Read TAITA BIBLE – Biblia Ilagho Jiboie Kwa Wandu Wose ZABURI 147 Bible Online

ZABURI 147 - TAITA BIBLE – Biblia Ilagho Jiboie Kwa Wandu Wose bible

ZABURI 147

¹BWANA ndekaso! Ni nicha kum'boria Mlungu odu makaso; yaboie sena yafwana kumkasa.

²BWANA waiagha sena Jerusalemu; wawiwunja wandu wa Israeli werebarishiroghe.

³Wadawiboisa awo wibwaghilo ngolo, na kuwifunga ngoru rawo.

⁴Uo waichi mtalo ghwa nyeri nyeri, nao wadaridema marina rose.

⁵BWANA odu ni m'baa, uwadie ndighi; hikima yake ndeipimikagha.

⁶BWANA wadawiwusira awo wighushiro, na kuwikumba wawiwi andonyi.

⁷Mfunyirenyi BWANA chawucha kwa kubora; mum'borie Mlungu odu chumbo risingie kwa kinubi.

⁸Wadafinikira mlungunyi na mawingu, na kubonya vua kwa wundu ghwa ndoe; wadabusa nyasi aighu mighondinyi.

⁹Wadarineka vindo nyamandu ra isakenyi, na vana va ngorusa vidayagha.

¹⁰Ndeboilwagha ni farasi riwadie ndighi, hata ndeboilwagha ni masikari ghiwadie ndighi,

¹¹ela BWANA wadaboilwa ni wandu wimuobuagha, awo wilusuwiriagha lukundo lwake lukatie.

¹²Mkase BWANA, ee Jerusalemu! Mkase Mlungu wako ee Sioni!

¹³Wabonya mbenge rako rikaie rimange, na kuwirasimia wandu wako wiko andenyi.

¹⁴Wailindia mipaka yako; na kukughudisha na ngano iboie kuchumba.

¹⁵Wadafunya momu ndoenyi, na ilagho jake jadakatishwa shwa wori.

¹⁶Wadaala theluji sa bula, na kusasara barafu sa teri.

¹⁷Wadanyesha vua ya magho sa kokoto; nani udimagha kurumaghia mbeo yake?

¹⁸Wadafunya momu nao magho ghiasagha; wadawetesha mbeo, nao machi ghiasea.

¹⁹Wadaghora ilagho jake kwa Jakobo, sharia na mafundisho ghake kwa wandu wa Israeli.

²⁰Ndebonyere huwo kwa mbari ingi zima, ndewiichi sharia rake. BWANA ndekaso.