Read TAITA BIBLE – Biblia Ilagho Jiboie Kwa Wandu Wose ZABURI 145 Bible Online

ZABURI 145 - TAITA BIBLE – Biblia Ilagho Jiboie Kwa Wandu Wose bible

ZABURI 145

¹Nichakukuma oho Mlungu wapo na mzuri wapo; nichajikasa irina jako kwa kala na kala.

²Nichakukasa oho kula ituku, na kujikuma irina jako kwa kala na kala.

³BWANA ni m'baa, nao wafwana ukaso nandighi. Wubaa ghwake ndeghumanyikagha.

⁴Kula kivalwa chicharikasa kazi rako kwa kivalwa kizima, vichaghora malagho gha mabonyo ghako gha ndighi.

⁵Wichaghora maza ra wubaa ghwako ghwa kiwuzuri, nani nicharirikanya maza ra kazi ra mashiniko.

⁶Wandu wichaeresha malagho gha mabonyo ghako gha ndighi gheobosha; nani nichaeresha malagho gha wubaa ghwako.

⁷Wichaeresha sare ya wucha ghwako mungi, na kubora malagho gha hachi yako kwa kuboilwa.

⁸BWANA ni wa mvono na wughoma; ndebonyagha machu shwa-shwa, nao wachua lukundo lukatie.

⁹BWANA ni mucha kwa wose, nao oko na wughoma aighu ya vilambo vose uvibonyere.

¹⁰Maumbo ghako ghose ghichakukasa ee BWANA, na waeli wako wose wichakufunyira chawucha.

¹¹Wichaja malagho gha wubaa ghwa wuzuri ghwako, na kughora malagho gha kudima kwako;

¹²eri wandu wose wipate kumanya mabonyo ghako gha ndighi, na kuboa kwa wubaa ghwa wuzuri ghwako.

¹³Wuzuri ghwako ni ghwa kala na kala, na nguma rako radua vivalwa hata vivalwa. BWANA ni mloli kwa malagho ghake ghose, nao ni mucha kwa mabonyo ghake ghose.

¹⁴BWANA wawiwadia awo wiambaa wigho, na kuwiwusira awo wighue.

¹⁵Vilambo vose viko moyo vaawuyakusuwiria oho, na oho kwavineka vindo kwa ngelo yaro.

¹⁶Kwadaghorua mikonu yako kuneka kwa ishima, na kukatisha bea ya kula kilambo chiko moyo.

¹⁷BWANA ni mhachi kwa ghose ubonyagha, nao ni wa wughoma kwa mabonyo ghake ghose.

¹⁸BWANA oko kaavui na wose wimmbangiagha, awo wose wimmbangiagha kwa loli.

¹⁹Wadawikatishira wose wimuobuagha, nao wadasikira kililo chawo, na kuwikira.

²⁰BWANA wadawilindia wose wimkundagha, ela uchawitotesha wawiwi wose.

²¹Nichamkasa BWANA ngelo rose; maumbo ghake ghose ndeghijikase irina jake ja wueli kwa kala na kala.