Read TAITA BIBLE – Biblia Ilagho Jiboie Kwa Wandu Wose AYUBU 28 Bible Online

AYUBU 28 - TAITA BIBLE – Biblia Ilagho Jiboie Kwa Wandu Wose bible

AYUBU 28

¹“Loli veko vina vekota feza, na koko andu koeleshera dhahabu.

²Chuma chadakotwa andoenyi, na shaba yadayeyushwa kufuma maghonyi.

³Wandu wadang'alisha kira, na kulola magho kondenyi kirenyi chikambie.

⁴Waghenda kula andu mndungi usewadirie jingi; wabonya kazi aho wikichingilila na kamba andenyi vinenyi.

⁵Ndoe yadafunya mavalo gha vindo naighu, ela nandonyi yaro yadamarishwa seji ni kwa modo.

⁶Magho gharo gheko na lulu iwangwaghwa safire na ndoe raro reko na vipande vitini-vitini va dhahabu.

⁷“Nderi ingi ndeimanyire andu aho, hata luwighi lungi ndeluwonie andu dhahabu ikotwagha.

⁸Nyamandu ikudukie ndeiwadirie aho; shimba ingi ndeiidie aho anduangi.

⁹“Mdamu wakotagha igho jikurie nandighi, na kuwudua mighondi na virimba varo.

¹⁰Wakota mruma a maghonyi, na kuwona lulu.

¹¹Wakota andu meda izoiyagha, na kubonya wandu wiwone icho chivisikie.

¹²“Ela hikima iwonekia hao? Na kumanya kufuma hao?

¹³Mdamu ndeichi zoghori ya hikima, hikima ndeiwonekagha wandunyi anduangi.

¹⁴Andu kumilie kwaghora, ‘Ndeiko andenyi kwapo,’ na bahari yaghora, ‘Siko nayo.’

¹⁵Ndeidimagha kughulwa kwa dhahabu, hata kipimo chingi cha feza ndechiko chikatanagha na zoghori yaro.

¹⁶Ndeidimagha kughulwa na dhahabu ieleshero, hata lulu riwangwaghwa oniksi na safire.

¹⁷Ndeidimagha kukatanishwa na dhahabu angu kilole; hata ndeidimagha kuindanishwa na vilambo va dhahabu ielie.

¹⁸Ngola ra baharinyi na kilole nderidimagha kufwananishwa nayo; ighuri ja hikima jachumba lulu.

¹⁹Topazi ya Kushi ndeidimagha kufwananishwa nayo; hikima ndeidimagha kughulwa na dhahabu ielie.

²⁰“Da hikima yafumagha hao sena? Kumanya kwakaiagha hao?

²¹Hikima eeviswa isewono ni mndungi, na nyonyi ra mbeonyi riseimanye.

²²Mnoni na Kifwa waghamba, ‘Isi deesikira na madu gheni.’

²³“Mlungu uekeri nuo uichi chia yaro, nuo uichi andu hikima iwonekagha.

²⁴Uo wadazighana hata kutua kwa ndoenyi; wadawona vilambo vose viko mawingunyi nakosi.

²⁵Iji Mlungu orenekieghe mbeo kudima kwaro, na kuiwikia bahari kipimo chawo,

²⁶iji Mlungu orebonyagha vua inyeghe, na kubonya lukuwa lukabe.

²⁷Niko oreiwonieghe hikima na kuighora; ukaitima na kuimangisha.

²⁸Niko Mlungu ukamzera mdamu, ‘Kuobua kwa BWANA, niyo hikima, na kusigha mawiwi, niko kumanya.’”