Read TAITA BIBLE – Biblia Ilagho Jiboie Kwa Wandu Wose ZABURI 106 Bible Online

ZABURI 106 - TAITA BIBLE – Biblia Ilagho Jiboie Kwa Wandu Wose bible

ZABURI 106

¹BWANA ndekaso! Mfunyirenyi BWANA chawucha angu ni mucha; lukundo lwake lukatie lwadua kwa kala.

²Nani udimagha kughora mabonyo ghose gha ndighi BWANA ughibonyere? Nani udimagha kumkasa kwa kukata?

³Warasimilwa awo wiitalagha hachi, na kubonya agho ghiko gha loli ngelo rose.

⁴Kukawibonyera wandu wako mecha na ini kunikumbuke ee BWANA; kunitale ingelo kwakawikira.

⁵Kunineke kuwona mecha gha wandu wako, nipate kuboilwa chiaimweri na mbari yako, na kukukasa chiaimweri na ifwa jako.

⁶Dabonyere kaung'a sa weke wawa; dakosere, dikabonya mawiwi.

⁷Iji weke wawa werekoghe Misri, ndeweretalieghe kazi rako ra mashiniko; ndewerekumbukieghe wungi ghwa lukundo lwako lukatie, ela wikamlegha Uo-Uko-Aighu-Nandighi aja Bahari ya Shamu.

⁸Ela orewikirieghe sa iji koni orelaghirieghe; upate kuwonyera ndighi rake mbaa.

⁹Orefunyireghe momu, Bahari ya Shamu ikaoma; ukawiisa andu korekoghe kumilie, seji ni kireti.

¹⁰Ukawikira na awo werewizamiagha; ukawivuvua kufuma kwa wamaiza wawo.

¹¹Wamaiza wawo wikamilwa ni machi; nderesigharikieghe hata umweri.

¹²Niko wandu wake wikajirumiria ilagho jake; wikam'boria makaso.

¹³Ela shwa wori wikaliwa kazi rake, wikabonya malagho kuseko na njama yake.

¹⁴Werengiriloghe ni bea izamie kireti, wikamtima Mlungu;

¹⁵Mlungu ukawineka icho werelombieghe, ela ukawiredia wukongo ghowidarumisha.

¹⁶Werewadiloghe ni iriso ja Musa kireti, na Haruni uo mdumiki wa BWANA uelie.

¹⁷Ndoe ikabeka, ikammila Dathani; ikamrika Abiramu na wandu wake.

¹⁸Modo ghukabuka aghadi ya wanughi wawo, ghukawikora awo wandu wawiwi.

¹⁹Werebonyereghe ngache ya dhahabu aho Sinai, wikaitasa iyo fwana ichanilo.

²⁰Wikaindanisha wubaa ghwa Mlungu na fwana ya ng'ombe ijagha nyasi.

²¹Weremliwieghe Mlungu uo orewikirieghe Misri, kwa mabonyo ghake gha ndighi.

²²Orebonyereghe kazi ra mashiniko isanga ja Hamu, na maza reobosha Bahari ya Shamu.

²³Mlungu ughamba uawitotesha wandu wake, Musa uo mdumiki wake usaghulo ukamkania; ukahoresha machu ghake usewitoteshe.

²⁴Niko werejileghieghe ijo isanga jiboie, kwa kukaia weresowieghe irumirio na ilaghiro jake.

²⁵Wikakaia andenyi hemenyi kwawo wikizughunuka, wikalegha kumsikira BWANA putu.

²⁶Kwa huwo ukaghema kukaia uchawisigha wifo kireti.

²⁷Uchachisigha kivalwa chawo chighende kwa mbari zima, na kuwisaghisa andenyi ya masanga gha kighenyi.

²⁸Niko wandu wa Mlungu wikangia kutasa mlungu ghuwangwagha Baali aja Peori, wikaja vizongona vifunyiro kwa milungu.

²⁹Weremjosereghe BWANA machu, kwa wundu ghwa mabonyo ghawo; wikachelwa ni saka ya ngawawi.

³⁰Niko Finehasi ukawuka kimusi, ukawineka wakosi adhabu; na kutanya ijo ilagho, saka ya ngawawi ikasia.

³¹Ijo ilagho jikam'bonya Finehasi utalo kukaia na hachi, kivalwa hata kivalwa kwa kala na kala.

³²Werebonyereghe BWANA ukajokwa ni machu machinyi gha Meriba; Musa ukapatwa ni malagho kwa wundu ghwawo.

³³Wereleghieghe kumsikira Roho wa Mlungu; Musa ukadeda kisha.

³⁴Ndewerewitoteshereghe wandu wa Kanaani; seji BWANA orewilaghirieghe;

³⁵wikakuranganya nawo, na kukufundisha mabonyo ghawo.

³⁶Wandu wa Mlungu wikatasa milimu ikawishekeria kutota.

³⁷Wikafunya wana wawo wa womi na wa waka wikaie vizongona kwa pepo.

³⁸Wikabwagha wana wawo wisewadie ikosa jingi; wikawifunya wana wawo vizongona kwa milimu ya Kanaani, ndoe ikalushwa ni uko kubwagha.

³⁹Wikakulusha weni kwa mabonyo ghawo, wikasowa kukaia waloli kwa Mlungu.

⁴⁰Niko BWANA ukajokwa ni machu aighu ya wandu wake; wikamzamia na ndighi.

⁴¹Ukawisigha wisimo ni wandu wa mbari zima; wikabonyerwa nguma ni wamaiza wawo.

⁴²Wamaiza wawo wikawikoronga, na kuwiwika aisi yawo.

⁴³BWANA orewivuvueghe wandu wake mando mengi, ela weresaghueghe kumlegha, na kughenda ndenyi kaung'enyi.

⁴⁴Elaima, iji weremkemieghe BWANA orewisikireghe.

⁴⁵Kwa wundu ghwawo, ukakumbuka ilaghano jake, na kwa wundu ghwa lukundo lwake lukatie, ukahoresha machu ghake.

⁴⁶Ukawibonya wakorongi wawo wiwiwonie wughoma.

⁴⁷Dikire ee BWANA Mlungu odu, kudiwunje kufuma kwa mbari zima, dipate kukufunyira chawucha na kujikasa irina jako ja wueli.

⁴⁸Mkasenyi BWANA, uo Mlungu wa Israeli; mkasenyi idana na kwa kala na kala. Kula mundu ndeghambe, “Amen!” BWANA ndekaso!