Read TAITA BIBLE – Biblia Ilagho Jiboie Kwa Wandu Wose ZABURI 144 Bible Online

ZABURI 144 - TAITA BIBLE – Biblia Ilagho Jiboie Kwa Wandu Wose bible

ZABURI 144

¹BWANA mlindiri wapo ndekaso. Wadanifundisha kulwa, na kuniwika nicha kwa wuda.

²Uo ni mlindiri na mdederii wapo; ni ngome na mkiri wapo; nadamrumiria kwa wubanana ghwapo. Wadariwika mbari zima aisi yapo.

³BWANA, mdamu niki hata kumzighane, uo mwana wa mdamu hata kudime kumkumbuka?

⁴Mdamu ni sa miruke, matuku ghake gheeka sa kiju chiidagha.

⁵Rughua mawingunyi ee BWANA, kusee ndoenyi! Adada mighondi ifunye mosi!

⁶Ng'alisha luhehia, kuwisaghise wamaiza wako; kumba mawanu ghako, kuwikimbirishe.

⁷Sera mkonu ghwako ndoenyi kufuma aighu, kunivuvuo na kunikira kufuma kwa machi mengi. Nivuvuo kufuma mikonunyi kwa waghenyi.

⁸Ndewighoragha loli jingi; wadaghora tee hata kwa kughema.

⁹Nichakuboria lumbo luwishi ee Mlungu; nichakuboria ngikaba kinubi.

¹⁰Kwadawisimisha wazuri, na kumvuvua mdumiki wako Daudi.

¹¹Kunikire na wamaiza wapo wing'etere; nivuvuo kufuma mikonunyi kwa waghenyi, wiseghoragha loli jingi, wadaghora tee hata kwa kughema.

¹²Wana wedu wa womi ndewikaie sa miwalwa izoghue kwa wudawana ghwawo; wai wedu ndewikaie sa nguro ra mbembenyi riboisiro riaghe ngome ra wazuri.

¹³Nganya redu nderichuo viro va mbari rose; ng'ondi redu nderive maelfu gha wana milambenyi kodu.

¹⁴Ng'ombe redu nderive kwa wungi; risekuo vifu hata kufusha; kililo chingi cha wasi chisesikirike chienyi kodu.

¹⁵Warasimilwa awo wandu wipatagha agho marasimio; warasimilwa awo wandu BWANA uko Mlungu wawo.