Read TAITA BIBLE – Biblia Ilagho Jiboie Kwa Wandu Wose ZABURI 19 Bible Online

ZABURI 19 - TAITA BIBLE – Biblia Ilagho Jiboie Kwa Wandu Wose bible

ZABURI 19

¹Ni Zaburi ya Daudi Mawingunyi kwafunukua wubaa ghwa Mlungu, nako kwawonyera worinyi kazi ra mikonu yake.

²Kula dime yaghufunukua, na kula kio chaghufunukua.

³Kuseko na madedo, hata malagho, lwaka lwaro ndelusikirikagha.

⁴Ela sena malagho gharo ghaera ndoenyi kose, hata kutua kwa wurumwengu. Andenyi yaro, Mlungu wajiwikie iruwa;

⁵najo jajoka sa bwana arusi ufumagha chumbenyi kwake, na sa mundu wa misarigho ukimbiagha, janugha chia yake kwa kuboilwa.

⁶Jabuka iichia cha kutuonyi kwa mawingunyi, na kuida hata kutuonyi kwaro. Kilambo chingi ndechikuvisagha chisepato ni mruke ghwaro anduangi.

⁷Sharia ya BWANA ni ya loli putu, irukishagha roho; memu ya BWANA ni erumirilwa, imnekagha mkelu hikima.

⁸Sharia ra BWANA ni ra hachi, riboisagha ngolo; memu ya BWANA yaelie, iredagha kutambukilwa.

⁹Kuobua kwa BWANA kwaboie, kwadua kwa kala na kala; malaghiro gha BWANA ni gha loli, nagho ni gha hachi putu.

¹⁰Ghakundikie kuchumba dhahabu, ee, kuchumba dhahabu ielie, ghasingie kuchumba wuki; wuki ghutonyagha kufuma kwa mando gha choki.

¹¹Ghanifundisha ini mdumiki wako; ngaghiwadia nichapata mafungu mabaa.

¹²Nani udimagha kughimanya makosa ghake? Kunilekie makosa ghivisikie kwapo ee BWANA.

¹³Kunilindie nisebonye kaung'a ra kidali, hata risenibonyere nguma. Niko nichaakaia mloli putu, na kukaia kula na wuwiwi ghwa kaung'a.

¹⁴Madedo ghapo na maririkanyo ghapo ndeghirumirikie imbiri kwako ee BWANA, mlindiri wapo na mkomboli wapo.