Read TAITA BIBLE – Biblia Ilagho Jiboie Kwa Wandu Wose ZABURI 25 Bible Online

ZABURI 25 - TAITA BIBLE – Biblia Ilagho Jiboie Kwa Wandu Wose bible

ZABURI 25

¹Nareda ilombi japo kwako ee BWANA,

²nakurumiria oho ee Mlungu wapo, nisakefushwa waya; kusakewisigha wamaiza wapo wizume aighu yapo.

³Mundu ukusuwiriagha oho, ndefushwagha waya jingi; ela wandu wa mikalo wichafushwa waya.

⁴Kunifundishe chia rako ee BWANA kurimanyishe kwapo.

⁵Kunifundishe niduo moyo kunughana na loli yako. Angu oho ko Mlungu Mkiri wapo; nadakusuwiria oho matuku ghose.

⁶Kumbuka wughoma na lukundo lwako lukatie ee BWANA, uloni koreluwonyereghe kufuma kala.

⁷Kusakekumbuka kaung'a na makosa gha wudawana ghwapo ee BWANA; kunikumbuke kwa wucha ghwako kunughana na lukundo lwako lukatie.

⁸Kwa kukaia BWANA waboie sena ni mucha, kwa huwo wadawifundisha wakaung'a chia enugha.

⁹Wadawilongoza awo wikuserie, na kuwifundisha kubonya lukundo lwake.

¹⁰BWANA wadawilongoza awo wijiwadiagha ilaghano jake, na kuinugha memu yake kwa lukundo lukatie na wuloli.

¹¹Kunifuye wughoma kaung'a rapo nyingi ee BWANA kwa wundu ghwa irina jako.

¹²Umundu umuobuagha BWANA, BWANA uchamfundisha chia imfwanagha kunugha.

¹³Uo moni uchadua nicha, na wana wake wichapata isanga.

¹⁴BWANA ni mghenyi wa awo wimuobuagha, nao wadawimanyisha ilaghano jake.

¹⁵Nadamzighana BWANA matuku ghose unitesie, angu nuo uchaanifunya mdeghonyi.

¹⁶Ghaluka kuniwonie wughoma BWANA, angu naawuyakorongwa niko niekeri.

¹⁷Niinjire masumbuko gha ngolo yapo, kunifunye wasinyi.

¹⁸Ririkanya aighu ya kukorongwa kwapo na wasi ghwapo, kunifuye wughoma kaung'a rapo rose.

¹⁹Wona seji niko na wamaiza wengi, na seji wizamilwagha ni ini nandighi.

²⁰Nilindie, kunikire; kusakenisigha nifusho waya, angu nakukimbiria.

²¹Wucha ghwapo na ishima japo ndeviniwike nicha; naawuyakusuwiria oho.

²²Kombua wandu wako Israeli kufuma kwa wasi ghwawo ghose, ee Mlungu.