Read TAITA BIBLE – Biblia Ilagho Jiboie Kwa Wandu Wose ZABURI 21 Bible Online

ZABURI 21 - TAITA BIBLE – Biblia Ilagho Jiboie Kwa Wandu Wose bible

ZABURI 21

¹Mzuri wadaboilwa angu kumnekie ndighi ee BWANA; nao wazuma nandighi angu kumteserie.

²Koomneka icheni orekundeghe, hata ndekumuimie icho orelombieghe anduangi.

³Oho kwamrasimie; kwamrushire kirumbu cha dhahabu ielie chongonyi kwake.

⁴Orekulombieghe irangi na oho kukamneka; irangi ja matuku mengi, ja kala na kala.

⁵Oho kwamteserie ukapata wubaa mungi; kwamnekie kughoka na ishima ja kiwuzuri.

⁶Kwamnekie marasimio gha kala na kala; kukam'bonya uboilo kwa kukaia andwamweri nao.

⁷Mzuri wadakusaghika kwa BWANA, na kwa lukundo lukatie lwa Uo-Uko-Aighu-Nandighi, ndechaanyavurika anduangi.

⁸Uchawiwada wamaiza wake wose kwa ndighi rake; uchawiwada awo wose wizamilwagha ni uo.

⁹Kasikira kwawoneka, uchawitotesha sa modo ghukumbagha lumu. BWANA uchawimeria kwa machu ghake, na modo ghuchawitotesha.

¹⁰Ndekuwadie kivalwa chingi chawo chichaasigharika ndoenyi; Mzuri uchawitotesha wose.

¹¹Wikeduabonya njama na mipango ya wuwiwi aighu yake, na kubonya mipango ya wuwiwi, ndewichaadima.

¹²Uchawikumba na mawanu ghake, nawo wichaghaluka na kukimbia.

¹³Dakukasa ee BWANA kwa wundu ghwa ndighi rako mbaa. Dichabora na kurikasa ndighi rako.