Read TAITA BIBLE – Biblia Ilagho Jiboie Kwa Wandu Wose ZABURI 104 Bible Online

ZABURI 104 - TAITA BIBLE – Biblia Ilagho Jiboie Kwa Wandu Wose bible

ZABURI 104

¹Mkase BWANA ee roho yapo! Ee BWANA Mlungu wapo, koko m'baa nandighi! Kwawadie ishima, na wubaa.

²Kwadarwa mwengere sa nguwo, kwawikie mlungunyi sa hema.

³Kukaagha muzi mawingunyi naighu amachinyi. Kwadatumia marundu sa igare jako, na kughenda aighu ya mawawa gha mbeo.

⁴Kwadatumia mbeo sa wadumwa wako, na luhehia sa wadumiki wako.

⁵Kwaiwikie ndoenyi aighu ya misingi yaro, kukaimangisha gi isedimagha kunyavurika.

⁶Kwaifinikire bahari sa nguwo, na machi ghikafinikira mighondi.

⁷Kwendaghidokia machi, ghikakimbia; kwendaghifunyira momu, ghikaida shwa-shwa.

⁸Ghereserieghe aighu mighondinyi na kungia vololonyi; andu korekuwikieghe ghikaieghe.

⁹Korebonyereghe mwano machi ghisechumbe, ghisechewuyafinikira ndoenyi sena.

¹⁰Kwadabonya ndoria ra machi ribuke vololonyi, na meda iide ghadi na ghadi ya mighondi.

¹¹Raneka nyamandu ra isakenyi machi ghenywa; furo rahoresha kau yawo aho.

¹²Nyonyi ra mbeonyi rabonya vijungi vawo rikibora amidinyi, iko mbai mbai ya meda.

¹³Kwadainyeshera mighondi vua kufuma mawingunyi, na ndoenyi yachua marasimio ghako.

¹⁴Kwadabusa nyasi kwa wundu ghwa mfugho, na miwalwa kwa wundu ghwa mdamu; ulime na kupata vindo ndoenyi;

¹⁵ufunye divei em'bonya uboilo, na mavuda ghem'bonya usisine, na mkate ghomneka ndighi.

¹⁶Misida ya Lebanoni, iyo midi ya BWANA uiwae, yanywa machi kwa wungi.

¹⁷Nyonyi raagha vijungi aho; machachula ghapata andu kokaia misonobarinyi.

¹⁸Sarigha radakaia aighu ya mighondi milacha; njiwu radakuvisa mbangenyi.

¹⁹Kwaghubonyere mori ghuwonyereghe vimu, iruwa jaichi ngelo yake eneng'ena.

²⁰Kwadabonya kira, na nyamandu rose ra isakenyi radafuma nakio.

²¹Shimba ra irika radaruruma rikidiwa, rikilola vindo vawo vifunywagha ni Mlungu.

²²Iruwa jikabuka, radawuya na kudima mirumenyi kwawo.

²³Wandu wadafuma na kughenda kazinyi kwawo, nawo waribonya hata luma lwakenyi.

²⁴Ee BWANA, kwabonyere malagho mengi, kwaghibonyere ghose kwa hikima; ndoenyi kwachua maumbo ghako.

²⁵Bahari heja, mbaa ishabukie; yachue vilambo viko moyo, vitini na vibaa visetalikagha.

²⁶Meli radadamba aighu yaro, na Leviathani, iyo nyamandu mbaa kuibonyere, isarighee aho.

²⁷Ivi vose vaawuyakusuwiria kuvineke vindo vawo kwa ngelo yaro.

²⁸Kukavineka, viawada; kukavifunyira vindo, viaghuda.

²⁹Kukavisigha, viakambwa ni chongo; kukawusa miruke yako, viafwa na kuwuya terinyi kwawo.

³⁰Kukavifuria miruke yako, viakaia moyo, na ndoenyi kuakuwunja kuwishi.

³¹Wubaa ghwa BWANA ndeghuduo kwa kala, BWANA ndeboilo ni kazi rake.

³²Wadazighana ndoenyi, nao kuasughusika; wadaadada mighondi, nao iafukia mosi!

³³Nicham'boria BWANA irangi japo jose; nichamkasa Mlungu wapo ngelo rose niko moyo.

³⁴Uko kumririkanya BWANA kwapo, ndekum'boie, angu nuo unibonyagha niboilo.

³⁵Wakaung'a ndewimerelo ndoenyi, na wawiwi wisakedua. Mkase BWANA ee roho yapo! BWANA ndekaso!