Read TAITA BIBLE – Biblia Ilagho Jiboie Kwa Wandu Wose ZABURI 17 Bible Online

ZABURI 17 - TAITA BIBLE – Biblia Ilagho Jiboie Kwa Wandu Wose bible

ZABURI 17

¹Sikira kuvoya kwapo kwa hachi, na kililo chapo ee BWANA. Degha kudu kusikire malombi ghapo ghiseko na wukalo ghungi.

²Wonyera kukaia siwadie ikosa ee BWANA, kuwone agho ghiko gha hachi.

³Kukanitima ngolo yapo, na kunichea nakio, iji kwanitima, ndekuchaawona wuwiwi ghungi andenyi kwapo anduangi. Ini sidedagha kiwiwi chingi.

⁴Ini sidedagha kiwiwi sa wandu wazima; nadaiwadia memu yako, hata sinughagha mighendo ya wang'eti anduangi.

⁵Nadakunugha toe kwa wuloli, hata sighalukie nambai anduangi.

⁶Nalomba kwako ee Mlungu, angu kunitumbuliagha; nideghie kudu kwako, kunisikire.

⁷Wonyera lukundo lwako lukatie lwa mashiniko, oho kukiragha kwa mkonu ghwako ghwa ndighi, awo wikukimbiriagha oho kufuma kwa wamaiza wawo.

⁸Kunilindie karakara na mundu wa iriso, kunivise andenyi ya kiju cha mawawa ghako,

⁹nisewono ni wandu wawiwi, awo winisokagha; wamaiza wapo wibwaghagha, awo wawuyanimara chia rose.

¹⁰Ndewine wughoma, wiadeda kwa lubando.

¹¹Waninugha wikinilola, na idana wanimara chia rose; walola wulalo ghonighusha.

¹²Weko sa shimba ikunde kurashua; na mwana wa shimba ulaliriagha.

¹³Wuka ee BWANA! Witangale kuwisime! Kunikire na wandu wawiwi kwa lufu lwako.

¹⁴Kunikire na wandu wawiwi ee Bwana, awo wiko na kula kilambo wichikunde; kuwineke makabo ghikate, agho kughiwikie kwa wundu ghwawo; ghidimagha kuwikata wana wawo, hata na weke wawae.

¹⁵Ela ini nichakaia na hachi eghuzighana wushu ghwako; na iji nawuka, nichakatwa ni kukuwona oho.