Read TAITA BIBLE – Biblia Ilagho Jiboie Kwa Wandu Wose ZABURI 116 Bible Online

ZABURI 116 - TAITA BIBLE – Biblia Ilagho Jiboie Kwa Wandu Wose bible

ZABURI 116

¹Namkunde BWANA angu unisikiragha; wasikire malombi ghapo na kuvoya kwapo.

²Wadanisikira kula ngelo nimlombagha.

³Kwa chia rose nedeeka ndengonyi ya kufwa; wowa ghwa kaburi ghorenipatireghe; ngachulwa ni wowa na kukambwa ni chongo.

⁴Niko ngammbanga BWANA: “Ee BWANA nakuvoya kunikire!”

⁵BWANA ni wa mvono, sena ni mhachi; Mlungu odu ni wa wughoma.

⁶BWANA wadawilindia wandu wa ndonyi; orenikirieghe iji nerekoghe ndeghonyi.

⁷Hora ee roho yapo; BWANA wakubonyere maza ndicha.

⁸BWANA wanikirie na kifwa; ukaninyamira niselile; ukanidimisha nisesimo.

⁹Naawuyaghendanya na BWANA, andenyi ya wurumwengu ghwa wandu wiko moyo.

¹⁰Neremazireghe irumirio japo, hata ngera nerekoghe ngighamba, “Nakorongeka nandighi;”

¹¹hata ngera nerekoghe nangilwa ni wowa na kughamba, “Ndeidimikagha kuwuyarumiria mndungi.”

¹²Nimnekaki BWANA kwa wucha ghwake ghose unibonyere?

¹³Nichamfunyira BWANA mafunyo gha divei, nimfunyire chawucha kwa wundu ghwa kunikira.

¹⁴Nichalipa maghemi ghapo kwa BWANA, imbiri ya wandu wake wose.

¹⁵Kifwa cha waeli wa BWANA, ni cha zoghori mbaa imbiri kwake.

¹⁶Ee BWANA ne mdumiki wako; ne mdumiki naawuyakudumikia sa iji koni orekoghe ukibonya. Kwanikirie kifonyi.

¹⁷Nichakufunyira kizongona cha chawucha na kubonya malombi ghapo kwako.

¹⁸Nichalipa maghemi ghapo kwako BWANA imbiri ya wandu wako wose,

¹⁹wazenyi ya Hekalu iko ghadi na ghadi ya muzi ghwa Jerusalemu. BWANA ndekaso!