Read TAITA BIBLE – Biblia Ilagho Jiboie Kwa Wandu Wose ZABURI 115 Bible Online

ZABURI 115 - TAITA BIBLE – Biblia Ilagho Jiboie Kwa Wandu Wose bible

ZABURI 115

¹Disakenekwa wubaa ee BWANA, isi disakenekwa; ela oho kuneko wubaa, kwa wundu ghwa lukundo lwako lukatie, na wuloli ghwako.

²Kwaki iro mbari ridizeragha, “Mlungu onyu oko hao?”

³Mlungu odu oko mlungunyi, wadabonya ijo jose ujikundagha.

⁴Milimu yawo ni feza na dhahabu, kazi ra mikonu ya wandu.

⁵Yawadie memu, ela ndeidedagha; yawadie meso, ela ndeiwonagha.

⁶Yawadie madu, ela ndeisikiragha; eko na mbua, ela ndeinusagha.

⁷Yawadie mikonu, ela ndeiadadagha; eko na maghu, ela ndeighendagha; hata ndeifunyagha lwaka.

⁸Awandu wiibonyagha na awo wiirumiriagha, wichafwanana nayo.

⁹Mrumirienyi BWANA inyo wandu wa Israeli; uo ni mtesia onyu na mlindiri onyu.

¹⁰Mrumirienyi BWANA inyo wakohani wa Mlungu; uo ni mtesia onyu na mlindiri onyu.

¹¹Mrumirienyi BWANA inyo mmbose mumuobuagha; Uo ni mtesia onyu na mlindiri onyu.

¹²BWANA wawuyadikumbuka, nao uchadirasimia; uchawirasimia wandu wa Israeli, na wakohani wa Mlungu wose.

¹³Uchawirasimia awa wimuobuagha BWANA, watini na wabaa wori.

¹⁴BWANA ndekubonye kuchurikie, chiaimweri na kivalwa chako.

¹⁵BWANA, uo uumbie mlungunyi na ndoenyi ndekurasimie.

¹⁶Mlungunyi ni kwa BWANA, ela ndoenyi ookuneka wadamu.

¹⁷Wafu ndewimkasagha BWANA, hata mndungi useagha andu kwa awo winyame kima.

¹⁸Ela isi diko moyo, dichamkasa BWANA kufuma idana hata kwa kala na kala. BWANA ndekaso!