Read TAITA BIBLE – Biblia Ilagho Jiboie Kwa Wandu Wose AYUBU 19 Bible Online

AYUBU 19 - TAITA BIBLE – Biblia Ilagho Jiboie Kwa Wandu Wose bible

AYUBU 19

¹Niko Ayubu ukatumbulia:

²“Munitirira huwu hata lii, mkinibwagha na malagho?

³Shwa kwa shwa mwaawuyanisholia; ndemfwagha waya kunibonyera kiwiwi?

⁴Hata ngera yadakaia loli nakosere, yadakaia ikosa ni japo jeni.

⁵Ikakaia inyo mwakubonya wabaa aighu yapo, na kuserwa kwapo mkakuwunja chia yenyu ebonya nganyi nani,

⁶manyenyi ni Mlungu unibonyere huwu, na kunifunga na nyavu yake.

⁷Iji nakabwa naawuyakema, ela mndungi ndewuyesikira; nawanga nandighi, ela siwuebonyerwa hachi.

⁸Mlungu wanitangalie chienyi niseide; waserie kira chienyi kwapo.

⁹Waniinjire ishima japo, na kunirua wubaa ghwapo.

¹⁰Wanivuchue kula andu ngasia; waniinjire isuwirio japo sa mudi ghwakulwa.

¹¹Wamerie kunibonyera machu mabaa, na kunitala kukaia sa m'maiza wake.

¹²Wanidumie majeshi ghilo nani; wikaagha wurigha ghonirughaia, na kuimara nyumba yapo chia rose.

¹³“Mlungu wabonyere wanidu winileghe, na awo werenimanyireghe wianiwona sa mghenyi.

¹⁴Wakichuku wapo wanisighie, na waghenyi wapo waniliwie.

¹⁵Waghenyi na wai wapo wa kazi wanitala sa mghenyi, naawuyawoneka kwawo sa mundu wa kighenyi.

¹⁶Ngawanga mdumiki wapo ndenidikagha; ngeduamvoya ndenidikagha.

¹⁷Miruke yapo ianuka kiwiwi kwa mkwapo, na wanidu wa mao wakaia kula nani.

¹⁸Wana watini wianimenya, ngawuka, wianiseka.

¹⁹Waghenyi wapo wa ngolonyi wiazamilwa ni ini, na awo nerewikundieghe weewoka kulwa nani.

²⁰Nadarume, ngaasighwa maindi maduu; neekiria kuting'ini.

²¹Niwonienyi wughoma nga wandu, niwonienyi wughoma; neekola nakabwa ni Mlungu!

²²Kwaki mwawuyanitirira huwu seji Mlungu wawuyabonya? Uluma lose mwanitirira ndemkato?

²³“Na wei malagho ghapo ghedeandikwa, ghikaandikwa andenyi ya chuo,

²⁴na wei ghadakotwa aighu ya igho, kwa kalamu ya chuma na risasi, ghadawonekagha kwa kala na kala!

²⁵Ini namanya Mkomboli wapo oko moyo, na kutua uchacha kunivuvua.

²⁶Nyuma ya mrongo ghwapo kunoneka huwu, sana nichammbona Mlungu niko na mumbi ghwapo.

²⁷Nichammbona na meso ghapo gheni; nichamzighana nimoni, hata si mzima anduangi. Ngolo yapo eko na bea saki andenyi kwapo!

²⁸Ikakaia mooghamba munidima wada, na maza iri reeka kwapo koni,

²⁹muobuo lufu, angu lufu lwaawuyakatisha machu gha Mlungu aighu ya kaung'a, mpate kumanya kukaia mtanyi oko aeni.”