Read TAITA BIBLE – Biblia Ilagho Jiboie Kwa Wandu Wose AYUBU 37 Bible Online

AYUBU 37 - TAITA BIBLE – Biblia Ilagho Jiboie Kwa Wandu Wose bible

AYUBU 37

¹“Ngolo yapo yaobua kwa wundu ghwa kiremba, na kukaba kwa ndighi.

²Sikirenyi lwaka lwa Mlungu ludedagha sa lukuwa; sikirenyi mrurumo ghufumagha momunyi kwake.

³Waduma luhehia mawingunyi, na kulangala ndoenyi ii chia na ii chia.

⁴Konyuma mrurumo ghwa lwaka lwake ghwasikirika; lwaka lwa lukuwa ngelo iyo cheni waduma luhehia lung'ale-ng'ale.

⁵Mlungu wadadeda sa lukuwa kwa chia ya mashiniko, nao wadabonya maza mbaa disedimagha kuritambua.

⁶Wadalaghira theluji ipotoke andoenyi, na mshushure ghuwuye vua mbaa.

⁷Wadaghiria kula mundu usebonye kazi yake, eri wandu wose wipate kurimanya kazi rake.

⁸Nyamandu ra isakenyi rakuvisa na kukaia mirumenyi kwawo.

⁹Mbeo ya kiremba yadaacha kufuma kusinyi, na mbeo isukagha yadacha kufuma kaskazinyi.

¹⁰Miruke ya Mlungu yadawadanisha machi, na kughiwunja barafu.

¹¹Wadaghibonya mawingu mabaa ghikaie na machi, nagho ghafunya luhehia.

¹²Waghibonya ghighende iichia na iichia wurumwengunyi, ghipate kukatisha malaghiro ghake ghose.

¹³Mlungu wadanyesha vua kuinyoshera ndoe; wadima kuinyesha kwa kukaba wandu, angu kwa kuwonyera lukundo lwake.

¹⁴“Sikira Ayubu kupime; ririkanya kuwone kazi ra Mlungu ra mashiniko.

¹⁵Kwaichi seji Mlungu ulaghiragha mawingu, na kubonya luhehia lwaro lung'ale-ng'ale?

¹⁶Kwaichi seji mawingu ghimangagha mbeonyi? Iro ni kazi ra mashiniko ra Mlungu, uo uko na kumanya kukatie.

¹⁷Oho kwawuyasumbulwa ni mruke ghwa mbeo ya kusinyi ngelo isumbuagha isanga.

¹⁸Kwadima kumtesia Mlungu kuala mawingunyi, kukaie sa kilole chichanilo cha shaba?

¹⁹Difundishe seji didimagha kumzera Mlungu, isi deeka kira ndedina jeghora.

²⁰Ini sidimagha kulomba nidedanye na Mlungu. Nidima wada kudedanya na uo udimagha kunitotesha?

²¹“Mndungi ndedimagha kuzighana iruwa jiking'ala-ng'ala mawingunyi, nyuma ya mbeo kuweta na ndoe kukombwa.

²²Mlungu wacha kufuma kaskazinyi na kughoka sa kwa dhahabu; wacha na wubaa ghoobosha.

²³Uo-Uwadie-Ndighi-Rose ooka m'baa disedimagha kumvikia; uo ni mloli na mhachi, nao ndekorongagha mndungi anduangi.

²⁴Kwa huwo wandu wadamuobua kwa ishima, nao ndewitalagha wandu wikughesheragha weni kukaia na hikima.”