Read TAITA BIBLE – Biblia Ilagho Jiboie Kwa Wandu Wose AYUBU 40 Bible Online

AYUBU 40 - TAITA BIBLE – Biblia Ilagho Jiboie Kwa Wandu Wose bible

AYUBU 40

¹BWANA ukamzera Ayubu,

²“Oho kusimanagha na Uo-Uwadie-Ndighi-Rose, kwadima kumfunya makosa? Oho kumshitakiagha Mlungu, tumbulia.”

³Niko Ayubu ukamtumbulia BWANA:

⁴“Ini sifwanagha; nikutumbulia wada? Niawadia momu ghwapo ninyame kima.

⁵Namerie kudeda mengi, na idana siwuyaachuria.”

⁶Niko BWANA ukamtumbulia Ayubu andenyi ya mbeo ya kikulughulu:

⁷“Kaia nicha sa mndwawomi, kunitumbulie makoto ghapo.

⁸Kwadima kunitala ini kukaia mkosi? Kwadima kunitanya ini kukaia mkosi eri oho kukaie mhachi?

⁹Kwawadie ndighi sa rapo? Kwadima kudeda na lwaka lubaa sa lwapo?

¹⁰“Basi rwaa wubaa ghwako na ishima; kukupambe nguma na wucha.

¹¹Wizighane wandu wikujosere; wiwonyere machu ghako kuwisere.

¹²Mzighane kula mundu ukujosere kumsere; kuwifashe wawiwi andu koni wiko.

¹³Wirike wose chiaimweri andoenyi; kuwifunge andenyi ya wurumwengu ghwa wafu.

¹⁴Niko na ini nicharumiria kukaia, koko na ndighi rekusimia.

¹⁵“Zighana nyamandu mbaa kiboko; iyo nereiumbieghe seji nikuumbie oho; yadaja nyasi sa ng'ombe.

¹⁶Wona seji iko na ndighi, na chugha rake seji riko na ndighi.

¹⁷Yadakurisha kikomba chake chikaie sa msida; mighenu ya bara rake eelukana.

¹⁸Maindi ghake gheekua sa shaba, na maghu ghake gheekua sa chuma.

¹⁹“Kiboko ni nyamandu eshinua kuchumba rose niribonyere! Muumbi wake tu nuo udimagha kuisima.

²⁰Vindo vake vadabuka mighondinyi, andu nyamandu rose ra isakenyi risarighagha.

²¹Yadadima aisi ya kilemba cha minjwa, na kukuvisa miranginyi akichinyi.

²²Kilemba cha minjwa chaingiria kiju, na midi iko mbai-mbai ya moda yaimara chia rose.

²³Moda ghukeduachua machi gheshorodua ndoe, ndeiobuagha hata machi gha moda sa ghwa Jordani, ghukeduamichika momunyi kwake ndeiturukiagha.

²⁴Mndungi wadima kuiturua meso na kuiwada? Mndungi wadima kuiwada na kudunga mbua yake?