Read TAITA BIBLE – Biblia Ilagho Jiboie Kwa Wandu Wose ZABURI 103 Bible Online

ZABURI 103 - TAITA BIBLE – Biblia Ilagho Jiboie Kwa Wandu Wose bible

ZABURI 103

¹Mkase BWANA ee roho yapo, na irangi japo jose ndejikase irina jake ja wueli.

²Mkase BWANA ee roho yapo, hata kusakeliwa wucha ghwake ghose ukubonyere.

³Uo wadanifuya wughoma kaung'a rapo rose, na kuniboisa makongo ghapo ghose.

⁴Uo wadanilindia nisengie kaburinyi, na kunirasimia kwa lukundo na wughoma.

⁵Wadanighudisha na vindo vicha, eri nikaie mkoo niko na ndighi sa indu.

⁶BWANA uchawidederia na kuwipatira hachi wandu wose wikorongwagha.

⁷Oremmanyishireghe Musa mipango yake; ukawiwonyera wandu wa Israeli mabonyo ghake.

⁸BWANA ni wa wughoma na wa mvono; ndejokwagha ni machu shwa-shwa, nao wachua lukundo lukatie.

⁹Ndedokiagha wandu ngelo rose; ndewikiagha mndungi machu.

¹⁰Ndedikabagha kunughana na kaung'a redu, hata ndedilipiagha kunughana na mawiwi ghedu.

¹¹Sa iji mawingunyi kuko ighu kufuma ndoenyi, huwo koni lukundo lwake ni lubaa kwa awo wimuobuagha.

¹²Wadadiinjira kaung'a redu rikaie kula nesi, sa mashariki na magharibi.

¹³Sa iji koni ndee wana uwiwoniagha wana wake wughoma, niko koni BWANA uwiwoniagha wughoma awo wimuobuagha.

¹⁴Waichi tabia redu; wakumbuka kukaia isi de teri.

¹⁵Irangi ja mdamu jeeka sa nyasi, wazoghua na kuwoneka sa mboi ya mlambenyi;

¹⁶ikawetwa ni mbeo yadasoweka, isewuyaamanyika andu ikoghe.

¹⁷Ela lukundo lwa BWANA lwadua kufuma kala hata kwa kala, kwa awo wimuobuagha, na wucha ghwake ghwadua kwa vivalwa vawo vose,

¹⁸awo wijiwadiagha ilaghano jake, na kuikatisha memu yake.

¹⁹BWANA wachiwikie kifumbi chake cha nguma mlungunyi, nao wadawibonyera nguma wandu wose.

²⁰Mkasenyi BWANA inyo weke malaika wake mmbwadie ndighi, msikiragha malagho ghake, na kuwada agho ughoragha.

²¹Mkasenyi BWANA inyo majeshi ghake ghose, wadumiki wake m'bonyagha lukundo lwake.

²²Mkasenyi BWANA inyo maumbo ghake ghose, andu kose ubonyagha nguma. Mkase BWANA ee roho yapo.