Read TAITA BIBLE – Biblia Ilagho Jiboie Kwa Wandu Wose ZABURI 107 Bible Online

ZABURI 107 - TAITA BIBLE – Biblia Ilagho Jiboie Kwa Wandu Wose bible

ZABURI 107

¹Mfunyirenyi BWANA chawucha, angu ni mucha; lukundo lwake lukatie lwadua matuku ghose!

²Wurienyi agho malagho ghemkasa BWANA; inyo mmbose mkirilo ni BWANA. Wamvuvue kufuma kwa wamaiza wenyu

³na kummbunja kufuma masanga gha kighenyi, kufuma mashariki, na magharibi; kufuma kaskazinyi na kusinyi.

⁴Wamu werekoghe wikimara-mara a ikarenyi, hata ndewerewonieghe chia eghenda mzinyi andu kokaia.

⁵Werekoghe na njala na kau; wikasirilwa ni isuwirio putu.

⁶Niko wikamkemia BWANA kwa wasi ghwawo, nao ukawikira.

⁷Ukawilongoza na chia ighorokie, hata wikavika muzi wikunde wikaie.

⁸Ndewimfunyire BWANA chawucha kwa wundu ghwa lukundo lwake lukatie, na kwa wundu ghwa kazi rake ra mashiniko uwibonyere.

⁹Wadawihoresha wiko na kau, na awo wiko na njala, wadawighudisha na vindo vicha.

¹⁰Wamu werekoghe na wasi andenyi ya kira kibaa; wafungwa witirirwagha kwa kufungwa na minyororo,

¹¹angu wereleghieghe malagho gha Mlungu, na kuimenya njama ya Uo-Uko-Aighu-Nandighi.

¹²Werefueghe ngolo kwa wundu ghwa kazi rilemere; wikaghwa andonyi, mndungi ukasoweka owiwusira.

¹³Niko wikamkemia BWANA kwa wasi ghwawo, nao ukawikira.

¹⁴Ukawifunya wasinyi andenyi ya kira kibaa, na kudumbua minyororo yawo vipande vipande.

¹⁵Ndewimfunyire BWANA chawucha kwa wundu ghwa lukundo lwake lukatie, na kwa wundu ghwa kazi rake ra mashiniko uwibonyere.

¹⁶Angu wadabara minyango ya shaba, na kudumbua mirigho ya chuma vibelele viwi.

¹⁷Wamu werekoghe wakelu; wikatiririka kwa wundu ghwa mawiwi na kaung'a rawo.

¹⁸Wikazamilwa ni vindo vose; wikakaia kaavui na kufwa.

¹⁹Niko wikamkemia BWANA kwa wasi ghwawo, nao ukawikira.

²⁰Ukawiboisa kwa ilagho jake; ukawikira wisetote.

²¹Ndewimfunyire BWANA chawucha kwa wundu ghwa lukundo lwake lukatie, na kwa wundu ghwa kazi rake ra mashiniko uwibonyere.

²²Ndewimfunyire vizongona va chawucha, na kughora malagho gha mabonyo ghake kwa chumbo na kuboilwa.

²³Wamu wadambie na meli baharinyi, wikibonya biashara aighu ya machi mengi.

²⁴Wawonie kazi ra BWANA ra mashiniko, aighu ya machi ghimilie.

²⁵Orefunyireghe momu, mbeo ya kiremba ikazoya kuweta; ikawusira mivo-mivo ya bahari.

²⁶Meli rikawusirwa noko ighu, rikaserwa noko ndonyi; wandu wikafwa ngolo kwa wundu ghwa ndengwa.

²⁷Wikawalalia na kutatarika sa wawongeri; akili rawo rikawisiria.

²⁸Niko wikamkemia BWANA kwa wasi ghwawo, nao ukawikira.

²⁹Ukanyamirisha kiremba, na mivo-mivo ya bahari ikahoa.

³⁰Wikaboilwa kwa ndoe kuhoa, nao ukawivikisha andu werekundieghe kughenda.

³¹Ndewimfunyire BWANA chawucha kwa wundu ghwa lukundo lwake lukatie, na kwa wundu ghwa kazi rake ra mashiniko uwibonyere.

³²Ndewimkume aghadi ya izungu ja wandu, na kumkasa andenyi ya ikwanyiko ja waghosi.

³³BWANA wadaomera meda iwuye ikara, na ndoria ra machi riwuye ndoe iomie;

³⁴wadaghalua ndoe inorie iwuye ya munyu, kwa kushekerelwa ni wuwiwi ghwa waisanga waro.

³⁵Wadaghalua makara ghiwuye viriwa va machi, na ndoe iomie iwuye ndoria ra machi.

³⁶Wadawisigha wandu wiko njala wikaie aho nawo wadaagha muzi ghokaia.

³⁷Wadawa mbuwa na kutula mizabibu, na kukuwida mavalo kwa wungi.

³⁸Wadawirasimia wandu wake wichurikie kwa wungi, na mfugho rawo nderisighagha ripunguo.

³⁹Iji wandu wa Mlungu wasimwa na kuwunjwa wa ndonyi, kwa chia ya matiriro na wasi,

⁴⁰wawimenyesha wabaa wa awo werewikorongagha, na kuwibonya awo wabaa wimare-mare a makarenyi ghisewadie chia.

⁴¹Ela wadawivuvua awo wisowagha wifume matirironyi ghawo, na kuvibonya vinyumba vawo vichurikie sa ng'ondi.

⁴²Wahachi wawonie na kuboilwa, na wawiwi wanyamirwa.

⁴³Uo ose uko na hikima nderirikanye agho malagho, wandu ndewilutale lukundo lukatie lwa BWANA.