Read TAITA BIBLE – Biblia Ilagho Jiboie Kwa Wandu Wose AYUBU 8 Bible Online

AYUBU 8 - TAITA BIBLE – Biblia Ilagho Jiboie Kwa Wandu Wose bible

AYUBU 8

¹Niko Bildadi Mshuhi ukatumbulia:

²“Kuduaghora agha malagho hata lii, na malagho ghako gheeka sa mbeo mbaa?

³Welee, Mlungu wadalaghasha loli? Angu Uo-Uwadie-Ndighi-Rose wadalaghasha hachi?

⁴Wana wako weem'bonyera Mlungu kaung'a, niko uwisighie wipato ni kiwiwi chawo.

⁵Kukamlola Mlungu, na kumvoya Uo-Uwadie-Ndighi-Rose,

⁶ikakaia kuelie sena kukatie, loli uchakutesia, na kukuneka wulalo mucha ghokaia.

⁷Hata ngera korezoeghe ndonyi, ela matuku ghako ghichagha kuchakaia m'baa nandighi.

⁸“Oho kotia malagho gha hikima ya kala, kumanye seji weke aba werekufundishireghe;

⁹isi deevalwa ighuo koni, hata ndediichi ilagho jingi, na matuku ghedu ndoenyi ghichaida sa kiju.

¹⁰Huwo ndewidimagha kukufundisha, na kukughoria malagho agha wiichi?

¹¹“Welee, maria ghakaiagha andu vichi viseko, na mirangi kubuka andu kusene machi?

¹²Iji iko ikizoghua nao ikaie isedemelo, ikasowa machi yadazoya kunyaya imbiri ya mudi ghungi mzima.

¹³Huwo niko wandu wose wimliwagha Mlungu wiko; isuwirio ja mundu usene kuobua kwa Mlungu jichasia.

¹⁴Uakusaghika na maza ra duu, na irumirio jake ni sa midambo-dambo ya mbughi-mbughi.

¹⁵Rakusaghika na midambo-dambo yawo isedimagha kumanga; rikawadia uzi waro nderitesikiagha.

¹⁶Mundu mmbiwi wakaia sa mudi ghunyoshero machi ghuzoghuagha a iruwenyi, na mbonge raro kuera cha mbuwenyi.

¹⁷Miri yaro yarusana a kitungunyi cha magho, nayo yaghumangisha a maghonyi.

¹⁸Kawona ghwakulwa na kuinjwa, mndungi ndechaamanya wei ghorekoghe aho.

¹⁹Uko niko kuboilwa kwa mundu mmbiwi; wandu wazima wawuka na kuwusa wulalo ghwake.

²⁰“Mlungu ndemleghagha mundu usewadie ikosa, hata ndemtesiagha mundu mmbiwi.

²¹Uchakubonya kukaie na iseko ibaa, na kukema kwa kuboilwa.

²²Uchawifusha waya awo wizamilwagha ni oho, na mizi ya wawiwi ichasia, hema ya mmbiwi ndeichaadua.”