghimpatire, wandu wa magharibi waobua nandighi, na wandu wa mashariki wawadwa ni kiwogho-wogho.

²¹Kwa loli uko niko kutua kwa mundu mmbiwi; huwo niko wandu wisemuichi Mlungu wikaiagha.”