Read TAITA BIBLE – Biblia Ilagho Jiboie Kwa Wandu Wose ZABURI 109 Bible Online

ZABURI 109 - TAITA BIBLE – Biblia Ilagho Jiboie Kwa Wandu Wose bible

ZABURI 109

¹Ee Mlungu nikukasagha, kusakenyama kima.

²Wawiwi na watee, waawuyadeda kiwiwi aighu yapo wikinizighiria.

³Wanighora kiwiwi, na kuningiria duu.

⁴Hata ngera nawikunde, na kuwilombia, ela waawuyanishitakia.

⁵Kwa huwo waawuyanilipa kiwiwi kwa nicha yapo, na kuzamilwa ni ini kwa wundu ghwa lukundo lwapo.

⁶Saghuonyi mundu mmbiwi usimane nao; m'maiza wa uo mbiwi ndemshitakie.

⁷Ukatanywa, ndewoneke kukaia mkosi; malombi ghake ndeghitalo kukaia kaung'a!

⁸Matuku ghake ndeghisie shwa-shwa; na mundu mzima ndewade wulalo ghwake!

⁹Wana wake ndewiwuye wakiwa, na mkake uwuye mka-mkiwa!

¹⁰Wana wake ndewiwuye walombi wemara-mara; ndewiwingo wifume maghachonyi wawuyakaia.

¹¹Msile wake ndewade vilambo vake vose; waghenyi ndewiwuse vilambo vake uvidumikie.

¹²Mndungi usemmbonie wughoma, hata kuwadwa ni wughoma ghwa wana wake wakiwa!

¹³Kivalwa chake ndechisie, na irina jake jiliwike kivalwa cha kawi.

¹⁴Makosa gha weke wawae ndeghikumbuko imbiri ya BWANA, na kaung'a ra mae riseleko.

¹⁵BWANA nderikumbukeghee kaung'a rawo kari kose, nawo wiliwike ndoenyi putu.

¹⁶Mundu uo nderekoghe na wughoma ghungi, wawikorongie na kuwibwagha wakiwa, awo wisowagha, na wandu wisewadie wutesia ghungi.

¹⁷Orekundeghe kuwasira njowe; ndewado ni njowe moni! Nderekundeghe kurasimia; mndungi usemrasimie!

¹⁸Odeeka ukiwasira njowe ngelo rose; njowe nderingie mumbinyi sa machi unywagha.

¹⁹Iro njowe nderimfinikire sa nguwo, na sa mkowa ukufungagha nagho kula ituku.

²⁰Maza iro nderikaie malipo gha BWANA kwa washitaki wapo, awo widedagha kiwiwi aighu yapo.

²¹Ela oho ee MLUNGU Bwana wapo, kunibonyere mecha sa iji korelaghirieghe; kunikire, kwa wundu ghwa lukundo lwako lukatie.

²²Ne mkiwa usowagha, nawawilo ngolo ikachumba.

²³Niaida noko sa kiju cha luma lwa kenyi, niadukwa noko sa zighe.

²⁴Vitemberu vapo viateweleka kwa kufunga tumu; neesighwa maindi maduu.

²⁵Nawuya sa kilambo chesekwa kwa washitaki wapo, wianisughusira vongo kwa lumenyo.

²⁶Kunitesie ee BWANA Mlungu wapo! Kunikire kunughana na lukundo lwako lukatie.

²⁷Kuwibonye wamaiza wapo wimanye kukaia ni oho kunikiragha.

²⁸Ndewiwasire njowe, ela oho kurasimie! Watiriri wapo ndewisimo, na ini mdumiki wako niboilo.

²⁹Washitaki wapo ndewiinjiro ishima, wiro waya ghwawo sa ikoti.

³⁰Nichamfunyira BWANA chawucha mbaa; nichamkasa aghadi ya wandu wengi,

³¹kwa kukaia wadamdederia uo usowagha, na kumkira na wandu wimtanyagha kufwa.