Read TAITA BIBLE – Biblia Ilagho Jiboie Kwa Wandu Wose ZABURI 105 Bible Online

ZABURI 105 - TAITA BIBLE – Biblia Ilagho Jiboie Kwa Wandu Wose bible

ZABURI 105

¹Mnekenyi BWANA chawucha mumtase; ghorienyi wandu wa mbari zima malagho gha mabonyo ghake.

²M'borienyi, mumkase; ghorenyi malagho gha kazi rake rose ra mashiniko!

³Kukasenyi na BWANA; awo wose wimtasagha ndewiboilo.

⁴Ghendenyi kwa BWANA umtesie; lolenyi kukanya nao tulituli.

⁵Kumbukenyi kazi ubonyere ra mashiniko; weke mwakilimbiti wake, na matanyo ghake,

⁶ee kivalwa cha Abrahamu mdumiki wake, na Jakobo msaghulwa wake.

⁷BWANA ni Mlungu odu; matanyo ghake ni kwa wundu ghwa wurumwengu ghose.

⁸Wawuyatala ilaghano jake kwa kala, ijo orejilaghirieghe kwa vivalwa elfu.

⁹Ilaghano orejibonyereghe kwa Abrahamu, ijo ilaghiro oremghemieghe Isaaka.

¹⁰Orejimangishireghe kwa Jakobo jikaie sharia, kwa Israeli jikaie ilaghano ja kala na kala.

¹¹Oreghambieghe, “Nichakuneka isanga ja Kanaani, jikaie ifwa jako.”

¹²Wandu wa Mlungu werekoghe watinieri; waghenyi andenyi ya isanga ja Kanaani.

¹³Werekoghe wikimara-mara masangenyi, kufuma wuzuri ughu hata wuzuri ughu.

¹⁴Mlungu ndererumirieghe mndungi uwikoronge; ukawidokia wazuri kwa wundu ghwawo.

¹⁵Ukighamba, “Msewiadade Wasaghulwa wapo, msakewibonya walodi wapo ilagho jingi.”

¹⁶BWANA ukareda njala isangenyi kwawo; ikameria vindo vose.

¹⁷Ela oredumieghe mundu imbiri kwawo; Josefu, uo oreuziroghe sa mzumba.

¹⁸Orefungiloghe maghu ghake na minyororo; ukangirwa irere singonyi kwake,

¹⁹hata malagho oreghidedieghe ghikakatia. Ilagho ja BWANA jikamshuhudia kukaia mloli.

²⁰Mzuri ukaduma ufungulo; m'bonyi nguma wa wandu ukamfungua.

²¹Ukam'bonya ukaie m'baa serikalinyi yake, na mzighaniri wa isanga jake jose.

²²Ukamneka nguma aighu ya wandu wabaa wa mzuri; uwifundishe wanjama wake hikima.

²³Niko Israeli ukaghenda Misri; ukakaia andenyi ya isanga ja Hamu.

²⁴BWANA ukabonya wandu wake wive kwa wungi; ukawibonya wikaie na ndighi kuchumba wamaiza wawo.

²⁵Ukawibonya Wamisri wizamilo ni wandu wake; wikawibonyera wadumiki wake mikalo.

²⁶Niko ukamduma mdumiki wake Musa, na Haruni uo oremsaghueghe.

²⁷Wikabonya mabonyo gha ndighi gha Mlungu, na weke mwakilimbiti andenyi ya isanga ja Hamu.

²⁸Mlungu ukasera kira isangenyi, ela Wamisri ndeweremsikireghe anduangi.

²⁹Oreghalusireghe machi ghawo ghikawuya bagha; ukaribwagha samaki rawo.

³⁰Isanga jawo jikachulwa ni vichula, hata andenyi ya ngome ya mzuri.

³¹Ukafunya momu, izungu ja izi na sawa rikacha isangenyi jawo jose.

³²Ukawinyeshera vua ya magho wulalo ghwa vua, na luhehia lukakaba isangenyi jawo jose.

³³Ukanona mizabibu na mitini yawo; ukachikanya midi yose.

³⁴Ukafunya momu, zighe rikacha, na wana wa zighe wisena mtalo;

³⁵rikaja midi yose, na vindo vawo vose va mbuwenyi.

³⁶Ukawibwagha wavalwa wa imbiri wa womi wose, agho mavalwa gha imbiri gha ndighi rawo.

³⁷Niko ukawilongoza Waisraeli wikidwa feza na dhahabu; wikafuma wose wiko banana.

³⁸Wiendafuma, Wamisri wikaboilwa, kwa kukaia werekoghe wangilwa ni kiture chawo.

³⁹Mlungu ukawifinikira iwingu; ukawika modo ghowineka mwengere nakio.

⁴⁰Wikalomba, nao ukareda ngwale; ukawineka vindo kufuma mlungunyi kwa wungi.

⁴¹Orefunyireghe machi ighonyi, ghikaida a kireti sa moda.

⁴²Orekumbukieghe ilaghiro jake ja wueli, kwa mdumiki wake Abrahamu.

⁴³Kwa huwo ukawilongoza wandu wake kwa kuboilwa; ukawighenja wasaghulwa wake wikibora.

⁴⁴Ukawineka isanga ja wandu wa mbari zima; wikawusa mavalo gha kazi ra awo wandu;

⁴⁵eri wandu wake widime kuriwada sharia rake, na kusikira malaghiro ghake. BWANA ndekaso!