Read TAITA BIBLE – Biblia Ilagho Jiboie Kwa Wandu Wose ZABURI 119 Bible Online

ZABURI 119 - TAITA BIBLE – Biblia Ilagho Jiboie Kwa Wandu Wose bible

ZABURI 119

¹Warasimilwa awo wisewadie ikosa jingi, widuagha moyo kwa kunugha sharia ya BWANA.

²Warasimilwa awo wiiwadiagha memu yake, awo wimlolagha BWANA kwa ngolo yawo yose.

³Ndewibonyagha makosa, ela wadaghenda kwa chia ya BWANA.

⁴BWANA kwadinekie sharia rako, kukadizera diriwadie nicha.

⁵Yakaiagha nicha saki ngera nadawadia malaghiro ghako;

⁶sadimagha kufushwa waya, ngiimaziria memu yako.

⁷Nichakukasa kwa ngolo ndicha, ngikufundisha sharia rako na hachi.

⁸Nichariwadia sharia rako, kusakenisigha putu.

⁹Mdawana udima wada kukaia na irangi jielie? Ni kwa kuriwadia Sharia rako.

¹⁰Nadakulola kwa ngolo yapo yose; kusenisighe ngighenda kula na memu yako.

¹¹Najiwikie Ilagho jako ngolonyi kwapo, nisechekubonyera kaung'a.

¹²Nakukasa oho ee BWANA; kunifundishe sharia rako.

¹³Nadaghora malagho ghose kudedie.

¹⁴Nadaboilwa ni kuinugha memu yako, kuchumba kukaia na mali nyingi.

¹⁵Nichakaia ngighiririkanya mafundisho ghako, na kughizighana mawonyero ghako.

¹⁶Nadaboilwa ni sharia rako; sichaaliwa memu yako.

¹⁷Kaia mucha kwapo ini mdumiki wako, nipate kukaia moyo na kujiwadia ilagho jako.

¹⁸Kunitambuo meso ghapo, eri nipate kuwona maza ra mashiniko riko andenyi ya sharia yako.

¹⁹Ini ne mghenyi ndoenyi, kusenivise sharia rako.

²⁰Nabwaghwa ni bea emanya matanyo ghako.

²¹Kwawidokia wang'eti; wandu wiwadilo ni njowe, wisesikiragha malaghiro ghako.

²²Kuniinjire kumenya kwawo na kuseka kwawo, angu naiwadia memu yako.

²³Hata ngera wabaa wanideda njama, ini mdumiki wako nichariririkanya sharia rako.

²⁴Memu yako yadaniboia, niyo njama yapo.

²⁵Nasimwa ngaghwa a terinyi, kuniwusire kunughana na ilagho jako.

²⁶Niendaghora agho nibonyere, korenitumbulieghe; kunifundishe sharia rako.

²⁷Kunidimishe kutambukilwa ni mafundisho ghako, nani nichariririkanya kazi rako ra mashiniko.

²⁸Wasi ghwanichumba ndighi; kunifungishe ndighi kunughana na ilagho jako.

²⁹Kuniwike kula na mikalo, na kwa wucha ghwako kunifundishe sharia yako.

³⁰Nasaghua kukaia mloli; naghisikiria matanyo ghako nicha.

³¹Naimaziria memu yako ee BWANA, kusakenisigha nifusho waya.

³²Nichaghiwadia malaghiro ghako kwa kufunga ndighi, kwa kukaia oho kuchachuria kunitambushira.

³³Kunifundishe nitambukilo ni sharia rako, ee BWANA, nani nichariwadia hata kutua.

³⁴Kunineke kutambukilwa, nipate kuiwadia sharia yako, na kuinugha kwa ngolo yapo yose.

³⁵Kunibonye niiwadie memu yako, angu iniboiagha nandighi.

³⁶Kunineke bea ewadia sharia rako, kuchumba kupata mali.

³⁷Kunibonye nisezighane maza ra duu, kunikaishe moyo kwa kuinugha chia yako.

³⁸Katisha ilaghiro jako kwapo ini mdumiki wako, ijo kuwibonyeragha awo wikuobuagha oho.

³⁹Kunikire na masholio nawuyaghiobua, angu mawonyero ghako ni mecha.

⁴⁰Neko na bea mbaa ya mafundisho ghako, na kunikira irangi kwa hachi yako.

⁴¹BWANA, niwonyere seji kunikunde; kunikire kunughana na ilaghiro jako.

⁴²Niko nichaadima kuwitumbulia awo winisekagha, kwa kukaia najirumiria ilagho jako.

⁴³Kunidimishe kughora loli ngelo rose, angu naawuyaghisuwiria matanyo ghako.

⁴⁴Nichaiwadia sharia yako tulituli, kwa kala na kala;

⁴⁵nani nichadua moyo kwa wuhuru, angu naghinugha mafundisho ghako.

⁴⁶Sena nichawighoria wazuri memu yako, hata sichaafwa waya anduangi.

⁴⁷Nadaboilwa ni memu yako, iyo niikunde.

⁴⁸Nadaineka ishima na kuikunda memu yako, nani nichariririkanya sharia rako.

⁴⁹Kumbuka ilaghiro korenibonyereghe ini mdumiki wako; kwanibonyere nisuwirieghe andenyi yaro.

⁵⁰Ijo ilaghiro jako jadanihoresha matirironyi; kwa kukaia jadanineka irangi.

⁵¹Wandu wikukasire wadaniseka, ela sichaaisigha sharia yako anduangi.

⁵²Ngakumbuka mawonyero ghako gha kufuma kala ee BWANA, nadahoreshwa ngolo.

⁵³Ngawona wawiwi wikiinona Sharia yako, nadajokwa ni machu nandighi.

⁵⁴Nadadunga chumbo kunughana na sharia rako, iji niko andenyi ya irangi ja ndoenyi.

⁵⁵Nadakukumbuka nakio ee BWANA, na kuighesha sharia yako.

⁵⁶Nadakukumbuka nakio ee irasimio, kwa kunugha mafundisho ghako.

⁵⁷Neeka na oho kumoni ee BWANA; nalaghira kughiwadia malagho ghako.

⁵⁸Nalomba kwa ngolo yapo yose, kunirumirie; kuniwonie wughoma kunughana na ilaghiro jako.

⁵⁹Ngakupima ini moni na chia rako, nialaghira kuinugha memu yako.

⁶⁰Nadashashira hata simukagha kuiwadia memu yako.

⁶¹Hata ngera wawiwi wanideghia shaghala, sichaaliwa sharia yako anduangi.

⁶²Nadawuka kio ghadi nikukase oho, kwa wundu ghwa matanyo ghako gha hachi.

⁶³Ini ne mngara wa wandu wose wikuobuagha oho, na wose wighinughagha mafundisho ghako.

⁶⁴Ndoenyi kwachulwa ni lukundo lwako lukatie ee BWANA; kunifundishe sharia rako.

⁶⁵Kwanibonyera nicha ini mdumiki wako ee BWANA, kunughana na ilagho jako.

⁶⁶Kunifundishe kumanya na kutanya nicha, angu nairumirie memu yako.

⁶⁷Imbiri kuseninekie ikabo, nerekoghe ngighenda kisha; ela idana najiwadia ilagho jako.

⁶⁸Oho koko mucha sena kwadabonya nicha; kunifundishe sharia rako.

⁶⁹Wandu wikukasire wadanighora kwa tee, ela ini nadaghiwadia mafundisho ghako kwa ngolo yapo yose.

⁷⁰Ni wandu wifue vongo; ela ini nadaboilwa ni sharia yako.

⁷¹Ni nicha kwapo angu koreninekieghe ikabo, nipate kukufundisha sharia rako.

⁷²Sharia kuifunyire yawuyaniboia, kuchumba maelfu gha feza na dhahabu.

⁷³Ni oho kuniumbie kukaniwika banana; kunineke kumanya, nipate kukufundisha memu yako.

⁷⁴Awo wikuobuagha oho wichaniwona na kuboilwa, kwa kukaia najisuwiria ilagho jako.

⁷⁵Namanya ee BWANA kukaia kutanya kwako ni kwa hachi, na angu kwaninekie ikabo kwa hachi.

⁷⁶Lukundo lwako lukatie ndelunihoreshe, seji korenilaghirieghe ini mdumiki wako.

⁷⁷Kunifuye wughoma, nipate kukaia moyo, angu nadaboilwa ni sharia yako.

⁷⁸Awandu wikukasire ndewifusho waya, kwa kunizighiria; ini nichadua ngighiririkanya mafundisho ghako.

⁷⁹Awo wikuobuagha oho ndewinighalukie, wipate kuimanya memu yako.

⁸⁰Kunibonye niiwadie memu yako putu, nisechefushwa waya.

⁸¹Nawesera kunikire ngasilwa ni ndighi. Nadasuwiria ilagho jako.

⁸²Nazighanira ngasilwa ngiweseria ilaghiro jako. Naawuyakotia, “Ni lii kuchaanihoresha?”

⁸³Neewuya sa kiriba cha divei chiko mosinyi, ela sena siliwie sharia rako.

⁸⁴Nirumaghia hata lii ini mdumiki wako? Ni lii kuchaawitanya awandu wawuyanitirira?

⁸⁵Wandu wikukasire wisewuyeinugha sharia yako, wanikotera vina venichunua.

⁸⁶Memu yako yose ni erumirilwa; wandu waawuyanitirira kwa kunizighiria; kunitesie!

⁸⁷Wadaamba winibwaghe, ela sicheesigha memu yako.

⁸⁸Nikire kwa wundu ghwa lukundo lwako lukatie, eri nipate kuiwadia memu yako.

⁸⁹Ilagho jako jichadua kwa kala na kala ee BWANA, ni ja kala na kala mlungunyi.

⁹⁰Wuloli ghwako ghwadua kwa vivalwa vose, nagho ghwadua ghumange.

⁹¹Vilambo vose vadakaia kwa nguma rako hata idime; vose vadakudumikia.

⁹²Na wei serekoghe ngiboilwa ni sharia yako, kumangu nabwaghilo ni matiriro ghapo.

⁹³Na jingi sichaaliwa mafundisho ghako, kwa kukaia nigho kuniwikie nagho moyo.

⁹⁴Nikire angu ne wako, kwa kukaia natimie kughiwadia mafundisho ghako.

⁹⁵Wawiwi waawuyanilaliria winitoteshe, ela ini, nichakaia ngiiririkanya memu yako.

⁹⁶Nawonie vilambo vose vaghosiagha, ela malaghiro ghako gheeka ghikatie.

⁹⁷Sharia yako naikunde nandighi; nadasindairirikanya dii.

⁹⁸Nadaghuwadia momu ghwako toe, nagho ghwadanibonya nikaie na hikima kuchumba wamaiza wapo.

⁹⁹Neko na kumanya kuchumba walimu wapo wose, angu nadasindairirikanya memu yako.

¹⁰⁰Nawuyaelelwa kuchumba waghosi, angu nawuyaghiwadia mafundisho ghako.

¹⁰¹Nasighie kula ilagho iwiwi, eri nijiwadie ilagho jako.

¹⁰²Sisighagha mawonyero ghako, angu kunifundishire.

¹⁰³Malagho ghako ghadanisingia nandighi! Ghanisingiagha kuchumba wuki.

¹⁰⁴Nadapata suku kufumanya na mafundisho ghako, kwa huwo nadazamilwa ni malagho gha tee.

¹⁰⁵Ilagho jako ni taa enighenja, na mwengere chienyi kwapo.

¹⁰⁶Nabonyere ighemi ngajimangisha, jewadia mawonyero ghako gha hachi.

¹⁰⁷BWANA matiriro ghapo ni mabaa nandighi; kunikaishe moyo seji korelaghirieghe.

¹⁰⁸Kurumirie malombi ghapo gha chawucha ee BWANA; kunifundishe memu yako.

¹⁰⁹Irangi japo jadakaia ndengonyi tuli tuli, ela siiliwie sharia yako anduangi.

¹¹⁰Wawiwi wanideghie shaghala, ela silagharilo ni mafundisho ghako anduangi.

¹¹¹Memu yako ni ifwa japo kwa kala, ni kuboilwa kwa ngolo yapo.

¹¹²Nadumbue malagho ghekatisha sharia rako hata kutua kwa irangi japo.

¹¹³Nadazamilwa ni waji kuwi, ela naikunde sharia yako.

¹¹⁴Oho ko mzighaniri wapo na mlindiri wapo; naawuyasuwiria ilagho jako.

¹¹⁵Injikenyi kwapo inyo wabonyi kiwiwi, nipate kughiwadia malaghiro gha Mlungu wapo.

¹¹⁶Kunimazire kunughana na ilaghiro jako, nipate kukaia moyo; kusakenisigha nifusho waya andenyi ya ijo isuwirio japo.

¹¹⁷Niwadie, nipate kukaia banana; niritale sharia rako tuli tuli.

¹¹⁸Oho kwadawilegha awo wose wiserisikiragha sharia rako; mikalo yawo ni ya duu.

¹¹⁹Wawiwi wose wa ndoenyi kwadawitala sa wuchafu, kwa huwo naikunde memu yako.

¹²⁰Naawuyakuobua; niaobua matanyo ghako.

¹²¹Nabonyere ijo jiko ja loli na ja hachi; kusakenisighia wamaiza wapo.

¹²²Nibonyere ilaghiro kukaia kuchanitesia ini mdumiki wako; kusakewisigha wandu wikukasire winikoronge.

¹²³Nazighanira ngasilwa ngiweseria kukia kwako, na kukatisha ilaghiro jako ja hachi.

¹²⁴Kunibonyere kunughana na lukundo lwako lukatie, kunifundishe sharia rako.

¹²⁵Ini ne mdumiki wako; kunineke kumanya, eri nipate kutambukilwa ni memu yako.

¹²⁶Ngelo yavika kubonye ilagho BWANA, angu sharia yako yachikanyiro.

¹²⁷Naikunde memu yako kuchumba dhahabu; kuchumba dhahabu ieleshero.

¹²⁸Kwa huwo nadanugha mafundisho ghako ghose; nadazamilwa ni kula chia ya tee.

¹²⁹Memu yako ni ya mashiniko; nadaiwadia kwa ngolo yapo yose.

¹³⁰Mawonyero ghako ghadareda mwengere; ghadamneka mkelu akili.

¹³¹Nakaia na bea mbaa ya memu yako; naawuyasoda soda niko momu ghuari.

¹³²Nighalukie kuniwonie wughoma, sa iji koni kuwibonyeragha awo wikukundagha.

¹³³Kunughana na ilaghiro jako kunilindie nisecheghwa; kusenisighe ngisimwa ni kiwiwi chingi.

¹³⁴Kunikire na wandu winikorongagha, nipate kughinugha mafundisho ghako.

¹³⁵Kaia andwamweri nani kunilangalishire mwengere ghwako ini mdumiki wako; kunifundishe sharia rako.

¹³⁶Niadikwa ni mbori sa machi, angu wandu wisewadiagha sharia yako.

¹³⁷Oho ko mhachi ee BWANA, na sharia rako ni ra loli.

¹³⁸Oho kwaiwikie memu yako kwa hachi na wuloli ghose.

¹³⁹Iriso jekukunda janibwagha, ngiwona wamaiza wapo wisetalagha sharia rako.

¹⁴⁰Ilaghiro jako jarumirikie putu, na ini mdumiki wako najikunde.

¹⁴¹Ini ne mtini, nimenyekie, ela sena siliwagha sharia rako.

¹⁴²Hachi yako ichadua kwa kala, na sharia yako ni ya loli.

¹⁴³Napatiro ni wasi na kuwawa kubaa, ela memu yako yaniredia kuboilwa.

¹⁴⁴Memu yako ni ya hachi kwa kala, kunineke kutambukilwa nipate kukaia moyo.

¹⁴⁵Nakuwanga kwa ngolo yapo yose; kunidike ee BWANA. Nichariwadia sharia rako.

¹⁴⁶Nakuwanga; nikire, nani nichaiwadia memu yako.

¹⁴⁷Nadawuka kokio nilombe wutesia; nadasuwiria ilaghiro jako.

¹⁴⁸Nalale nilave ngijiririkanya ilaghiro jako.

¹⁴⁹Kunisikire kwa wundu ghwa lukundo lwako lukatie ee BWANA; niwonie wughoma, kujilindie irangi japo.

¹⁵⁰Wakorongi wapo wing'etere weko kaavui; wandu wiko kula na sharia yako.

¹⁵¹Ela oho koko kaavui nani ee BWANA, na malaghiro ghako ghose ni gha loli.

¹⁵²Namerie kumanya kwa ilagho jako kufuma aho kukaia, kooiwika memu yako iduo kwa kala.

¹⁵³Zighana matiriro ghapo kunikire, angu siiliwie sharia yako anduangi.

¹⁵⁴Kunidederie na kunikombua; kunikaishe moyo kunughana na ilaghiro jako.

¹⁵⁵Wawiwi weko kula na kukia, angu wisewueilola sharia yako.

¹⁵⁶Wughoma ni mungi nandighi ee BWANA; kunikaishe moyo kunughana na loli yako.

¹⁵⁷Neko na wakorongi na wamaiza wengi, ela sitanagha na memu yako.

¹⁵⁸Ngawona wandu wisene irumirio niazamilwa, angu wiseghiwadiagha malaghiro ghako.

¹⁵⁹Wona seji niboilwagha ni mafundisho ghako! Kunilindie kunughana na lukundo lwako lukatie.

¹⁶⁰Malagho ghako ghose ni gha loli, na sharia rako rose ra hachi radua kwa kala.

¹⁶¹Wabaa waawuyanitirira duu, ela ini nicharimaziria sharia rako.

¹⁶²Nawuyaboilwa ni ilagho jako, seji mundu uwadagha vilambo vingi wunyika.

¹⁶³Nadazamilwa ni tee, ela nadaikunda sharia yako.

¹⁶⁴Nadakukasa mando mfungade kwa ituku, kwa wundu ghwa malaghiro ghako gha hachi.

¹⁶⁵Awandu wiikundagha sharia yako, weko na sere mbaa; ndekuwadie kindo chingi chidimagha kuwikuwisha anduangi.

¹⁶⁶Naawuyawesera kunikire BWANA, nani nadabonya seji kunilaghiragha.

¹⁶⁷Nadaiwadia memu yako; naikunde kwa ngolo yapo yose.

¹⁶⁸Nadaghiwadia mafundisho ghako, na memu yako; oho kwaichi seji nibonyagha.

¹⁶⁹Nakulilia kunisikire ee BWANA; kunineke kutambukilwa kunughana na ilagho jako.

¹⁷⁰Nakuvoya kunisikire; kunikire kunughana na ilagho jako.

¹⁷¹Nichakukasa tuli tuli, angu kwawuyanifundisha sharia rako.

¹⁷²Nichabora malagho gha sharia yako, angu memu yako yose ni ya loli.

¹⁷³Kukaie tayari kunitesia kwa ndighi rako, angu naghinugha mafundisho ghako.

¹⁷⁴Neko na bea ya kukia kwako ee BWANA, nadaboilwa ni sharia yako.

¹⁷⁵Kunikaishe moyo, nipate kukukasa; malaghiro ghako ndeghinitesie.

¹⁷⁶Namara-mara sa ng'ondi ilagharie; kunilole ini mdumiki wako, kwa kukaia siwueliwa malaghiro ghako anduangi.