Read TAITA BIBLE – Biblia Ilagho Jiboie Kwa Wandu Wose AYUBU 21 Bible Online

AYUBU 21 - TAITA BIBLE – Biblia Ilagho Jiboie Kwa Wandu Wose bible

AYUBU 21

¹Niko Ayubu ukatumbulia:

²“Sikirienyi malagho ghapo nicha; ughu nigho wuhoreshi nilombagha konyu.

³Nirumaghienyi nidede, ngameria kudeda, mdeme sare.

⁴Siwuelalamika aighu ya mdamu; neko na sababu rikate relemwa ni kurumaghia.

⁵Nizighanenyi mshinike, mmbwadie memu yenyu.

⁶Ngaririkanya agho ghinipatire, niaobua; mumbi ghwapo ghuasughusika.

⁷Kwaki wandu wawiwi wikaiagha moyo, wizoghuo na kuchuria kukaia na ndighi?

⁸Wawona wana wawo wikizoghua na kuaghika; wawona weke wawae wiko aeni.

⁹Mizi yadakaia banana isena kiture; ndewipatagha ikabo jingi kufuma kwa Mlungu.

¹⁰Njau rawo nderilemwagha ni kudedia; ng'ombe rawo radaruda, hata nderifushagha anduangi.

¹¹Wadafunya wana wawo shighadi; kusarigha na kuvina sa wana wa ng'ondi.

¹²Wabora wikikaba kayamba na zeze; wasingilwa ni lwaka lwa msherembe.

¹³Watumia matuku ghawo wikiboilwa; wafwa na kuserwa kaburinyi kwa sere.

¹⁴Wandu wawiwi wadamzera Mlungu, ‘Fuma kodu! Ndedikunde kurimanya chia rako.

¹⁵Nani Uo-Uwadie-Ndighi-Rose hata dimdumikie? Dipata fwaidaki dikalombagha kwake?’

¹⁶Waawuyaghesha wei wiakupatira mecha kwa ndighi rawo reni; ini sirumirianagha na maghesho ghawo.

¹⁷“Jingi kwawonie taa ya mmbiwi irimishiro? Jingi kwawonie ungi wawo ukipatwa ni wasi? Jingi Mlungu wamkabie mmbiwi kwa machu ghake?

¹⁸Ni kalinga wikaie sa matasa ghidukwagha ni mbeo, na sa makozi ghidukwagha noko ni kiremba?

¹⁹Mwadaghamba kukaia Mlungu wadakaba mwana kwa wundu ghwa kaung'a ra ndee. Ndekabe waja wandu weni, wipate kumanya wori waakabilwa kaung'a rawo.

²⁰Wakaung'a ndewikabo weni kwa wundu ghwa kaung'a rawo; ndewiwone machu gha Uo-Uwadie-Ndighi-Rose seji ghiko.

²¹Mundu ukameria kufwa, watalagha malagho gha wandu wa nyumba yake uwisighie?

²²Mndungi wadima kumfundisha Mlungu, umoni uwitanyagha hata awo wandu wa veo va ighu?

²³Mndumu uafwa uko na ndighi rake, uko na wulindiri ghukate na raha yose;

²⁴mumbi ghwake ghudendere, ghuaghikie nicha.

²⁵Mndumu uafwa uko na kuwawa ngolonyi; jingi usewonie wucha ghungi.

²⁶Wose wafwa na kurikwa, na wose wajokwa ni ming'ori.

²⁷“Namanya putu seji mwawuyaghesha; mipango enyu ni kunibonya kiwiwi.

²⁸Inyo mwaawuyakotia, ‘Oke ija nyumba ya m'baa eko hao, ija nyumba erekailwagha ni uja mmbiwi?’

²⁹Wele jingi ndemkotere wandu widambagha? Ndemwuerumiria wushuhuda ghwawo.

³⁰Kukaia, mundu mmbiwi nuo ukirwagha ngelo ya ndengwa, na kukaia ingelo Mlungu wakakaba wandu kwa machu ghake, nuo usighwaghwa?

³¹Ndekuwadie mndungi udimagha kumshitakia mundu mmbiwi worinyi, hata kumlipisha kwa wundu ghwa makosa ghake ubonyere.

³²Ngelo wakadukwa cha kaburinyi, kaburi yake yadalindilwa.

³³Wanughwa ni longo lwa wandu wengi; wangirwa kaburinyi na kurikwa.

³⁴Mudima wada kunihoresha na malagho maduu? Kula itumbulio jenyu ni tee nduu.”